يادرولىق ارسەنالدان وتكەن عاسىردىڭ ورتا تۇسىندا باس تارتقان كوستا-ريكا بۇگىنگى قازاقستاننىڭ يادرولىق قارۋسىزدانۋ باستاماسىن قولدايدى. ەكى ەل اراسىنداعى ديپلوماتيالىق قارىم-قاتىناس 1996 جىلى ورناعان. قازىرگى تاڭدا قوس تاراپ سان سالادا ىنتىماقتاستىقتى كەڭەيتۋگە مۇددەلى. اسىرەسە, مەديتسينالىق تۋريزم بويىنشا بايلانىستى بەكەمدەي تۇسپەك.
«لاتىن امەريكاسىنداعى جاسىل ەنەرگيانىڭ ۇلەسى 90 پايىز بولادى. مۇندا كۇن جانە سۋدان قۋات الاتىن الەمدەگى ەڭ ءىرى كاسىپورىندار ورنالاسقان. بۇل ورايدا, كوستا-ريكا دا قالىسپايدى. ءبىز كۇن, جەل, بيوماسسا, گەوتەرمالدى جانە گيدرو ەنەرگيالارىن وندىرەمىز. حالىقارالىق ەنەرگەتيكالىق اگەنتتىكتىڭ مالىمەتتەرىنە سۇيەنسەك, 2014 جىلى جاڭارتىلاتىن ەنەرگيانىڭ ۇلەسى الەم بويىنشا 22,3 پايىزدى قۇرادى. ال, ءبىزدىڭ ەلدەگى بۇل كورسەتكىش 100 پايىزعا جۋىقتادى», دەدى شارانىڭ رەسمي بولىمىندە ەلدىڭ سىرتقى ساياسات بويىنشا باس ديرەكتورى كريستيان فەرناندەس.
امەريكانىڭ ورتالىق بولىگىندە ورنالاسقان تىنىق مۇحيتى ەلىنىڭ وكىلى كوستا-ريكانىڭ قورشاعان ورتاعا ۇقىپتىلىقپەن قارايتىنىن, ادەمى ءارى دەموكراتيالىق مەملەكەت ەكەنىن جەتكىزدى. «ونداعى ەكوتۋريزمنىڭ دامۋى ورتالىق ازيا ەلدەرى, سونىڭ ىشىندە قازاقستان ءۇشىن دە ۇلكەن قىزىعۋشىلىق جانە الەۋەت تۋعىزۋى مۇمكىن. ءبىز قازاق جۇرتىنان كوستا-ريكاعا تۋريستەردىڭ كوبىرەك كەلگەنىن قالايمىز», دەدى ول. ك.فەرناندەس ەكسپو-2017 كورمەسىنە قاتىسۋ ەلى ءۇشىن ۇلكەن قۇرمەت ەكەنىن دە اتاپ ءوتتى.
قازاقستان تاراپىنان ءسوز سويلەگەن دەنساۋلىق ساقتاۋ ۆيتسە-ءمينيسترى ءلاززات اقتاەۆا ەكى ەل اراسىنداعى مىندەتتى مەديتسينالىق ساقتاندىرۋ سالاسىنداعى ىنتىماقتاستىق تۋرالى اڭگىمەلەدى. «ۇلتتىق كۇندى اتاپ ءوتۋ قاتىسۋشىلارعا ۇلتتىق مادەنيەتتىڭ, ءومىر سالتى مەن ءداستۇردىڭ ۇزدىك ۇلگىلەرىن كورسەتۋگە مۇمكىندىك بەرەدى. قازاقستان كوستا-ريكامەن ساياسي, ەكونوميكالىق, عىلىمي-تەحنيكالىق, مادەني سالالاردا عانا ەمەس, سونىمەن قاتار دەنساۋلىق ساقتاۋ سالاسىندا, اتاپ ايتقاندا, مىندەتتى الەۋمەتتىك مەديتسينالىق ساقتاندىرۋ, مەديتسينالىق تۋريزم ماسەلەلەرى جانە باسقا دا باعىتتار بويىنشا دا قارىم-قاتىناستى تەرەڭدەتۋ مەن كەڭەيتۋگە مۇددەلى», دەدى ۆيتسە-مينيستر.
شارانىڭ رەسمي بولىگىنەن كەيىن قازاقستاندىق كورەرمەندەر بەلگىلى ساكسوفونشى, ەسىمى گيننەستىڭ رەكوردتار كىتابىنا ەنگەن دجوۆانني ەسكالانتەنىڭ ونەرىن تاماشالادى.