ەلوردالىقتاردى جەڭىسىمەن قۇتتىقتايمىن. «استانانى» جەڭۋ وڭاي ەمەس. ءبىز ءۇشىن اۋىر ماتچ ءوتتى. ويىنشىلارىم بەرگەن نۇسقاۋلارىمنان جاڭىلىپ قالدى. ونىڭ ۇستىنە ايىنا سەگىز ويىننان وتكىزسەك, ەندى بىردە ازداعان ءۇزىلىس بولىپ, ءۇش اپتادا ەكى ماتچقا قاتىستىق. بۇل دا كەرى اسەرىن تيگىزبەي قويمادى. ماسەلەن, كوماندامنىڭ العاشقى تايمدا كورسەتكەن ويىنى كوڭىلىمنەن شىقپاسا, كەلەسى 45 مينۋتتا قاۋىپتى ساتتەردى كوبىرەك ۇيىمداستىردىق. ازداعان ساتتىلىكتەر جەتسپەي جاتتى. ماتچتىڭ سوڭىندا گول جىبەرىپ العانىمىزعا ىشتەي قىنجىلىپ وتىرمىن. «استاناعا» «سەلتيككە» قارسى ويىندا ساتتىلىك تىلەيمىن!
- تەڭ ويىنعا كوڭىلىڭىز تولار ما ەدى؟
- ولاي ايتۋعا كەلمەس. سەبەبى, «استانانىڭ» گول سالاتىن بىرنەشە مۇمكىندىگى بولدى. «ورداباسىنىڭ» دا ەكىنشى تايمدا ەسەپ اشاتىن ساتتەرى بولعان ەدى. ەلوردالىقتار بالكىم جەڭىسكە لايىقتىراق شىعار. بىراق مەن ەشقاشان دا تەڭ ويىندى قاناعات تۇتپايمىن. ءارى ماقسات ەتپەيمىن. بۇل ماتچتا ويىننىڭ ءريتمىن جوعالتىپ العانىمىزدى بايقادىم.
- وزگە ويىنداردا «ورداباسى» ءۇش ورتالىق قورعاۋشىمەن وينايتىن. بۇل جولى نەگە ورتالىق قورعانىستى ەكى ادامعا سەنىپ تاپسىردىڭىز؟
- ءبىز نەگىزى قورعانىسقا ءتورت ادامدى جاۋاپتى ەتىپ قويعانبىز. قوس قاپتالدى تولىعىمەن جابۋ ءۇشىن وسىنداي قادامعا بارلىم. قازىرگى ۋاقىتتا پاتريك تۆۋماسي «استانانىڭ» ەڭ ۇزدىك ويىنشىسى بولعاندىقتان ءۇش ادامدى عانا قويۋ قيىنداۋ بولدى. تۆۋماسي ءوزىن الاڭدا قىسىمعا الماعان كەزدەرى جاقسى سەزىنەدى. سەبەبى, ول وتە جىلدام. ونى بوس قويساڭ پارتيكتى ۇستاۋ مۇمكىن ەمەس. ونى بارىنشا تۇساۋلاپ ۇستاۋىمىز كەرەك ەدى. نەگىزى ءبىز بۇل جوسپارىمىزدى ورىندادىق دەسەك تە بولادى. بىراق قاپەرىمىزدە جۋنيور كابانانگا دا بولدى.
- بۇگىن سامات سماقوۆ تا, تاڭات نوسەرباەۆ تا الاڭعا شىقپادى. سەبەبى نەدە؟
- سامات قازىر سىرقاتتانىپ جاتىر. ماتچقا ءۇش كۇن قالعاندا قىزۋى كوتەرىلىپ, انگيناسى ۇستاپ قالدى. ال تاڭاتتىڭ بەلىندە ازداعان جاراقاتى بار.
- «استانا» مەن «سەلتيك» اراسىنداعى ويىن جايلى ءوز ويىڭىزدى ءبىلدىرىڭىزشى.
- مەن بىلسەم, «سەلتيك» قازاقستانعا وسىمەن ءۇشىنشى رەت كەلەدى. «استانا» ءۇشىن ەڭ ماڭىزدىسى شوتلانديادا جوعارى دەڭگەيدە ونەر كورسەتۋى كەرەك. ول جاقتا جانكۇيەرلەردىڭ قولداۋىن, قىسىمعا قارسى تۇرا السا, ارى قاراي وتەتىن مۇمكىندىگى بار. ەلوردالىقتارعا وسى ماقساتتى جۇزەگە اسىرۋلارىن تىلەيمىن!
- گول سوعىلاردان شامامەن 30 سەكۋند الدىن ويىنشىنى الماستىردىڭىز. وسىنى ءوزىڭىزدىڭ تاكتيكالىق قاتەلىگىڭىز دەپ ەسەپتەيسىز بە؟
- مەن ولاي ويلامايمىن. بۇل فۋتبولداعى قاراپايىم ساتتەردىڭ ءبىرى.
ايان ءابدۋالي, «ەگەمەن قازاقستان»