وسى ماقساتتا استانامىزدا جىل سايىن ءارتۇرلى سپورتتىق الاڭدار سالىنىپ, تۇرعىندار يگىلىگىنە بەرىلۋدە. سونىمەن قاتار, سالاماتتى ءومىر سالتىن ناسيحاتتاۋ ماقساتىندا, جاستاردى سپورتقا باۋلۋ ءۇشىن ەلوردادا كوپشىلىككە ارنالعان سايىستار مەن سپورتتىق فەستيۆالدار ءجيى وتكىزىلىپ تۇرادى. بۇگىندە باس قالادا ەرەسەكتەرگە دە, بالالارعا دا سپورتپەن شۇعىلدانۋعا ارنالعان ءىرىلى-ۇساقتى 600-دەن استام سپورتتىق نىسان جۇمىس ىستەپ تۇر.
سونىڭ ءبىرى – «استانا» سپورت كەشەنى. بۇل سپورت نىسانى قالا تۇرعىندارىنا باسسەين مەن جاتتىعۋ زالىن ۇسىنادى. سونىمەن قاتار, بالالار سكالودروم, فۋتبول جانە باسكەتبول مەن ۆولەيبول ۇيىرمەلەرىنە جازىلىپ, ۇلكەندەر جاعى ويىن الاڭدارىن جالعا الىپ, جاتتىعۋلارىنا بولادى. سپورتتىق سەكتسيالاردان كيكبوكسينگ, كاراتە, بوكس جانە ت.ب. بار. ءبىر ايتا كەتەرلىگى, جاز ماۋسىمىندا «استانا» سپورت كەشەنى وقۋشىلار سەكىلدى جازعى دەمالىسقا شىعادى. سپورت كەشەنىنە جاز مەزگىلىندە تەك ۇلكەندەر مەن جالعا الۋشىلار عانا جاتتىعىپ, دەنەسىن شىنىقتىرادى.
سونىمەن قاتار, سپورت كەشەنىندە جاتتىعۋ مەن باسسەين زالى بار. بالالار ءۇشىن جاتتىعۋ زالىنا جازىلۋ ايىنا ورتا ەسەپپەن 4500 تەڭگە بولسا, ەرەسەكتەر ءۇشىن 8500 تەڭگە. سونىمەن قاتار, ءار ايدىڭ سوڭعى كۇنىندە زەينەتكەرلەر مەن ستۋدەنتتەر زالدا تەگىن جاتتىعا الادى. ءجۇزۋ باسسەينىندە بالالار توپپەن جاتتىقسا ايىنا 13000 تەڭگە, ال جەكەلەي جاتتىقسا 18000 تەڭگە تولەيدى. ۇلكەندەر ءۇشىن توپپەن جاتتىعۋ 18000 تەڭگە, جەكەلەي جاتتىعۋ ءۇشىن 20000 تەڭگە.
سپورت كەشەندەرى ءۇشىن ستاندارتتى بولىپ تابىلاتىن ءجۇزۋ, فيتنەس, دزيۋدو, ايكيدو, دجيۋ-دجيتسۋ, ءوزىن-ءوزى قورعاۋ سياقتى سپورت تۇرلەرىمەن «قازاقستان» سپورت سارايىندا اينالىسۋعا بولادى. «ارىس» بوكس كلۋبى سەكتسيالار تىزىمىندە ەرەكشە ورىن الادى. وندا توپتىق جانە جەكە دايىندىق جۇمىستارى جۇرگىزىلەدى. ءجۇزۋ ۇيىرمەسىنە ءبىر اي قاتىسۋ ءۇشىن مەكتەپ جاسىنداعى بالالار مەن ستۋدەنتتەرگە 5000 تەڭگە, ال ۇلكەندەرگە 10 000 تەڭگە كولەمىندە اقى بەلگىلەنگەن. بۇلشىق ەتىڭىزدى دامىتىپ, دەنەڭىزدىڭ سىمباتتى بولۋىن قالاساڭىز جانە ادەمى بەينەلەۋشى قوزعالىستار ۇيرەنگىڭىز كەلسە, فيتنەس ستۋدياسىنا جازىلۋعا بولادى. باعاسى – 7 مىڭ تەڭگە. بالالاردى بي توپتارىنا قابىلداۋ 4, 5 جاستان جۇرگىزىلەدى. بي ۇيىرمەسىنەن شىعىس, الەم حالىقتارىنىڭ, بالالار, كلۋبتىق بيلەر, ستريپ پلاستيكا, BreakDance, يوگا, شوۋ بالەت (سالتاناتتى كەشتەردە بيلەۋ) ءبيىن ۇيرەنە الادى. ايلىق باعاسى 10000 تەڭگە شاماسىندا. «قازاقستان» سپورت كەشەنى بۇگىنگى كۇنى استانانىڭ سپورتتىق جانە قوعامدىق ومىرىندە ماڭىزدى ءرول اتقارادى. سپورت كەشەنى 2002 جىلى ەلباسى نۇرسۇلتان نازارباەۆتىڭ قولداۋىمەن سالىنعانىن ايتا كەتكەن ءجون.
2011 جىلى پايدالانۋعا بەرىلگەن رەسپۋبليكالىق «سارىارقا» ۆەلوترەگى – ۆەلوشاباندوز شلەمى تۇرىندە جاسالعان, ەرەكشە سپورت عيماراتى, الەمدەگى ەڭ ۇزدىك سپورت كەشەندەرىنىڭ ءبىرى رەتىندە تانىلعان. ۆەلوترەكتىڭ ىشىنە جاتتىعۋ زالى, ترەك, مۇز سىرعاناعى, بوكس, گيمناستيكا, ويىن زالى جانە شاعىن فۋتبول الاڭدارى كىرەدى. جاتتىعۋ زالىنا 5 جاسقا دەيىنگى بالالارعا كىرۋ تەگىن. ال, مەكتەپ وقۋشىلارىنا, ستۋدەنتتەرگە جانە زەينەتكەرلەرگە ءبىر جولعى كەلۋگە 50 پايىز جەڭىلدىك قاراستىرىلعان.
«الاۋ» مۇز ايدىنى استانا تۇرعىندارى جاز مەزگىلىندە سپورتپەن شۇعىلدانۋ ءۇشىن ورتالىق اشقان. مۇز ايدىنى سارايى سپورت سۇيەر قاۋىمعا مىناداي قىزمەت تۇرلەرىن ۇسىنادى: كونكيمەن سىرعاناۋ (حوككەي الاڭى), روليكپەن سىرعاناۋ (400 مەترلىك كونكيمەن جۇگىرۋ جولى), باتۋت, ۇستەل تەننيسى, بادمينتون, بيليارد جانە شاعىن گولف. ءبىر كۇندىك تولىق بيلەتتىڭ باعاسى – 1000 تەڭگە, ال, جەڭىلدىك بيلەتى – 500 تەڭگە. سونىمەن قاتار, 7 جاسقا دەيىنگى بالالارعا, I جانە II توپ مۇگەدەكتەرى, كوپ بالالى وتباسىنان شىققان, كامەلەتكە تولماعان بالالار جانە بالالار ۇيلەرىنىڭ تاربيەلەنۋشىلەرىنە كەشەنگە كىرۋ تەگىن. وقىتۋشىلار, ستۋدەنتتەرگە جەڭىلدىك بيلەتى قاراستىرىلعان.
قاجىمۇقان مۇڭايتپاسوۆ اتىنداعى ستاديوننىڭ ەسىگى جاز ماۋسىمىندا جەڭىل اتلەتيكا مەن فۋتبولعا اۋەس جاندارعا ءاردايىم اشىق. كەز كەلگەن قالا تۇرعىنى جەڭىل اتلەتيكا جانە فۋتبولمەن تەگىن اينالىسا الادى. ق.مۇڭايتپاسوۆ اتىنداعى ورتالىق ستاديوندا حالىقارالىق ستاندارتقا سايكەس (105ح68م) تابيعي كوگالدى فۋتبول الاڭى بار جانە ول 12250 ورىندى تريبۋنامەن جابدىقتالعان. فۋتبولدان باسقا, ستاديوندا 400 مەترلىك جۇگىرۋ جولى, ۇزىندىققا, بيىكتىككە سەكىرەتىن ارنايى ورىندار بار.
«الاتاۋ» سپورت كەشەنى قالا تۇرعىندارىنا وليمپيالىق باسسەين, جۇگىرۋ جولى, ەكى شاعىن فۋتبول الاڭى, ۆولەيبول الاڭى, بىرنەشە جەكپە-جەك سپورت تۇرلەرى, جاتتىعۋ زالىن جانە بىرقاتار بي ۇيىرمەلەرى قىزمەتىن ۇسىنادى.
سۋ سپورتى تۇرلەرىنە اۋەس جاندار ءجۇزۋ, سۋعا سەكىرۋ, اكادەميالىق ەسۋ, بايداركا مەن كانوە ەسۋ, جەلكەندى سپورتقا مامانداندىرىلعان «تولقىن» سپورت مەكتەبىنە جازىلا الادى.
«داۋلەت» سپورت كەشەنىندە ۇلكەن تەننيستەن دارىستەر جۇرگىزىلەدى. بۇگىندە ەلىمىزدەگى ەڭ ۇلكەن تەننيس ورتالىعىندا بالالار جەكەلەي جانە توپ بولىپ جاتتىعادى. بۇل جەردە تەننيستىڭ الىپپەسىن ۇيرەتۋدەن باستاپ, ءتۇرلى جارىستارعا دايىنداپ شىعارادى. سونداي-اق, قالا تۇرعىندارى قالاعان ۋاقىتىندا كورتتى جالعا الا الادى.
مىنە, ەلوردا تۇرعىندارى سپورتشىلار مەن حالىق يگىلىگى ءۇشىن سالىنعان سپورتتىق عيماراتتاردى ءوز يگىلىكتەرى ءۇشىن وسىلايشا پايدالانا الادى. سونداي-اق, قازىرگى تاڭدا استاناداعى ءار تۇرعىن ءۇي كەشەنىنىڭ اۋلاسىندا سپورت الاڭقايلارى بار. ەلوردادا سالاماتتى ءومىر سالتىن ۇستانامىن دەگەن جانعا بارلىق جاعداي جاسالعان, تەك وزىڭىزدە ىنتا مەن جىگەر بولسىن!
ءالي بيتورە, «ەگەمەن قازاقستان»