باسقوسۋ ءداستۇر بويىنشا قوس مەملەكەتتىڭ انۇرانىمەن اشىلدى جانە مەملەكەتتىك تۋلارى كوتەرىلدى.
باسقوسۋدىڭ رەسمي بولىگىندە قازاقستان تاراپىنان سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى ءسوز سويلەپ, بۇگىندە ەكى ەل اراسىندا سەنىمدى بايلانىس ورناعاندىعىن جەتكىزدى. «دوستىق پەن ءوزارا تۇسىنىستىككە نەگىزدەلگەن ىنتىماقتاستىعىمىز شيرەك عاسىر ىشىندە نىعايىپ, ءوزارا ءتيىمدى سيپاتقا يە بولدى. پارلامەنتارالىق ىنتىماقتاستىعىمىز بەلسەندى تۇردە دامۋدا. ەكى ەل اراسىنداعى دوستىق جانە تۋىستىق قارىم-قاتىناستار قازاقستانداعى گرەك دياسپوراسى جانە گرەكياداعى ءبىزدىڭ ازاماتتارىمىز ارقىلى نىعايا تۇسۋدە», دەدى ول. م.تىلەۋبەردىنىڭ ايتۋىنشا, گرەكيا «جاسىل» ەكونوميكانى دامىتۋعا ەلەۋلى ۇلەس قوسىپ كەلە جاتقان مەملەكەتتەردىڭ ءبىرى. بۇعان ەكسپو-2017 كورمەسىندەگى گرەكيا پاۆيلونى دالەل.
«گرەكيا ۇكىمەتى قورشاعان ورتانى قورعاۋعا بارىنشا كۇش سالىپ, ەنەرگيانىڭ بالامالى كوزدەرىن قولدانۋعا كوڭىل بولۋدە. ەل پاۆيلونى ينتەراكتيۆتى جانە كرەاتيۆتى ەكسپوزيتسيالار ارقىلى كورەرمەنگە عىلىمي-تەحنيكالىق پروگرەستىڭ وزىق ۇلگىلەرىن, قوعام مەن ازاماتتار يگىلىگى ءۇشىن ءتيىمدى قولدانىلۋىن ءارى گرەكيا تابيعاتىنىڭ اسەمدىگىن تاماشالاۋعا مۇمكىندىك بەرەدى. «اۋاداعى ەنەرگيا» اتتى پاۆيلون گرەكياعا ءتان تابيعات پەن لاندشافت ەرەكشەلىكتەرىن سيپاتتايدى», دەدى ءمينيستردىڭ ءبىرىنشى ورىنباسارى.
گرەكيانىڭ ەكونوميكا جانە دامۋ ءمينيسترى ديميتريس پاپاديميتريۋ قوس ەل اراسىنداعى بايلانىسقا 25 جىل تولعاندىعىن ايتىپ, ەلىمىزدىڭ حالىقارالىق ماسەلەلەردى شەشۋدە بەلسەندى ءرول اتقارىپ جۇرگەندىگىن العا تارتتى. «سوڭعى شيرەك عاسىردا قازاقستانمەن قارىم-قاتىناسىمىز تۇراقتى دامىپ كەلەدى. بۇگىندە بۇل ەل XXI عاسىردىڭ ءبىرىنشى ون جىلدىعىندا ەكونوميكالىق الەۋەتى جوعارى 25 ەلدىڭ قاتارىنا كىردى. سونىمەن قاتار, قازاقستان الەمدىك قوعامداستىقتىڭ اجىراماس ءبىر بولىگى جانە بىرقاتار حالىقارالىق پروبلەمالاردىڭ شەشىمدەرىن تابۋعا بەلسەندى قاتىستى. قازاق ەلى كومىرسۋتەگىن وندىرەتىن جەتەكشى مەملەكەت رەتىندە گرەكيا ينۆەستورلارىنىڭ قىزىعۋشىلىعىن تۋدىرۋدا», دەدى ول.
د.پاپاديميتريۋ گرەكيانىڭ بەس جىلعا سوزىلعان اۋىر داعدارىسقا ۇشىراعاندىعىن اڭگىمەلەپ, ەلىنىڭ بۇل قيىندىقتى ەڭسەرگەنىن قۋانىشپەن جەتكىزدى. «سوڭعى جىلدارى گرەكيانىڭ بۇرىن بولىپ كورمەگەن ەكونوميكالىق داعدارىسقا ۇشىراعانى ءارى ونىڭ ەۋروپا مەن حالىقارالىق ەكونوميكاعا اسەرىن تيگىزگەنى ءمالىم. ەل بانكروتقا ۇشىراپ, ەۋروايماقتان شىعىپ قالۋىنىڭ دا ايتارلىقتاي قاۋپى بولدى. بۇل ەۋروپالىق ينتەگراتسيا جونىندەگى كۇش-جىگەرگە ەلەۋلى زالال كەلتىرەتىن ەدى. 2009-2013 جىلدارداعى كەزەڭ ىشىندە اۋىر تيگەن بەسجىلدىق قۇلدىراۋدان كەيىن ەكونوميكا 3 جىل بويى تۇراقتىلىق كەزەڭىن باسىنان وتكەردى. ودان كەيىن ەكونوميكا قالپىنا كەلىپ, بيىل مەملەكەت داعدارىستان ءبىرجولا شىقتى. بارلىق سىناقتاردان كەيىن سەرىكتەستەرىمىزدىڭ قولداۋىمەن ەلىمىزدىڭ دامۋعا دەگەن تالپىنىسى ويداعىداي جۇزەگە اسادى دەپ سەنەمىز. ءبىز ەۋروپانى, تاياۋ شىعىستى جانە ازيانى جالعايتىن ەنەرگەتيكالىق, ترانزيتتىك ورتالىققا اينالعىمىز كەلەدى», دەدى مينيستر.
بۇگىندە گرەكيادا قايتا قالپىنا كەلەتىن قۋات كوزى 15 پايىز شاماسىندا. ولار 2020 جىلى بۇل كورسەتكىشتى 20 پايىزعا جەتكىزبەك. بالقان تۇبەگىندە ورنالاسقان ەل ەنەرگيانىڭ باسىم بولىگىن جەلدەن الادى.