جيىندا اەسي ديرەكتورى ەرجان سالتىباەۆ بۇگىنگى تاڭدا «بەلدەۋ جانە جول» اتتى قىتايلىق باستامانىڭ دامۋى اياسىندا قىتاي-ورتالىق ازيا پىشىمىندەگى بايلانىستار ۇلعايىپ كەلە جاتقانىن ايتا كەلىپ, «ورتالىق ازيا ايماعىنىڭ بارلىق ەلدەرى شىعىستاعى كورشىمەن تىعىز قارىم-قاتىناستا. ايماقتاعى ەلدەر الدىندا ولاردىڭ ەكونوميكالىق جانە كولىك-ينفراقۇرىلىمدىق دامۋىن ارتتىراتىن جاڭا مۇمكىندىكتەر پايدا بولۋدا», دەدى.
دوڭگەلەك ۇستەلگە قاتىسۋشىلار ورتالىق ازيا ايماعىنداعى ەلدەردىڭ قىتايمەن سەرىكتەستىگى, اراداعى ينۆەستيتسيالىق ارىپتەستىكتىڭ قازىرگى احۋالى, ءوڭىر مەملەكەتتەرى مەن قحر اراسىندا ءجيى تۋىندايتىن تۇيتكىلدى ماسەلەلەر, سونىمەن قاتار, قىتايدىڭ «بەلدەۋ مەن جول» باستاماسىنىڭ بولاشاعى سەكىلدى تاقىرىپتاردى تالقىلادى.
باسقوسۋدا قىرعىز رەسپۋبليكاسى ستراتەگيالىق زەرتتەۋلەر ۇلتتىق ينستيتۋتىنىڭ ديرەكتورى ازامات ديكامباەۆ, تاجىكستان پرەزيدەنتى جانىنداعى ستراتەگيالىق زەرتتەۋلەر ورتالىعىنىڭ اناليز جانە بولجاۋ باسقارماسىنىڭ باسشىسى ابدۋللو حاكيم, قازاقستان پرەزيدەنتى جانىنداعى قسزي باس عىلىمي قىزمەتكەرى كونستانتين سىروەجكين, «ChinaCenter» قازاقستان-قىتاي سەرىكتەستىگى حالىقارالىق ورتالىعىنىڭ باس ديرەكتورى ءادىل كاۋكەنوۆ, قوعامدىق ماسەلەلەر ءاناليزى ورتالىعىنىڭ ديرەكتورى مەرۋەرت ماحمۋتوۆا, «ەكسپەرت-كازاحستان» ىسكەرلىك جۋرنالىنىڭ باس رەداكتورى سەرگەي دومنين جانە تاۋەلسىز ساراپشى الەكساندر كنيازەۆ, باحتيەر ەرگاشەۆ (وزبەكستان رەسپۋبليكاسى) ءوز ويلارىن ورتاعا سالدى.
«ەگەمەن-اقپارات»