كەز كەلگەن مەملەكەتتىڭ الەۋمەتتىك جانە ەكونوميكالىق يگىلىگىنىڭ ماڭىزدى تەتىكتەرىنىڭ ءبىرى – ەلدەگى تابىستى كاسىپكەرلىك ەكەنى ءسوزسىز. قازاقستان پرەزيدەنتى ەكونوميكانىڭ وسى سالاسىنا جان-جاقتى قولداۋ كورسەتۋ تۋرالى تاپسىرما جۇكتەگەن بولاتىن. بۇل تاپسىرمانى جۇزەگە اسىرۋدىڭ نەگىزگى جولى ەلىمىزدىڭ 2020 جىلعا دەيىنگى ستراتەگيالىق دامۋ جوسپارى بولىپ تابىلادى. وسى ۋاقىتتا ىشكى جالپى ونىمدەگى شاعىن جانە ورتا بيزنەس مەكەمەلەرىنىڭ ۇلەسى 7-10 پايىزعا دەيىن ارتۋى ءتيىس. بۇل قازاقستاننىڭ بيزنەس-احۋالى جوعارى 50 ەلدىڭ قاتارىنا ەنۋىنە مۇمكىندىك بەرەدى.
سوندىقتان ەلىمىزدە كاسىپكەرلىكتى دامىتۋعا جاعداي جاساۋ ءۇشىن پارتيا كوپتەگەن اۋقىمدى شارالاردى قولعا الىپ كەلەدى. ماسەلەن, پارتيانىڭ باستاماسىمەن زاڭنىڭ بيزنەسكە بايلانىستى تارماعىنا شىعىنداردى ازايتۋ تۋرالى وزگەرىس ەنگىزىلدى. سونداي-اق, جۇيەقۇراۋشى كاسىپورىنداردىڭ قاتىسۋىمەن شاعىن جانە ورتا بيزنەستى دامىتۋ بويىنشا جاڭا جوبا تابىستى جۇزەگە اسىرىلىپ كەلەدى.
سونىمەن بىرگە, «بيزنەستىڭ جول كارتاسى-2020», «ەڭبەكپەن قامتۋ ستراتەگياسى-2020», يندۋستريالاندىرۋ كارتاسى سياقتى ماڭىزدى باعدارلامالاردىڭ ورىندالۋى پارتيانىڭ قاتاڭ باقىلاۋىندا.
قازاقستانداعى بيزنەس احۋالدى جاقسارتۋ توڭىرەگىندەگى وسى جانە وزگە دە ماڭىزدى ماسەلەلەر كەشە «نۇر وتان» پارتياسى ۇيىمداستىرعان «دوڭگەلەك ۇستەل» بارىسىندا ءسوز بولدى. پارتيا توراعاسىنىڭ ءبىرىنشى ورىنباسارى نۇرلان نىعماتۋليننىڭ اتاپ وتكەنىندەي, «ەلباسىمىز, پارتيامىزدىڭ توراعاسى نۇرسۇلتان ءابىش ۇلى نازارباەۆ وتاندىق بيزنەستى دامىتۋ, باسەكەگە قابىلەتىن ارتتىرۋ مىندەتىن قويىپ وتىر. سوندىقتان, وسى ماقساتقا جەتۋ ءۇشىن ءارتۇرلى كەدەرگىلەرگە جول بەرمەي, كاسىپكەرلەرىمىزدى قورعاۋ جانە قولداۋ كورسەتۋ «نۇر وتان» پارتياسىنىڭ نەگىزگى ماقساتى دەۋگە بولادى. وسىعان بايلانىستى پارتيامىز بۇگىن جاڭا ۇسىنىستار ەنگىزىپ, ناقتى شارالاردى قولعا الىپ جاتىر».
ەلباسى مەملەكەتىمىزدەگى بيزنەس احۋالدى جاقسارتۋ ءۇشىن بىرقاتار ستراتەگيالىق مىندەتتەر جۇكتەدى. ول ەڭ الدىمەن, ليتسەنزيالار مەن رۇقسات بەرۋلەردى, تەكسەرۋلەردى ازايتۋ. ماسەلەن, وسى ۋاقىتقا دەيىن 300-دەن استام رۇقسات بەرۋ قۇجاتتارىن قىسقارتۋ مۇمكىندىگىنە يە بولدىق. 2015 جىلعا دەيىن بيزنەسكە بايلانىستى شىعىندار تاعى دا 30 پايىزعا دەيىن تومەندەۋگە ءتيىس.
مەملەكەتتىك مەكەمەلەردىڭ رۇقساتنامالارى مەن باقىلاۋ-قاداعالاۋ قىزمەتتەرىن قىسقارتۋ جونىندەگى ەلباسى تاپسىرماسىنىڭ ورىندالۋى تۋرالى ساۋدا جانە ەكونوميكالىق دامۋ ءمينيسترى قايرات كەلىمبەتوۆ باياندادى. ول «نۇر وتان» مەن بيزنەس-قاۋىمداستىقتىڭ قاتىسۋىمەن دايىندالعان مەملەكەتتىك ورگانداردىڭ باقىلاۋ-قاداعالاۋ جانە ليتسەنزيالاۋ-رۇقسات بەرۋ قىزمەتتەرىن ودان ءارى رەفورمالاۋ ۇسىنىستارىن العا تارتتى. ول بىرنەشە كەزەڭدەردەن تۇرادى. بىرىنشىدەن, ليتسەنزيالار مەن رۇقساتتاردى 30 پايىزعا قىسقارتۋ, سونداي-اق, رۇقساتتاردىڭ كەيبىر تۇرلەرىن حابارلاما تارتىبىنە اۋىستىرۋ. ودان ءارى رۇقساتنامالار تىزبەگىن ولاردىڭ قاۋىپتىلىك دەڭگەيىنە بايلانىستى ساناتتارىنا جانە بىرەگەي تالاپپەن بەكىتىلىگەن تارتىپكە سايكەس ءبىر عانا زاڭمەن تولىقتاي انىقتاۋ كوزدەلىپ وتىر. ناتيجەسىندە بارلىق رۇقساتنامالاردى جاپپاي ەلەكتروندىق تۇرگە اۋىستىرۋ جانە حقكو ارقىلى جۇزەگە اسىرۋ جوسپارلانعان.
اتالعان وزەكتى ماسەلەنى شەشۋ ءۇشىن بىرلەسىپ, بيلىك پەن بيزنەس اراسىنداعى بايلانىستى جاڭا دەڭگەيگە كوتەرۋ كەرەك. ول وزگەرىستەردى «اتامەكەن» وداعى مەن ۇكىمەتتىڭ كۇشىن بىرىكتىرۋ ارقىلى جۇزەگە اسىرۋعا بولادى. بۇل «نۇر وتان» پارتياسىنىڭ ۇسىنىسى. بيزنەس ورتا وكىلدەرى مۇنداي ارىپتەستىكتىڭ كاسىپكەرلىكتى كوتەرۋ, جالپى العاندا, ەلىمىزدى دامىتۋ جولىندا وڭ ناتيجە بەرەتىنىنە سەنىمدى.
پارتيا بيزنەس سالاسى ماسەلەلەرىن شەشۋدەگى بىرلەسكەن يگى قادامداردىڭ ورىندالۋىن قاتاڭ باقىلاۋعا الماق. سەبەبى, قازاقستاننىڭ جاڭا ەكونوميكالىق دامۋىنىڭ تيىمدىلىگى قۋاتتى كاسىپكەرلىك ورتامەن تىعىز بايلانىستى.
«ەگەمەن-اقپارات».