ارينە, رەسەي تاراپى دا بۇل كەزدەسۋگە مۇددەلى ەكەنىن ايتا كەتۋ كەرەك. سەبەبى, جەتىسۋ ءوڭىرىنىڭ الەۋمەتتىك-ەكونوميكالىق دامۋى مەن بولاشاقتاعى جوسپارى كىم-كىمنىڭ دە ءوز ءىسىن سەنىمدى تۇردە باستاۋىنا مۇمكىندىك بەرەدى. بۇل تۋراسىندا اكىمنىڭ مەيمانداردى وبلىستىڭ تىنىس-تىرشىلىگىمەن تانىستىرۋ كەزىندە كەڭىنەن اڭگىمەلەدى.
– وزدەرىڭىز جاقسى بىلەسىزدەر الماتى وبلىسى – ەلىمىزدەگى ءىرى اگرارلىق ولكەلەردىڭ ءبىرى بولعاندىقتان مۇندا قانت قىزىلشاسى, مايبۇرشاق, جۇگەرى وسىرىلەدى. اسىرەسە, وڭىردە قانت قىزىلشاسىن جانداندىرۋعا بارىنشا كوڭىل بولۋدەمىز. وتكەن جىلى كوكسۋ قانت زاۋىتىن ىسكە قوستىق. ال بيىل اقسۋ قانت زاۋىتىن ىسكە قوسۋ ءۇشىن ينۆەستورلار تارتىلدى. جالپى, ءتۇرلى مەملەكەتتىك باعدارلامالاردىڭ ناتيجەسىندە كاسىپكەرلەر مەن بيزنەس وكىلدەرىنە قولداۋ بىلدىرۋگە, اۋىلشارۋاشىلىعىن دامىتۋعا بارلىق جاعدايدى جاساپ كەلەمىز. ينۆەستورلارعا كورسەتىلگەن زور مۇمكىندىكتەردىڭ ارقاسىندا كوپتەگەن شەتەلدىك ءىرى كومپانيانىڭ ءبىرى ءوز كاسىپورىندارىن اشىپ جاتسا, ەندى ءبىرى زاۋىتتارىنىڭ قۇرىلىسىن باستاپ تا كەتتى. سونىڭ ىشىندە رەسەيلىك «لۋكويل» جانە «روللتون» زاۋىتتارى دا بار. ارىپتەستىك قارىم-قاتىناس ناتيجەسىندە بۇدان دا وزگە ءىرى كاسىپورىندار مەن زاۋىتتار سالىنادى دەپ سەنەمىن, – دەدى وبلىس اكىمى.
ايتا كەتەرلىك ءبىر جايت, ولەگ مىرزا وسى ءوڭىردىڭ تۋماسى بولىپ شىقتى. وسىدان التى جىل بۇرىن ارنايى ساپارمەن ءبىر كەلىپتى. سول كەزدە 90 جىلدارداعى كەيپىنەن ادام تانىماستاي جاڭا كەيىپ تاپقان تالدىقورعانعا ءبىر تاڭدانسا, بيىلعى ساپارىندا التى جىلدىڭ ىشىندەگى وزگەرىسكە ەكى تاڭدانىپ وتىرعانىن ايتۋمەن ءسوزىن باستاعان «ەۋرازيالىق ىسكەرلىك كەڭەس» كوممەرتسيالىق ەمەس سەرىكتەستىگىنىڭ ۇيلەستىرۋ كەڭەسىنىڭ توراعاسى:
– وسى كيەلى مەكەندە ومىرگە كەلگەندىكتەن, بۇل جەر ماعان وتە ىستىق. ءوڭىردىڭ بۇگىنگى كەلبەتىن بۇرىنعىمەن سالىستىرۋعا كەلمەيدى. ءبىرشاما يگى ىستەردىڭ اتقارىلعانى بىردەن بايقالىپ تۇر. ەندى الداعى ۋاقىتتا ىنتىماقتاستىقپەن حالىق يگىلىگى ءۇشىن قىزمەت ەتەتىن بولامىز. مەن توراعالىق ەتەتىن ۇيىم ەۋرازيا اۋماعىنداعى كاسىپورىندار مەن كومپانيالاردىڭ اراسىنداعى ساۋدا-ەكونوميكالىق ارىپتەستىككە نەگىزدەلگەندىكتەن, ارينە, سىزدەردىڭ شاقىرۋلارىڭىزدى بارىنشا ءتيىمدى پايدالانىپ, بارلىق مۇمكىندىكتى ءجىتى تارازىلايمىز. سول سەبەپتى بۇگىنگى كەزدەسۋىمىز قوس تاراپقا دا ناتيجەلى بولاتىندىعىنا سەنىمدىمىن, – دەدى.
كەزدەسۋ سوڭى – كەلىسىم بولماعى شارت. ءوزارا جيناقى اڭگىمەدەن سوڭ قوس تاراپ ساۋدا-ەكونوميكالىق قاتىناستاردى دامىتۋعا ىقپالداسۋ جونىندەگى ىنتىماقتاستىق مەموراندۋمىنا قول قويدى.
ولەگ سوسكوۆەتستىڭ وبلىسقا ساپارى مۇنىمەن اياقتالعان جوق. وبلىستىق كاسىپكەرلەر پالاتاسى وكىلدەرىمەن كەزدەستى. وتىرىستا بىزدەگى شاعىن جانە ورتا بيزنەستىڭ اياق الىسىمەن تانىسىپ, بولاشاقتا ەكى ەل كاسىپكەرلەرى اراسىندا بەرىك ىنتىماقتاستىق ورناتۋ جايىندا ءسوز قوزعالدى.
الماس ءنۇسىپ,
«ەگەمەن قازاقستان»
الماتى وبلىسى