بۇرناعى كۇنى استاناداعى ۇلتتىق ءباسپاسوز كلۋبىندا ەلىمىزدىڭ باس ۋرولوگى مىرزاكارىم الشىنباەۆ, مەديتسينا عىلىمدارىنىڭ دوكتورى, كارديولوگ دۋلات پولىمبەتوۆ, الماتى دارىگەرلەر بىلىمدەرىن جەتىلدىرۋ ينستيتۋتى ەندوكرينولوگيا كافەدراسىنىڭ پروفەسسورى ميحايل زەلتسەر استانا قالاسىنداعى رەسپۋبليكالىق دياگنوستيكالىق ورتالىقتا ءوتىپ جاتقان «ەرلەر دەنساۋلىعى كۇندەرى» شاراسى اياسىندا ءباسپاسوز ءماسليحاتىن وتكىزدى.
«ەرلەر دەنساۋلىعى كۇندەرى» ءىس-شاراسى اياسىندا ەرلەر مەن ۇل بالالار ۋرولوگيالىق, جۇرەك-قان تامىرلارى جانە ەندوكرينولوگيالىق اۋرۋلار بويىنشا استاناداعى رەسپۋبليكالىق دياگنوستيكالىق ورتالىقتا اتالمىش پروفەسسورلاردان تەگىن كەڭەستەر الۋدا. شارا ەل ۇكىمەتىنىڭ باستى ماسەلەلەرىنىڭ ءبىرى – حالىقتىڭ ءومىرىن ۇزارتۋعا بايلانىستى وتكىزىلىپ وتىر. وكىنىشكە وراي, ەل اۋماعىنداعى ەرلەر ورتاشا ەسەپپەن ايەلدەرگە قاراعاندا 12 جىلعا قىسقا ءومىر سۇرەتىن كورىنەدى. بۇل كوبىنەسە, سىرقات ەر ادامداردىڭ مەديتسينا كومەگىنە وتە كەش جۇگىنەتىنىنىڭ ءناتيجەسى ەكەنىن ايتقان ءجون. ياعني, زاماناۋي دياگنوستيكا ارقىلى اۋرۋىن انىقتاپ, ءومىر ساپاسىن جاقسارتۋعا ەركەكتەردىڭ ءوزى ق ۇلىقسىز كورىنەدى, ءيا, ەر ازاماتتار اۋرۋلارىن ابدەن اسقىنتىپ, سوڭعى ستادياسىندا كەلىپ, ابدەن تيتىقتاعانشا جۇرە بەرەدى. مىرزاكارىم الشىنباەۆتىڭ پىكىرىنشە, مەديتسينالىق كومەك ماسەلەسىنە كەلگەندە ەلىمىزدەگى ەركەكتەر پسيحولوگياسىن تۇبەگەيلى وزگەرتۋىمىز كەرەك كورىنەدى. «مەملەكەتىمىزدە انا مەن بالا دەنساۋلىعىن قولداۋعا باعىتتالعان كوپتەگەن مەملەكەتتىك باعدارلامالار بار دا, ەرلەر دەنساۋلىعىنا بايلانىستى ءبىر دە ءبىر باعدارلاما قابىلدانباعان. بارلىعىنا كەلگەندە قارجى تابىلادى, ال ەركەكتەر دەنساۋلىعىنا قاراجات بولمەيدى. بۇل ماسەلەنى ءبىز 2008 جىلدان بەرى كوتەرىپ كەلەمىز, ازىرشە سەڭنىڭ بۇزىلاتىن ءتۇرى جوق», – دەيدى پروفەسسور.
ۋرولوگيا عىلىمي ورتالىعى قازاقستاننىڭ بارلىق اۋماقتارىندا وتكىزىلگەن ءىس-شارالاردى قورىتىندىلاي كەلە, ەرلەر اراسىندا ەرەكتيلدى ديسفۋنكتسيانىڭ, ادەنوما, پروستاتيت, بۇيرەك تاستارى اۋرۋلارى كوپ تارالعانىن انىقتاپ وتىر. سونىمەن قاتار, تابيعي زاڭدىلىقتار مەن اۋا-رايىن بايلانىستى وڭتۇستىك جانە باتىس ايماقتاردا ءومىر سۇرەتىن ەرلەر اراسىندا بۇيرەك پەن بۇيرەك تاستارى سەكىلدى اۋرۋ تۇرلەرى كوپ تارالسا, سولتۇستىك پەن شىعىس ايماقتارداعى سالقىن اۋا-رايىنىڭ اسەرىنەن ولاردا قابىنۋ اۋرۋلارى ءجيى كەزدەسەدى ەكەن.
ءباسپاسوز ءماسليحاتىندا مەديتسينالىق كومەككە ەرتە جۇگىنۋ جونىندە ەرلەر اراسىندا اعارتۋشىلىق جۇمىستارىن وتكىزۋ قاجەتتىلىگى كوتەرىلدى. سونىمەن قاتار, ءماسليحاتتى ۇيىمداستىرۋشىلار بولاشاقتا ەلوردادا ەرلەر دەنساۋلىعىن قارايتىن, جۇرەك-قان تامىرلارى, ۋرولوگيا جانە باسقا دا ەر ادامدار ءجيى شالدىعاتىن اۋرۋ تۇرلەرىن ەمدەيتىن امبەباپ ورتالىق اشۋ تۋرالى جوسپارلارىمەن ءبولىستى.
ۆەنەرا تۇگەلباي.