قازاقستان رەسپۋبليكاسىنداعى تۇركيانىڭ توتەنشە جانە وكىلەتتى ەلشىسى نەۆزات ۋيانىك قازاقستاندىقتاردى ەلباسى نۇرسۇلتان نازارباەۆتىڭ تۋعان كۇنى جانە استانا كۇنىمەن قۇتتىقتادى. بۇل تۋرالى ەلشىلىكتىڭ فەيسبۋكتەگى رەسمي پاراقشاسىندا حابارلاندى.
«قۇرمەتتى قازاقستاندىقتار! استانا تۇرعىندارىن جانە بارلىق قازاقستاندىقتاردى تۇركى الەمىنىڭ اقساقالى - پرەزيدەنت نۇرسۇلتان نازارباەۆتىڭ تۋعان كۇنى جانە استانا كۇنىمەن شىن جۇرەكتەن قۇتتىقتايمىن. بيىل - ەكسپو-2017 حالىقارالىق كورمەسىنە بايلانىستى استانا ءۇشىن ەرەكشە جىل. ەكسپو كورمەسىندە تۇركيانىڭ پاۆيلونى ەڭ ۇلكەن جانە ادەمى پاۆيلونداردىڭ ءبىرى. ەكسپو عيماراتتارىنىڭ قۇرىلىسىنا قازاق باۋىرلارىمىزبەن بىرگە تۇرىك قۇرىلىسشىلارىنىڭ دا سىڭىرگەن ەڭبەگى وراسان زور. سونىمەن قاتار, بيىل ديپلوماتيالىق قارىم-قاتىناستارىمىزدىڭ ورناعانىنا 25 جىل تولدى. استانانىڭ كوركەيىپ, قازاقستاننىڭ حالىقارالىق ارەنادا ابىروي-بەدەلىنىڭ ارتا بەرۋىن تىلەيمىن. استانا كۇنى قۇتتى بولسىن!» دەلىنگەن ەلشىنىڭ قۇتتىقتاۋ سوزىندە.