– ءبىزدىڭ حالقىمىزدا «وتان – وتباسىنان باستالادى» دەگەن ءسوز بار. وسى دانالىق ءسوزدىڭ اياسىنا ءبارىن سىيعىزۋعا بولادى. سەبەبى, وتباسىندا ۇلاعاتتى تاربيە العان بالانىڭ بولاشاعى – زور, ارمانى – اسقاق, ماقساتى ايقىن بولماق. ەلباسىمىز ءوز ءتىلىن, تاريحىن مادەنيەتى مەن ءداستۇرىن قادىرلەيتىن ۇلت قانا تولىققاندى بولىپ تابىلادى. ءبىزدىڭ قوعامدا ءداستۇردى ساقتاۋدىڭ ماڭىزدى ينستيتۋتى وتباسى دەپ, ەرەكشە اتاپ كورسەتتى. اتا-انانىڭ ونەگەلى ىسىنەن ۇلگى العان بالادان كۇنى ەرتەڭ وتانشىل ازامات شىقپاق, – دەدى ايماق باسشىسىنىڭ ورىنباسارى.
بۇل جولعى سايىستا قازىلار القاسى ۇزدىك وتباسى مۇشەلەرىن جىلداعىداي شىعارماشىلىق قابىلەتىنە قاراي ەمەس, وڭىرگە سىڭگەن ەڭبەگىنە قاراي انىقتادى.
قازىلاردىڭ قورىتىندىسى بويىنشا قوس وتباسى جەڭىمپاز اتاندى.
ەكى ءبىرىنشى ورىننىڭ بىرەۋىن قارقارالى اۋدانىنان كابۋلوۆتار وتباسى يەلەندى. ماعدات كابۋلوۆ پەن فاتيما فاحرەددينوۆا 11 بالا, 24 نەمەرە, 2 شوبەرە تاربيەلەپ وتىر. ەرلى-زايىپتىلاردىڭ وتباسىلىق ءوتىلى – 58 جىل.
ۇلى وتان سوعىسىنىڭ ارداگەرى, تەمىرتاۋ قالاسىنان كەلگەن كۋريلەنكولار وتباسى دا كوميسسيا شەشىمى بويىنشا ءبىرىنشى ورىنعا لايىق دەپ تانىلدى. 65 جىل وتاسقان وتباسى 5 بالا, 10 نەمەرە, 7 شوبەرە تاربيەلەۋدە.
جەڭىمپاز اتانعان – كابۋلوۆتار مەن كۋريلەنكولار وتباسىلارى «جارتاس» شيپاجايىنا جولداما الدى. ەندى ولار «مەرەيلى وتباسى» ۇلتتىق بايقاۋىنىڭ رەسپۋبليكالىق كەزەڭىنە قاتىساتىن بولادى.
ميراس اسان, «ەگەمەن قازاقستان»
قاراعاندى وبلىسى