وڭتۇستىك قازاقستان وبلىسى əكىمىنىڭ وكىمىمەن سايرام اۋدانىنىڭ اكىمى بولىپ باقتيار ءساپارالى ۇلى ماماەۆ تاعايىندالدى.
جاڭا باسشىنى تانىستىرۋ ساتىندە ءوڭىر باسشىسى لاۋازىم يەسىنىڭ جۇمىسىنا تابىس تىلەپ, سايرام اۋدانىنداعى حالىقتىڭ الەۋمەتتىك-ەكونوميكالىق ءال-اۋقاتىن كوتەرۋدەگى باسشىلىقتا ەلباسى تاپسىرمالارىن مەرزىمدى ءارى ناتيجەلى ورىنداۋدى تاپسىردى. سونىمەن بىرگە, اۋداننىڭ دامۋىنا ءوز ۇلەسىن قوسقان بۇرىنعى اكىم سامات ساپارباەۆقا العىسىن ءبىلدىرىپ, قىزمەتىنە ساتتىلىك تىلەدى.
«سايرام شىمكەنت قالاسىنا ىرگەلەس جاتقان اۋدان. وسى ءوڭىردىڭ ەكونوميكالىق احۋالىن جاقسارتۋ ءۇشىن شاعىن جانە ورتا كاسىپكەرلىكتى دامىتۋعا ەرەكشە ءمان بەرىلۋى كەرەك. ول ءۇشىن ينۆەستورلار مەن جەرگىلىكتى كاسىپكەرلەرگە قويلايلى جاعداي جاساۋ وتە ماڭىزدى. بۇدان بولەك, اۋداننىڭ ساۋلەتتىك ينفراقۇرىلىمدىق دامۋىنا دا جاڭا سەرپىن قاجەت. اۋدانداعى تاعى ءبىر وزەكتى ماسەلەلەردى ءبىرى – جەر تەلىمدەرى. مۇندا جەر تەلىمدەرىن زاڭسىز يەلەنۋشىلەر كوپ. بۇل ماسەلەنى ەلىمىزدىڭ زاڭىنا سايكەس تولىققاندى شەشۋدى تاپسىرامىن», - دەدى جانسەيىت قانسەيىت ۇلى. باقتيار ءساپارالى ۇلى ماماەۆ 1969 جىلى 1 ماۋسىمدا تۋىلعان, ءبىلىمى جوعارى, ماماندىعى بويىنشا بىلىكتىلىگى - ەڭبەككە باۋلۋ جانە جالپى تەحنيكالىق پاندەرىنىڭ مۇعالىمى, زاڭگەر, كولىك باكالاۆرى.
ەڭبەك جولىن 1993 جىلى وڭتۇستىك قازاقستان وبلىسى قازىعۇرت اۋدانىنىڭ قىزىلقيا اۋىلدىق كەڭەسىنىڭ حاتشىسى بولىپ باستاعان.
1997-2012 جىلدارى ارالىعىندا قازىعۇرت اۋدانى اكىمى اپپاراتى جالپى ءبولىمىنىڭ باس مامانى, اۋماقتى دامىتۋ جانە كادرلارمەن جۇمىس ءبولىمىنىڭ باس مامانى, قىزىلقيا اۋىلى وكرۋگىنىڭ اكىمى, «قازىعۇرتسۋ» مەكەمەسىنىڭ ديرەكتورى, قازىعۇرت اۋداندىق «تازا سۋ» كوممۋنالدىق مەملەكەتتىك كاسىپورنىنىڭ ديرەكتورى, قازىعۇرت اۋداندىق تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمىنىڭ باستىعى قىزمەتتەرىن اتقارعان.
2012 جىلدىڭ ناۋرىز ايىنان باستاپ وڭتۇستىك قازاقستان وبلىسى قازىعۇرت اۋدانى اكىمىنىڭ ورىنباسارى لاۋازىمىن اتقارىپ كەلدى.