يسپاندىق Carros de Foc كوشە تەاترى جەرورتا تەڭىزىندەگى مەملەكەتتەردىڭ كوشە مادەنيەتىمەن تانىستىرۋدا. پاۆيلوننىڭ ديزاينىمەن بىردەي كيىنگەن ارتىستەر ۇلتتىق بيلەرىن بيلەپ, ۇلتتىق اسپاپتا ەرەكشە اۋەندەرىن ورىندادى. شوۋ تولىعىمەن يسپان حالقىنا ءتان مىنەزدى كورسەتۋگە ارنالعان. ءبيدىڭ ءبىرىنشى ءبولىمى كەربەز اسەمدىكتى پاش ەتسە, ەكىنشى ءبولىمى بالالىق شاتتىققا تولى.
قويىلىمدى كورۋگە بارعانىمىزدا كورەرمەندەر ءبىر قولدان شاپالاق سوعىپ, اسەم اۋەن ىرعاعىمەن بىرگە بيلەپ تۇردى. باعدارلاما اياقتالعان سوڭ Carros de Foc كوشە تەاترىنىڭ باسشىسى ميگەل مارتينمەن اڭگىمەلەسۋ ءساتى بۇيىردى.
- ميگەل مىرزا, قويىلىم تۋرالى وقىرماندارىمىزعا تولىعىراق ايتىپ بەرسەڭىز؟
- EXPO-2017 كورمەسى ءۇشىن ءبىزدىڭ تەاتر ارنايى باعدارلاما ازىرلەدى. يسپانيا پاۆيلونىنىڭ قاسبەتىندە بەينەلەنگەن البەرتو كوراسوننىڭ Pavesas Encendidas (لاۋلاعان وت) اتتى سۋرەتى ارتىستەردىڭ كوڭىلىنەن شىعىپ, جاڭا قويىلىمعا شابىتتاندىردى. باعدارلامادا وركەنيەتتىڭ ىرگەتاسىن قالاپ, ادامزاتقا جارىقتى سىيلاعان تۇڭعىش ەنەرگيا – وت قۋاتى بەينەلەنگەن. قازاقستانعا 4 گيمناست, 4 اكروبات, 2 مۋزىكانت كەلدى
- تەاتردىڭ تاريحىنا توقتالىپ كەتسەڭىز...
- تەاتر 1994 جىلى يسپانيادا قۇرىلدى. باستاپقىدا ەل ىشىندە ونەر كورسەتكەن ارتىستەر, ۋاقىت وتە كەلە كورشى جاتقان جەرورتا تەڭىزى اۋماعىنداعى مەملەكەتتەرگە ساپارعا شىعا باستادى. قازىرگى ۋاقىتتا الەمگە تانىمال كوشە تەاترىنا اينالىپ, تامىز ايىندا اقش-تىڭ نەۆادا شتاتىندا ۇيىمداستىرىلىپ جاتقان حالىقارالىق ونەر فەستيۆالىنە قاتىسۋدى جوسپارلاپ وتىرمىز.
- EXPO-2017 كورمەسى تۋرالى اسەرىڭىزبەن بولىسسەڭىز
- ءبىز الەمنىڭ ءار كونتينەنتىندە ونەر كورسەتسەك تە, قازاقستانعا ءبىرىنشى رەت ات باسىن بۇرىپ وتىرمىز. حالىقتىڭ قوناقجايلىلىعى مەن مەيىرىمدىلىگى تاڭ قالدىرادى. وسى اپتادا قازاقستان ۇلتتىق پاۆيلونىن ارالاپ شىقتىم. شىنى كەرەك, بۇعان دەيىن ومىرىمدە وسىنداي تەحنولوگيالاردى كورمەدىم. جاسىل ەنەرگەتيكا تۋرالى مول اقپارات الدىم. ءبىز كورمەگە كەلگەنىمىزگە ريزامىز جانە كورسەتىلگەن قوشەمەت ءۇشىن ۇلكەن العىسىمىزدى بىلدىرەمىز!
- اڭگىمەڭىزگە كوپ راقمەت!
ايگۇل شەرنياز
«ەگەمەن قازاقستان»