پرەزيدەنت تاپسىرماسىنا سايكەس, «كوكبورى كەرنەي بابا» قايىرىمدىلىق قورى شاراپاتتى شارالاردى قولعا الا باستادى.
الدىمەن, اۋىلدىڭ كەرنەي اتىنا از-كەم توقتالا كەتەيىك. وسى اۋىل كەشەگى مالدى اتا كەرنەيدىڭ ەرەۋىلدەيتىن جەرى بولعان. كەرنەي تاۋىنىڭ باۋرايىندا ورنالاسقان اۋىلدىڭ كەرنەي وزەنى دە ءالى ارناسىنان اۋا قويماپتى. جەرگىلىكتى تۇرعىندار وسىنداعى قاسيەتتى اتانىڭ اۋليەبۇلاعىن كادىمگىدەي ماپەلەپ وتىر. كەڭەستىك زاماننىڭ جايى بەلگىلى. اۋىل اتاۋى كوپەكورىنەۋ بۇرمالانىپ كەتە بارعان. كورنەەۆكا بولىپ...
بۇگىندە باتىر بابانىڭ ۇلاعاتتى ۇرپاقتارى اۋىلدىڭ ءتۇپ اتاۋىن قايتارىپ, «كوكبورى كەرنەي بابا» قوعامدىق قورىن اشىپ, تۇرعىلىقتى حالىقپەن بايلانىسىن ۇزبەيدى.
ەرتە كوكتەمدە قولى اشىق ازاماتتار كەرنەي دەۆيانتتى ارنايى مەكتەبىندە بولىپ, مۋزىكالىق ورتالىق, كىر جۋ ماشيناسى, شاڭسورعىش, باسقا دا بالالارعا قاجەتتى زاتتاردى سىيلاپ, تاربيەسى قيىن بالالارمەن ەكىجاقتى قاتىناس ورناتقان ەدى.
ال كەشەگى وتكەن استانا كۇنى قارساڭىندا قور تاعى دا قوماقتى قارجى جۇمساپ, اۋىل ىرگەسىنەن ساياباق سالىپ شىقتى.
بۇل جەردە مۇنداي ىستەرگە مۇرىندىق بولىپ جۇرەتىن بىرنەشە ازاماتتىڭ ەسىمدەرىن اتاپ كەتۋگە بولادى. باقي ءابسامات, ماقسۇتقان تەرميز ۇلى سىندى ابىز قاريالار اۋىلدىڭ اۋىزبىرشىلىگىن بارىنەن دە جوعارى قويادى. بۇعان دەيىن كوپشىلىكتىڭ قولداۋىمەن مەشىت سالىندى. ماقسۇتقان اعامىز تۋعان ولكە شەجىرەسىمەن اينالىسىپ, ەكى كىتاپ جازىپ تاستاعان. اققۇلا ەڭبەكتىڭ جانە ءبىرى – اۋىل اكىمى تولەگەن ىرگەباەۆقا تيەسىلى. اۋداندا باسشى قىزمەتتە بولعان تولەگەن وسى اۋىلعا ءوزى سۇرانىپ كەلىپ, اپكەسى, جوعارىداعى قوردىڭ اتقارۋشى ديرەكتورى ميرا اتامالقىزىمەن بىرىگىپ, اۋىل تورىنەن ويىپ تۇرىپ كەرنەي ساياباعىن سالۋدى قولعا الادى. جانە ول باقتى بيىل, كەلەر جىلى دەپ سوزباقتاماي استانا كۇنىندە قولدانۋعا بەرۋدى ويلاستىرعان.
ساياباقتىڭ تۇساۋكەسەر سالتاناتىنا اۋداندىق ءماسليحاتتىڭ حاتشىسى اسحات ءالي قاتىسىپ, قور مۇشەلەرىنە اۋدان اكىمى ش. مامالينوۆتىڭ العىس حاتىن تاپسىردى.
وسى اۋىلدان وبلىستىق ماسليحاتقا دەپۋتات بولىپ سايلانعان ەركىن احمەتوۆ تە بۇل ىستەن سىرت قالمايتىنىن جەتكىزدى. ءوزىنىڭ جەكە شارۋاشىلىعى بار ەركىن قاشاندا كومەك قولىن ۇسىنىپ جۇرەدى.
– ەلباسىمىزدىڭ ءوزى قولداپ وتىرعان جوبا عوي بۇل. سىرتتان كومەك كۇتپەي ءوزىمىزدىڭ ارەكەتتەنىپ جاتقانىمىز قۋانتادى. بۇل باقتىڭ ايتەۋىر, ءبىر سالىناتىنى ايداي انىق. وعان مەملەكەت قارجىسى جەتەدى. الايدا, ونى كۇتىپ وتىراتىن ۋاقىت قايدا؟ ولاي بولسا قولدا بار مۇمكىندىكتى بارىنشا وسىلايشا پايدالانۋىمىز كەرەك, – دەيدى ەركىن قاباي ۇلى, – بۇگىن بولماعانىمەن مەن دە بۇل باقتا قولىمنىڭ تاڭباسىن قالدىرامىن.
وسى ءوڭىردىڭ تاعى ءبىر حالىق قالاۋلىسى ەۆگەني الپەيىسوۆ تە ەركىننىڭ ءسوزىن قولداپ, قۋاتتاپ جاتتى.
ميراس اسان, «ەگەمەن قازاقستان»
قاراعاندى وبلىسى, بۇقار جىراۋ اۋدانى