بالا كەزىمىزدە كوكتە سامعاعان ۇشاق كورسەك «سامولەت, سامولەت, مەنى وزىڭمەن الا كەت» دەپ قۋانا جۇگىرۋشى ەدىك عوي. سول كەزدە اسپانعا ۇشۋ ارمان بولاتىن. وكىنىشكە قاراي, كوپ ادامنىڭ بالالىق شاقتاعى وسىنداي ءتاتتى ارمانى ورىندالماي قالاتىن سىڭايلى. ويتكەنى, ۇشاق بيلەتىنىڭ قۇنى اسپانداپ تۇر. ءسوزىمىزدى كوپ سوزباي, دەرەكتەردى سويلەتەيىك. وسى ماقالا جازىلىپ جاتقان قارساڭدا استانا – الماتى رەيسىنىڭ ءبىر باعىتتاعى ەڭ ارزان اۋە بيلەتىنىڭ قۇنى 28 573 تەڭگەنى قۇرادى (21.07.2017). ال ەلوردادان الماتىعا جىلدام جەتكىڭىز كەلسە, 32 565 تەڭگە ساناپ بەرۋىڭىز كەرەك. استانادان قازاقستاننىڭ قيىر شەتى اقتاۋعا 24 شىلدەدە ساپارعا شىعۋ ءۇشىن كەمىندە 80 مىڭ تەڭگە قاراجات كەرەك. ەلىمىزدىڭ وڭتۇستىك نۇكتەسى شىمكەنتكە دەيىن – 31 مىڭ, ال شىعىستاعى وسكەمەنگە دەيىن 33 مىڭ تەڭگە كەتەدى.
ەرتەرەك قامدانعاندار ۇشاقتىڭ بيلەتىن ارزانعا ساتىپ الۋعا مۇمكىندىگى مول. ول ءۇشىن كەمىندە 2 اي بۇرىن بيلەت ساتىپ الۋ كەرەك. بۇل حالىقتىڭ الدىن الا جوسپار جاساۋىنا جاردەمدەسەدى دەيتىندەر تابىلار. الايدا, قازاقتىڭ ءولىم-ءجىتىمى مەن توي-تومالاعى جوسپارعا قاراي قويۋى نەعايبىل. جالپى, اۋە بيلەتىنىڭ قۇنى ءاردايىم قۇبىلىپ تۇرادى. سوندىقتان, ۇشاقپەن قاتىناۋ ءۇشىن بيلەت باعاسىن مۇقيات قاداعالاپ وتىرۋ قاجەت.
حالىقارالىق ساياحات اگەنتتىگى Kiwi.com الەمدەگى ەڭ كوپ اۋە تاسىمالى بار 80 ەلدىڭ بيلەت قۇنىنا ساراپتاما جاساپتى. اتالعان دەرەككە سۇيەنسەك, مالايزيا ۇشۋ اقىسى ەڭ ارزان ەلگە جاتادى ەكەن. مالايزيالىقتار ءار 100 شاقىرىمعا 4,18 اقش دوللارىن شىعىندايتىن كورىنەدى. سونداي-اق, ارزان ەلدەر قاتارىنا بولگاريا, ءۇندىستان سەكىلدى مەملەكەتتەر كىرەدى. قازاقستان اتالعان ءتىزىمنىڭ 16-شى ساتىسىنا جايعاسىپتى. ءار 100 شاقىرىم ءۇشىن قازاقستاندىقتار 7,96 دوللار (2500 تەڭگە شاماسىندا) جۇمسايدى ەكەن. Kiwi-ءدىڭ رەيتينگىنە سەنسەك, قازاقستانداعى اۋە بيلەتىنىڭ قۇنى اقش, ۇلىبريتانيا سەكىلدى ەلدەردەن تومەن. ماسەلەن, امەريكالىقتار سونداي قاشىقتىققا 11,50 دوللار شىعىندايدى. ءبىر قاراعاندا ەلىمىزدەگى اۋە بيلەتىنىڭ قۇنى ارزان سەكىلدى اسەر ەتەدى. الايدا, جالاقى فاكتورىن ەسكەرسەك, ماسەلە تۇبەگەيلى وزگەرەدى. امەريكا مەن قازاقستانداعى ورتاشا جالاقى مولشەرىن سالىستىرۋعا كەلمەيتىنى انىق. مىسالى, اقش ەڭبەك ستاتيستيكاسى بيۋروسىنىڭ مالىمەتىنە سۇيەنسەك, ولاردىڭ ورتاشا جالاقى مولشەرى 3500 دوللار شاماسىندا ەكەن. ەلىمىزدە بۇل كورسەتكىش 150 مىڭ تەڭگەگە جۋىق. ياعني, قازاقستاندىقتار ورتاشا جالاقىسىنا 6 مىڭ شاقىرىم ۇشا الادى, ال امەريكالىقتاردىڭ ورتاشا جالاقىسى 30 مىڭ شاقىرىم ۇشۋعا جەتكىلىكتى.
ايتاقشى, كوپتەگەن شەتەلدە «لوۋكوستەر» دەپ اتالاتىن بيلەت قۇنى ارزان اۋە كومپانيالارى قىزمەت كورسەتەدى. ولاردا اس ۇسىنۋ, اۋىر جۇك ارتۋ دەگەن سەكىلدى قىزمەتتەر اقىلى. ايتسە دە, قول سومكەسىن ارقالاپ, ساپارعا شىعىپ قايتۋعا تاپتىرمايدى. اۋە قاتىناسى حالىقارالىق اسسوتسياتسياسىنىڭ (IATA) مالىمەتتەرى بويىنشا, 2015 جىلى الەمدە 3,6 ميلليارد ادام ۇشاق تاسىمالىنا جۇگىنگەن. سونىڭ 1 ميللياردقا جۋىعى وسى «لوۋكوستەرلەردى» تاڭداعان ەكەن. امەريكالىق Southwest «لوۋكوستەرى» الەمدەگى ەڭ تابىستى 10 اۋە كومپانياسىنىڭ قۇرامىنا كىرەدى. Ryanair, easyJet سەكىلدى كومپانيالار ەۋروپا اۋە نارىعىنىڭ 41 پايىزىن يەمدەنگەن. ءتىپتى, كورشى قىرعىزستاندا دا «ەير ماناس» دەپ اتالاتىن ارزان باعالى «لوۋكوستەر» قىزمەت كورسەتەدى. ايىر قالپاقتى اعايىننىڭ بۇل اۋە كومپانياسىندا ۇشاق سانى ازىرگە 3-ەۋ عانا. سوعان قاراماستان, «ەير ماناس» وتكەن جىلى شامامەن 300 مىڭعا جۋىق جولاۋشى تاسىمالداپ ۇلگەرىپتى. بيلەت قۇنى دا قالتاعا سالماق تۇسىرمەيدى. ماسەلەن, بىشكەك پەن وش قالالارى اراسىندا ۇشۋ اقىسى – 7000-8000 تەڭگە كولەمىندە. ال قىرعىز ەلىنىڭ ورتالىعىنان ماسكەۋگە دەيىنگى بيلەت قۇنى 100 دوللار شاماسىندا. اتالعان ۋاقىتتا استانا – ماسكەۋ باعىتىنا 200 دوللارعا جۋىق قارجى كەتەدى ەكەن. بىشكەكتىڭ استاناعا قاراعاندا ماسكەۋدەن الىس ەكەنى بەلگىلى. بىزدەگى اۋە بيلەتىنىڭ قۇنى جوعارى بولۋىن جانارمايدىڭ قىمباتتىعىمەن بايلانىستىراتىندار بار. الايدا, شەتەلدىك لوۋكوستەرلەر دە سول جانارمايدى جۇمسايتىنى ايتپاسا دا بەلگىلى. ەندەشە, ءبىزدىڭ ەلدەگى اۋە كومپانيالارىنىڭ بيلەتتەرى نەلىكتەن «ەير ماناستان» قىمبات بولۋى تۇسىنىكسىز.
پويىزبەن نە اۆتوكولىكپەن قازاقستاننىڭ ءبىر جاعىنان ەكىنشى شەتىنە جەتۋگە بىرنەشە كۇن كەتەدى. وسىندايدا «ايشىلىق الىس جەرلەرگە» جەدەل جەتكىزەتىن ۇشاقتىڭ «توعىزىنشى تەرريتوريا» ءۇشىن ماڭىزى وراسان. بىراق, ۇشاق بيلەتىنىڭ باعاسى اسپانداپ تۇر.
اباي اسانكەلدى ۇلى, «ەگەمەن قازاقستان