«ۆوستوك-11» پاتەر يەلەرىنىڭ توراعاسى يۋري كوماندريكوۆتىڭ ايتۋىنشا, جامبىل كوشەسى № 137-ءشى ءۇيدىڭ ىرگەسى 1975 جىلى قالانعان. سودان بەرى عيماراتتىڭ جانىنا بىردە-ءبىر ويىن الاڭى ورناتىلماعان. تەك تۇرعىنداردىڭ كۇشىمەن 2 جىل بۇرىن قوس اتكەنشەك تۇرعىزىلعان. ەندى اۋلانىڭ باسقا كەيىپكە ەنىپ, قۇلپىرا تۇسكەن جايى بار. بۇل اۋماقتا سۋ جاڭا الاڭقاي بوي كوتەرۋدە. قالالىق اكىمدىك تۇرعىنداردىڭ بالالار وينايتىن الاڭىن سالۋ تۋرالى ءوتىنىشىن قابىل الىپ, جەرگىلىكتى قازىنادان قاراجات ءبولىنىپتى. "Strong servise" سەرىكتەستىگىنىڭ ماماندارى ءار ويىن ەلەمەنتىنە دەيىن ويلاستىرىپ, شارۋانى تاپ-تۇيناقتاي اتقارىپ بەرىپتى. بالالاردىڭ قۋانىشىندا شەك جوق.
جىل اياعىنا دەيىن 45 ويىن الاڭىن ورناتۋ بەلگىلەنسە, بۇگىنگە دەيىن 30-ى پايدالانۋعا بەرىلىپتى.
«قالا اكىمىنىڭ ەسەپتىك كەزدەسۋلەرىندە تۇرعىنداردان بالالار الاڭقايىن تۇرعىزۋ بويىنشا 26 ءوتىنىش تۇسسە, ولاردىڭ بارلىعى ەسكەرىلدى. الاڭ قايتادان قالپىنا كەلتىرىلسە, 1 ميلليون تەڭگەگە دەيىن قاراجات جۇمسالادى», دەيدى پەتروپاۆل قالالىق تۇرعىن ءۇي قۇرىلىسى, جولاۋشىلار كولىگى جانە اۆتوموبيل جولدارى ءبولىمىنىڭ باس مامانى دارحان ايتباەۆ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى