ماسەلەن 2016 جىلى وڭىرلىك جالپى ءونىم 2,6 پايىز نەمەسە 10,3 ترلن تەڭگە بولسا, بيىل 6 اي ىشىندە ەكونوميكانىڭ بارلىق سالالارىندا ءوسىم بارى بايقالادى: بولشەك ساۋدا 6,8 پايىزعا, كوتەرمە ساۋدا 0,7 پايىزعا, ونەركاسىپ 4,7 پايىزعا, قۇرىلىس 0,7 پايىزعا, بايلانىس 4,9 پايىزعا, اۋىلشارۋاشىلىعى 62,8 پايىزعا ارتقان. تۇرعىن ءۇي سالۋ 15,6 پايىزعا, ينۆەستيتسيا كولەمى 235,7 ملرد تەڭگەگە ءوسىپ, 12,2 پايىزعا ۇلعايعان. قالا بويىنشا ينفلياتسيا كورسەتكىشى 3,6 پايىز, رەسپۋبليكادا 3,7 پايىزعا جەتكەن.
قالادا جۇمىس ىستەيتىن شاعىن جانە ورتا بيزنەستىڭ سۋبەكتىلەر سانى 171,5 مىڭ جانە ولاردىڭ قاتارى وتكەن جىلمەن سالىستىرعاندا 5 پايىزعا وسكەن. قالادا سالىق ءتۇسىمى دە مولايعان. رەسپۋبليكالىق بيۋدجەتكە 645,2 ملرد. تەڭگە تۇسكەن, بۇل وتكەن جىلدىڭ وسى كەزەڭىمەن سالىستىرعاندا 9 پايىزعا (51,1 ملرد. تەڭگە) كوپ. جەرگىلىكتى بيۋدجەتكە 184,2 ملرد. تەڭگە سالىق قۇيىلعان, 9 پايىزعا (15,2 ملرد. تەڭگە) كوپ. تۇراقتىلىق جاعدايىندا قالادا جىل اياعىنا دەيىن ءوسىم دەڭگەيىنىڭ ارتادى دەپ كۇتىلۋدە.
جالپى, 2017 جىلعى قالا بيۋدجەتى 542,4 ملرد تەڭگەنى قۇرايدى. وتكەن جىلى ۇنەمدەۋدىڭ ارقاسىندا جەرگىلىكتى بيۋدجەت 33 ملرد تەڭگەگە نەمەسە 50 پايىزعا ارتتى. وتكەن جىلمەن سالىستىرعاندا جولداردى جوندەۋ مەن قۇرىلىس سالۋعا 2,8 ەسە, ال ينجەنەرلىك جەلىلەرگە 1,9 ەسە, اباتتاندىرۋعا 2,7 ەسە كوپ اقشا بولىنگەن.
ايناش ەسالي,
«ەگەمەن قازاقستان».
الماتى