«بۇگىندە قازاق بالالارىنىڭ 90 پايىزى مەكتەپتە ءوز تىلىندە ءبىلىم الادى. بيىل ۇلتتىق بىرىڭعاي تەستىلەۋگە قاتىسقان تۇلەكتەردىڭ 76 پايىزى تەستتى قازاق تىلىندە تاپسىردى. بۇل وتە جاقسى كورسەتكىش. ەندى باسا نازار اۋداراتىن پروبلەمالاردىڭ ءبىرى - ورىس مەكتەپتەرىندە وقيتىن 500 مىڭعا جۋىق وقۋشى قازاق تىلىندە سويلەمەيدى. ءيا, ادىستەمەنىڭ دۇرىس ەمەس ەكەنىن جاقسى بىلەمىز. دەگەنمەن, جاڭا ادىستەمە دايىن. بيىل ءبىز ونى ەكسپەريمەنتتىك نەگىزدە سول مەكتەپتەرگە تاراتامىز», دەدى ءبىلىم جانە عىلىم ءمينيسترى ەرلان ساعاديەۆ بۇگىن ۇكىمەتتە وتكەن ءباسپاسوز ءماسليحاتىندا.
ءمينيستردىڭ ايتۋىنشا, قازىرگى كەزدە مىڭنان استام مەكتەپ ءتىل ۇستارتۋدىڭ جاڭا ادىستەمەسىنە تاپسىرىس بەرىپ وتىر. اتالعان جۇيە ءساتتى ىسكە اسسا, ونىمەن بارلىق مەكتەپتەر جۇمىس ىستەيتىن بولادى.
«جاڭا ادىستەمە بالانىڭ كوممۋنيكاتيۆتى قابىلەتىن دامىتۋدى كوزدەيدى. وندايدا سوزدەردى جاي جاتتاتقىزىپ قانا قويماي, سويلەۋ ارقىلى ءتىلدى ۇيرەنۋگە بولادى. اتالعان ادىستەمەنى احمەت بايتۇرسىنوۆ پەن شايسۇلتان شاياحمەتوۆ اتىنداعى وقۋ-ادىستەمەلىك ورتالىقتارى دايىندادى», - دەپ اتاپ كورسەتتى ساعاديەۆ.