جەڭىل اتلەتيكادان ازيا چەمپيوناتى 6-9 شىلدە ارالىعىندا ءۇندىستاننىڭ بحۋبانەشۆار قالاسىندا وتكەن بولاتىن. وعان سارىقۇرلىقتىڭ 43 ەلىنەن 800-دەن استام سپورتشى قاتىسقان. قازاقستان ۇلتتىق قۇراماسى جالپى كوماندالىق ەسەپتە ءتورت التىن, ەكى كۇمىس, ەكى قولا مەدال يەلەنىپ, ءۇندىستان مەن قىتايدان كەيىنگى ءۇشىنشى ورىنعا يە بولدى.
«ەلىمىزدىڭ نامىسىن ازيا چەمپيوناتىندا ابىرويمەن قورعاپ, جۇلدەلى ورىنعا يە بولعان بارلىق سپورتشىلارعا فەدەراتسيا باسشىلىعىنىڭ اتىنان العىس بىلدىرەمىن. سپورتشىلارىمىز ازيا بىرىنشىلىگىنەن جالپى سانى سەگىز مەدالمەن ورالدى. ول ءبىز ءۇشىن ۇلكەن جەتىستىك. «سپورت پاديشاسى» اتانعان سپورتتىڭ بۇل تۇرىنە ەلباسىمىز ەرەكشە كوڭىل ءبولىپ, ءاردايىم قولداۋ كورسەتىپ كەلەدى. الداعى جارىستاردا دا سپورتشىلارىمىز جاقسى ناتيجەگە قول جەتكىزەدى دەپ ويلايمىن جانە بۇل ماراپاتىمىزدىڭ سوڭى بولماس دەگەن ۇمىتتەمىن», دەيدى فەدەراتسيا پرەزيدەنتى ادىلبەك جاقسىبەكوۆ.
100 جانە 200 مەترگە جۇگىرۋدەن ايەلدەر اراسىندا ەكى التىنعا قول جەتكىزگەن ۆيكتوريا زيابكينا مەن ءۇش قارعىپ سەكىرۋ سايىسىنان ازيا چەمپيونى اتانعان ماريا وۆچيننيكوۆاعا قارجىلاي بەس مىڭ اقش دوللارى, ودان بولەك قۇرامىندا سۆەتلانا گولەندوۆا, ريما كاشافۋتدينوۆا, ۆيكتوريا زيابكينا جانە ولگا سافرونوۆا بار 4ح100 مەترگە ەستافەتالىق جۇگىرۋدەن ايەلدەر قۇراماسىندا توپ جارعان ءاربىر اتلەتشى قىزعا 400 مىڭ تەڭگە كولەمىندە سىياقى بەرىلدى.
سونىمەن قاتار, 100 مەتردە كۇمىس, 200 مەتردە قولا مەدالعا يە بولعان ولگا سافرونوۆا 4,500, ءۇش قارعىپ سەكىرۋدەن كۇمىس جۇلدەگەر يرينا ەكتوۆا 3 مىڭ جانە ەرلەر اراسىنان يادرو لاقتىرۋدان قولا مەدالدى يەلەنگەن يۆان يۆانوۆ 1,500 اقش دوللارىمەن ماراپاتتالدى.
ماراپاتتاۋ راسىمىندە قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى ۇلتتىق قۇرامانىڭ باپكەرلەر قۇرامىن العىس ايتىپ, پرەزيدەنتتىڭ جەڭىل اتلەتيكا سپورتىنا باسا نازار اۋدارىپ جاتقانىن ايتتى. «ەڭ ءبىرىنشى باپكەرلەر قۇرامىنىڭ تاباندى ەڭبەگى مەن جەتكەن جەتىستىكتەرى ءۇشىن العىسىمدى بىلدىرگىم كەلەدى. ەلباسى «سپورت جانە دەنە شىنىقتىرۋ» زاڭىنا قول قويعان كەزدە بۇقارالىق سپورت پەن جەڭىل اتلەتيكاعا كوڭىل ءبولۋدى ءبىرىنشى ورىنعا قويۋ كەرەك دەپ ايتقان بولاتىن».
ءۇندىستاندا وتكەن جەڭىل اتلەتيكادان ازيا چەمپيوناتىنا العاش رەت قاتىسىپ, ءۇش قارعىپ سەكىرۋدەن چەمپيون اتانعان 18 جاستاعى قاراعاندىلىق سپورتشى ماريا وۆچيننيكوۆادان ماماندار جاس سپورتشىنىڭ بولاشاعىنان ۇلكەن ءۇمىت كۇتىپ وتىر. سونداي-اق, ماريا لوندوندا وتەتىن الەم چەمپيوناتىنا جولداما العان بولاتىن.
– ازيا چەمپيوناتىندا باسەكەلەستىك وتە جوعارى بولدى. دەگەنمەن, ارىپتەسىم يرينا ەكتوۆا ەكەۋمىز التىن مەن كۇمىس جۇلدەنى ءبولىپ العانىمىزعا قۋانىشتىمىن. الدا لوندوندا وتەتىن الەم چەمپيوناتى بار. مىقتىلاردىڭ باس قوساتىن دودادا ايانىپ قالمايمىن, - دەيدى ماريا وۆچيننيكوۆا.
ماراپاتتاۋ ءراسىمىنىڭ سوڭىندا ادىلبەك جاقسىبەكوۆ بارلىق سپورتشى مەن باپكەرلەرگە الداعى جارىستارعا ساتتىلىك تىلەدى. الداعى ۋاقىتتا جەڭىل اتلەتتەرىمىز لوندوندا وتەتىن الەم چەمپيوناتىنا, تايپەيدە وتەتىن جازعى ۋنيۆەرسيادا مەن اشحابادتا وتەتىن جابىق الاڭداعى ازيا چەمپيوناتىنا قاتىسادى.
ءالي بيتورە
«ەگەمەن قازاقستان»