2019 جىلدان باستاپ اعىلشىن تىلىندە وتەتىن پاندەردىڭ مۇعالىمدەرىنە 25 پايىز ۇستەمە جالاقى تولەنەدى. بۇل تۋرالى بۇگىن ۇكىمەت ۇيىندە «100 ناقتى قادام» ۇلت جوسپارىنىڭ الەۋمەتتىك جانە ءبىلىم سالالارىندا جۇزەگە اسىرىلۋىنا ارنالعان بريفينگتە بىلىم جانە عىلىم ءمينيسترى ەرلان ساعاديەۆ ايتتى, دەپ حابارلايدى قازاقپارات.
«بيىل اعىلشىن ءتىلى كۋرستارىنا 12 مىڭ مۇعالىم جازىلعان. ونىڭ ىشىندە 4 مىڭ مۇعالىم اعىلشىن ءتىلى كۋرستارىن باستاپ كەتتى. جاڭا وقۋ جىلىنان باستاپ 8 مىڭ مۇعالىم كۋرستارىن باستايدى. ونىڭ ءارتۇرلىسى بار, 3, 6, 9 اي بولىپ بولىنەدى. ەگەر مۇعالىم 9 ايلىق كۋرستان وتەتىن بولسا, وندا ونىڭ جۇمىس ورنى, جالاقىسى ساقتالىپ, قوسىمشا شاكىرتاقىسى تولەنەدى. جول شىعىنى وتەلەدى. كۋرستى اياقتاعاننان كەيىن اعىلشىن تىلىندە ساباق بەرە الاتىن بولسا جالاقىسىنا 25 پايىز ۇستەمە قوسىلادى»,- دەدى ەرلان ساعاديەۆ باق وكىلدەرىنىڭ ساۋالىنا وراي.
ايتا كەتەيىك, 2019 جىلدان باستاپ 10-11 سىنىپتاردا كەيبىر پاندەر اعىلشىن تىلىندە وقىتىلاتىن بولادى. وسىعان بايلانىستى قازىرگى ۋاقىتتا ەكى جىلدان كەيىن اعىلشىن تىلىندە وقىتىلاتىن پاندەردىڭ مۇعالىمدەرى تىلدىك كۋرستاردان وتۋدە.