مەملەكەتتىك قىزمەت كورسەتۋ ساپاسىن ارتتىرىپ, ازاماتتىق حال اكتىلەرىن تىركەۋدى وڭتايلاندىرۋ ماقساتىندا ەنگىزىلىپ وتىرعان جوبا «ازاماتتارعا ارنالعان ۇكىمەت» مەملەكەتتىك كورپوراتسياسى ارقىلى جۇزەگە اسىرىلادى. العاشقى بولىپ استانا قالاسى «حالىققا قىزمەت كورسەتۋ ورتالىعى» دەپارتامەنتىنىڭ ەسىل اۋداندىق №1 بولىمشەسى وسى جوبامەن جۇمىسىن باستادى. قاناتقاقتى جوبا شەڭبەرىندە تۋ تۋرالى كۋالىك پەن قايتىس بولعانى جونىندەگى انىقتاما ءۇش ساعاتتىڭ ىشىندە بەرىلەدى. بۇرىن وسى قۇجاتتى الۋ ءۇشىن ەكى كۇن كۇتۋگە تۋرا كەلەتىن. بيىلعى 5 شىلدەدەگى جاعداي بويىنشا جوبا اياسىندا 223 تۋ تۋرالى كۋالىك پەن 14 تۇلعاعا قايتىس بولعانى تۋرالى قۇجات بەرىلگەن. ەگەر قولعا الىنعان جوبا ساتىمەن جۇزەگە اسىرىلسا, وندا 15 تامىزدان باستاپ, استانانىڭ بارلىق بولىمشەسىندە قولدانىسقا ەنەتىن بولادى. مەملەكەتتىك قىزمەت كورسەتۋ دەڭگەيىن كوتەرىپ, ازاماتتاردىڭ ۋاقىتىن ۇنەمدەۋدى ماقسات ەتكەن ۆەدومستۆو وكىلدەرى جەرگىلىكتى اتقارۋشى ورگاندارىنا قاراستى ازاماتتىق حال-احۋال اكتىلەرىن تىركەۋ مەكەمەلەرىندە بىرىڭعاي قىزمەت قۇرىلىمى جوقتىعى قىزمەت كورسەتۋ ساپاسىنا دا كەرى اسەر ەتىپ وتىرعانىن العا تارتىپ, بۇل جوبا سول كەمشىلىكتىڭ ورنىن تولتىراتىنىن ايتادى. ەندى مينيسترلىكتەر حالىققا قىزمەت كورسەتۋدىڭ بىرىڭعاي ورتالىعى قاعيداتىمەن ەكىنشى قاناتقاقتى جوبانى ىسكە قوسپاقشى. بۇل جوباعا حالىققا قىزمەت كورسەتۋ ورتالىقتارى مەن ازاماتتىق حال اكتىلەرىن تىركەۋ بولىمشەلەرىنىڭ ءبارى تارتىلادى. بۇعان جەرگىلىكتى اتقارۋشى ورگاندار دا مۇددەلىلىك تانىتىپ وتىر. سوندىقتان بيىلعى شىلدە ايىنىڭ ەكىنشى ونكۇندىگىندە ەلىمىزدەگى بارلىق حقو جاڭا جوبا بويىنشا قۇجاتتاردى قابىلداي باستاماق.
قىمبات توقتامۇرات, «ەگەمەن قازاقستان»