قازاقستان وقۋشىلارىنىڭ اراسىندا وتكىزىلىپ جاتقان وليمپيادا باستاۋىن ءبىر اي بۇرىن العان. وقۋشىلار ءوز جۇمىستارىن 2017 جىلدىڭ 15 قازانىنا دەيىن http://olympiad.kz2050.kz سايتى ارقىلى ۇسىنا الادى. جوبانىڭ ماقساتى - وقۋشىلار اراسىنداعى يننوۆاتسيا جانە باعدارلامالاۋعا دەگەن قۇشتارلىعىن نىعايتىپ, ونەرتاپقىشتاردىڭ جاڭا ۇرپاعىن ءوسىرۋ.
سايىس ءتورت باعىت بويىنشا وتەدى: جاسىل ەنەرگەتيكا, اقپاراتتىق تەحنولوگيالار, مودەلدەۋ مەن روبوتوتەحنيكا, تۇرمىسقا پايدالى ونەرتابىستار.
«قازىرگى تاڭدا كوپتەگەن بايقاۋلار ءوز مارەسىنە جەتكەننەن كەيىن ديپلوم تابىستاۋمەن شەكتەلىپ قالادى. ال بىزدەر 15 قاراشادا جەڭىمپازداردى انىقتاعاننان كەيىن, جۇمىستى ەندى باستايمىز. تاڭدالعان ۇزدىك جوبالاردى مەنتورلارمەن بىرىگىپ, وقۋشىلارعا جۇزەگە اسىرۋعا كومەكتەسەمىز. ءبىز 6 مەن 11 سىنىپ اراسىنداعى وقۋشىلارعا نازار اۋدارىپ وتىرمىز», دەدى جوبا ۇيىمداستىرۋشىسى, «قازاقستان - 2050» جالپىۇلتتىق قوزعالىسى» كەڭەسىنىڭ توراعاسى مۇحتار مانكەەۆ.
ۇيىمداستىرۋشىلار ايتىپ وتكەندەي, ساراپشىلار ىرىكتەۋىنەن وتكەن 10 جوبانىڭ اۆتورىنا ءبىلىم سەرتيفيكاتتارى بەرىلىپ, كۋبوكتار تاپسىرىلادى. سونىمەن قاتار, جەڭىمپازدارعا قولداۋ كورسەتىپ, جوبانى ءارى قاراي دامىتۋ ماقساتىندا دەمەۋشىلەر تاراپىنان مەنتورلىق جاساۋ كوزدەلگەن. مەنتورلاردىڭ قاتارىندا ZeroToOneLabs.com ستۋدياسىنىڭ نەگىزىن سالۋشى, پروگرامميست ارمان سۇلەيمەنوۆ پەن «I2BF Global» كومپانياسىنىڭ قۇرىلتايشىسى, بيزنەس-ينۆەستور ءادىل نۇرعوجين بار.
ء«بىز بالاعا جاس كەزىنەن كاسىپكەر اتانۋعا كومەكتەسكىمىز كەلەدى. سەبەبى بالالىق شاقتا ادامعا ءتۇرلى قىزىقتى يدەيالار مەن ويلار كەلەدى. ءبىز سونى دەر كەزىندە بايقاپ, جوباسىن جۇزەگە اسىرۋعا كومەكتەسسەك, بولاشاقتا ۇلكەن جەتىستىككە جەتەتىن كاسىپكەردى تاربيەلەپ شىعا الامىز. ال ەگەر وسىنداي ازاماتتار ەلىمىزدە كوپ بولسا, مەملەكەت مىقتى بولادى», دەپ مالىمدەدى ءادىل نۇرعوجين.
«قازىرگى جاستار جازعى دەمالىسقا قاراماي, ەڭبەكتەنىپ, وليمپياداعا قاتىسىپ جاتقاندىعى قۋانتادى. مەنىڭ وقۋشىلارعا ايتارىم, ءوتىنىش بەرۋگە قورىقپاڭىزدار, ۇيالماڭىزدار. ءسىزدىڭ يدەياڭىز تەك باستاپقى ساتىدا تۇرسا دا, ءبىز ۇسىنىسىڭىزدى اسىعا كۇتەمىز. بۇل مۇمكىندىكتى تولىقتاي پايدالانۋ كەرەك, سەبەبى ءسىز قوعامعا پايدالى دۇنيە جاساپ شىعارا الاسىز», دەدى ارمان سۇلەيمەنوۆ ءسوز بارىسىندا.
وليمپيادانى «قازاقستان - 2050» جالپىۇلتتىق قوزعالىسى «Samruk-Kazyna Trust» الەۋمەتتىك جوبالاردى دامىتۋ قورى مەن قر ءبىلىم جانە عىلىم مينيسترلىگىنىڭ قولداۋىمەن ۇيىمداستىرىپ وتىر. وقۋشىلاردىڭ جاس ەرەكشەلىكتەرىن ەسكەرە وتىرىپ, ۇمىتكەرلەردى 6-8 جانە 9-11 سىنىپتار اراسىندا ەكى توپقا ءبولىپ قاتىستىرۋ كوزدەلگەن.
ايگۇل شەرنياز
«ەگەمەن قازاقستان»