جارمەڭكەدە فەستيۆال وتكىزگەن - قاراعاندى وبلىسىنىڭ اقتوعاي جانە نۇرا اۋداندارى. ەلىمىزگە قىمىزىمەن تانىلعان اقتوعاي ءوڭىرى تابيعي سۋسىنىن اكەلسە, بيدايلى نۇرا اۋدانى باۋىرساقتىڭ ءتۇر-تۇرىنەن ءدام تاتقىزدى. جارمەڭكەگە بارعان استانالىقتار قاراعاندى ءوڭىرىنىڭ ءتاتتى-دامدىلەرىنەن اۋىز ءتيىپ, قارىق بولدى.
ء«بىز بۇگىن قىمىز شوۋ وتكىزىپ, حالىققا تەگىن قىمىز تاراتتىق. اۋىلدان تازا قىمىزدى الىپ كەلدىك. وسى جەردە بىردەن كۇبىمەن ءپىسىپ تە وتىردىق. قازاقتىڭ قۇرت, ىرىمشىك, تالقان, ماي سياقتى تاعامدارىن اكەلىپ, حالىقتى ريزا قىلىپ جاتىرمىز. قالا تۇرعىندارى اۋىلدىڭ دامىنە العىسىن جاۋدىرۋدا. بۇگىن 200 ليتر قىمىز اكەلىپ ەدىك, بارلىعىن ۇلەستىرىپ, ءدام تاتقىزدىق», - دەيدى اقتوعاي اۋدانى قىزىلاراي اۋىلدىق وكرۋگىنىڭ اكىمى شەكەر تولەپبەكوۆا.
ال نۇرا اۋدانىنان كەلگەن فەستيۆال ۇيىمداستىرۋشىلارىنىڭ ءبىرى, اۋداندىق جۇمىسپەن قامتۋ جانە الەۋمەتتىك باعدارلامالار ءبولىمى باسشىسىنىڭ ورىنباسارى گۇلنار جۇپەنوۆا باۋىرساقتىڭ ءتۇر-ءتۇرىن, جالپى ۇننان پىسىرىلگەن كوپتەگەن ونىمدەردى اكەلگەنىن ايتتى.
«بۇگىن 150 كەلى تاعامدى تەگىن ۇلەستىردىك. ءبىز دە بالقايماق, جەنت, قۋىرىلعان بيداي سياقتى كوپتەگەن ۇلتتىق تاعامداردى اكەلدىك. كوپشىلىك اۋىز ءتيدى, سارقىت رەتىندە دە سالىپ بەردىك. حالىق ريزا», - دەيدى گۇلنار جۇپەنوۆا.
اتاپ وتسەك, قاراعاندى جانە جامبىل وبلىستارىنىڭ اۋىل-شارۋاشىلىعى ونىمدەرىنىڭ جارمەڭكەسى ەرتەڭ دە جالعاسادى.