ونىڭ ايتۋىنشا, قازاقستان بۇل جوباعا دەمەۋشىلىك بىلدىرەدى, ال گەرمانيالىق ارىپتەستەر وزدەرىنىڭ مول تاجىريبەسىمەن بولىسەتىن بولادى.
ء«بىز بۇگىن ەۋروپاداعى ەڭ كونە تەحنيكالىق ۋنيۆەرسيتەتتەردىڭ ءبىرى - ميۋنحەن تەحنيكالىق ۋنيۆەرسيتەتىمەن كەلىسىمگە قول قويامىز. بۇل قازاقستان مەن گەرمانيا اراسىنداعى بىرلەسكەن يننوۆاتسيالىق ورتالىق قۇرۋ تۋرالى كەلىسىم بولماق. مۇندا ءبىز دەمەۋشى تاراپ رەتىندە قاتىسىپ وتىرمىز. ءبىز ءۇشىن پرەزيدەنت جولداۋى اياسىنداعى «يندۋستريا 4.0» بويىنشا ادامي كاپيتال باستى فاكتور بولىپ سانالادى. بۇل كەلىسىم بىزگە «يندۋستريا 4.0» پروتسەسىن جۇزەگە اسىرۋ ءۇشىن بىلىكتى كادرلار دايىنداۋعا مۇمكىندىك بەرەدى, بۇل اتالعان باعىتتاعى العاشقى قادام», - دەدى ول.
ونىڭ ايتۋىنشا, جاڭا ورتالىقتا جوعارى وقۋ ورىندارىنىڭ, اتاپ ايتقاندا نازارباەۆ ۋنيۆەرسيتەتى مەن قازاق-بريتان تەحنيكالىق ۋنيۆەرسيتەتىنىڭ قىزمەتكەرلەرى وقيدى. سونىمەن بىرگە, وماروۆ جوبانىڭ العاشقى 5 جىلىنىڭ بيۋدجەت كولەمى شامامەن 15 ميلليون دوللاردى قۇرايتىنىن حابارلادى.
«بۇل الاڭدا قوسارلى وقىتۋ ءتاسىلى قولدانىلادى, ياعني وقۋ جانە تاجىريبە جيناقتاۋ مۇمكىندىكتەرى بەرىلەدى. ازىرگە بىرلەسكەن يننوۆاتسيالىق ورتالىق قۇرۋدى عانا تالقىلاپ جاتىرمىز. بىزدەن - قارجىلاندىرۋ, نەمىستەردەن - نوۋ-حاۋ, ءبىلىم, ءبىرىنشى ءبىلىم بەرۋ مودۋلدەرى, ترەنينگتەر, تاجىريبەلىك سەمينارلار جانە ت.ب. اتالعان جوبا اياسىندا كەلەسى جىلى 250 ادامدى قامتۋ جوسپاردا بار», - دەپ اتاپ ءوتتى وماروۆ.
سونداي-اق, تدۇا باسشىسى جاڭا ورتالىقتا ءبىلىم بەرەتىن ماماندىقتاردىڭ ءالى ناقتىلانباعانىن جەتكىزدى. ول ءبىلىم بەرۋدىڭ «يندۋستريا4.0» رەۆوليۋتسياسىنا نەگىزدەلەتىنىن جانە بۇل جوبانى ەلدى يندۋستريالاندىرۋ جولىنداعى العاشقى قادام دەپ اتادى.
«ازىرگە وقىتۋ تاقىرىپتارىنىڭ باسىم بولىگى تەحنيكالىق ەكەنىن عانا ايتا الامىن. ءبىز نەمىستەردەن «يندۋستريا 4.0» بويىنشا ناقتى ۇسىنىستار كۇتۋدەمىز. گەرمانيالىق ارىپتەستەر «يندۋستريا 4.0» بويىنشا قازاقستانعا ناقتى نە قاجەت ەكەنىن, قانداي ەلەمەنتتەردىڭ جەتىسپەيتىنى تۋرالى شولۋ جۇمىستارىن اياقتاپ قالدى. اتالعان رەپورت اياسىندا قازاقستانعا قاجەتتى ناقتى ماماندىقتاردى ىزدەيمىز.ازىرگە ماماندىقتار انىقتالعان جوق, سەبەبى ءبىز ءوزىمىزدى مۇنىمەن شەكتەپ قويعىمىز كەلمەيدى. تولىق ءتىزىمدى ازىرلەپ, مۇقيات زەرتتەۋ جۇرگىزگىمىز كەلەدى», - دەدى وماروۆ.
ايتا كەتەيىك, استانادا قازاقستان-گەرمانيا ىسكەرلىك كەڭەسىنىڭ ح وتىرىسى ءوتىپ جاتىر. ونىڭ اياسىندا ەكى ەل اراسىندا 22 كوممەرتسيالىق كەلىسىمگە قول قويىلاتىنى جوسپارلانۋدا.