بورىكتى اسپانعا اتۋعا ءالى ەرتە

«ستاديون ۆويسكا پولسكوگو» ارە­نا­سىندا وتكەن «لەگيا» مەن «اس­تانا» اراسىنداعى ماتچ پولشا­نىڭ مەم­لەكەتتىك مەرەكەسى – ۆارشاۆا كوتەرى­لىسىنىڭ ۇلتتىق كۇنىن ءبىر مينۋت ۇن­­سىز­­­دىكپەن ەسكە الۋ راسىمىمەن باس­تالدى.  

جالپى, كەزدەسۋدىڭ ءبىرىنشى تاي­مى «استانا» فۋتبولشىسى يۆان ماەۆ­سكيدىڭ قارسىلاسپەن تارتىس­تا مايىپ بولا جازداعان ساتىمەن ەستە قالدى. ايتپەسە, ەكى كوماندا تارا­پىنان قور­­عاۋ­شىلاردىڭ ەكى ايا­عىن ءبىر ەتىك­كە تىق­قان  ادۋىندى شاب­ۋىلدار, قاق­پا­شىلاردىڭ زارە-قۇتىن العان جويقىن سوققىلار باي­قالا قويمادى. سودان دا بولار, ويىن­نىڭ بۇل بولىگىندە قاقپا قۇلپى بۇزىلماي, كوماندالار ۇزىلىسكە تەڭ ناتيجەمەن تارقاستى. كەزدەسۋدىڭ ەكىنشى تايمى ءبىز كۇت­كەندەگىدەي الاڭ يەلەرىنىڭ شابۋى­لىمەن باستالدى. وبالى نەشىك, جەر­لەس­تەرىمىز قورعانىستا اسا ساق ويناپ, قار­سىلاستىڭ «جامان» ويىن جۇزەگە اسىر­ماۋ­دىڭ بارلىق امال-ارەكەتىن جاساپ باق­تى. دەگەنمەن, «اڭدىعان جاۋ ال­ماي قويمايدى» دەگەن بار, ماتچ­تىڭ 76-مينۋتىندا ءبىزدىڭ موكين قور­عا­­عان قاقپا تورىندا الا دوپ تۋلاپ جات­تى. سەباستيان شيمانسكيدىڭ بۇرىش­تا­مادان اۋەلەتە بەرگەن دوبىن ياكۋب چەرۆين­سكي دەگەن جارتىلاي قورعاۋشى باسپەن ۇرىپ, قاقپانىڭ بوس بۇرىشىنا ءدال باعىتتادى. 

ءسويتىپ, «استانا» فۋتبولشىلارى ەۋروپادا ايگىلى كلۋبتاردىڭ وزىنە ازۋ كورسەتىپ جۇرگەن «لەگيا» سىندى كوماندادان ەكى ويىن قورىتىن­دىسىندا 3:2 ەسەبىمەن ايلاسىن اسى­رىپ, چەم­پيوندار ليگاسىنىڭ پلەي-وفف كەزەڭىنە شىقتى.

قازاقستاندىق بارشا جانكۇيەر­گە قۋانىش سىيلاعان بۇل ويىندا «استانا» مىنا قۇرامدا ونەر كورسەتتى: مو­كين, شيتوۆ, انيچيچ (پوستنيكوۆ 63), كلياينحايسلەر, مۋجيكوۆ (گراحوۆاتس 84), ماەۆسكي, تۆۋماسي, لوگۆينەنكو, كابانانگا, مۇرتازاەۆ (بەيسەبەكوۆ 57), شومكو. وسى رەتتە, كوتەرىڭكى كوڭىل-كۇيگە كىربىڭ تۇسىرەر ءبىر جايتتى ايت­پاي كەتۋگە تاعى بولمايدى. كارى قۇرلىقتىڭ تورىندە قازاق فۋتبولىنىڭ جاقسى اتىن شىعارىپ جۇرگەن ۇجىم­نىڭ قۇرامىندا بۇل ويىندا ەكى عانا قاراكوز ونەر كورسەتتى. ونىڭ وزىندە, بىرەۋى 84-مينۋتتا ويىندى ءتامامداسا, ەكىنشىسى 57-مينۋتتا ويىنشى الماس­تىرىپ, الاڭعا شىقتى...

چەمپيوندار ليگاسىنىڭ پلەي-وفف كەزەڭىنە سايدىڭ تاسىنداي ىرىكتەلگەن كىل مىقتىلار جولداما الدى. دەمەك, تارتىستىڭ كوكەسى الدا. «استاناعا» بورىكتى اسپانعا اتۋعا ءالى ەرتە. 

قايرات ءابىلدين, «ەگەمەن قازاقستان»