ەلباسىنىڭ تاپسىرماسىنا بايلانىستى زەينەتاقىنىڭ كەزەڭ بويىنشا بىرتە-بىرتە كوتەرىلىپ كەلە جاتقانى قۋانتادى. بيىلعى قاڭتار ايىندا ىنتىماقتى زەينەتاقى 9 پايىزعا وسكەن بولسا, سونىمەن بىرگە, بازالىق زەينەتاقى مولشەرى دە 7 پايىزعا كوتەرىلگەن ەدى. ەندى 1 شىلدەدەن باستاپ تاعى 13 پايىزعا ءوستى. سونىمەن قازاقستاندىقتاردىڭ زەينەتاقى كولەمى قازىر 20 پايىزعا ارتىپ وتىر. قازىر رەسپۋبليكاداعى ەڭ تومەنگى زەينەتاقى – 45 711 تەڭگە. وتكەن جىلى بۇل كورسەتكىش 37 789 تەڭگە بولعان ەدى. ال 2018 جىلدىڭ 1 قاڭتارىندا ەڭ تومەنگى كۇنكورىس شەگى 16 پايىزعا ارتپاق. بۇل مۇگەدەكتىگى جانە اسىراۋشىسىنان ايىرىلعان جاعدايدا تولەنەتىن جاردەماقىلاردىڭ جانە بازالىق زەينەتاقى مولشەرىنىڭ وسۋىنە دە ىقپال ەتەتىن بولادى. قازاقستاندا زەينەتاقىنىڭ ورتاشا كولەمى جىل وتكەن سايىن ارتىپ كەلەدى. ماسەلەن, 2016 جىلى ونىڭ مولشەرى 55 117 تەڭگە بولعان ەدى, قازىر 66 676 تەڭگەگە جەتتى. ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنە قاراعاندا, زەينەتاقى كولەمى بىرتە-بىرتە وسە بەرەدى. 2018 جىلدىڭ 1 شىلدەسىندە زەينەتاقى تولەمدەرى 45 پايىزعا ارتىپ, ونىڭ ورتاشا مولشەرى 80 991 تەڭگەگە جەتەدى دەگەن بولجام بار. تاعى ءبىر جاعىمدى جاڭالىق – كەلەسى جىلدىڭ 1 شىلدەسىنەن باستاپ بازالىق زەينەتاقى تاعايىنداۋ ءادىسى تۇبەگەيلى وزگەرەتىن بولادى. جاڭا تاسىلگە ساي زەينەتاقى ءار ادامنىڭ وسى جۇيەگە قاتىسۋ وتىلىنە بايلانىستى تاعايىندالماق. ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتىنا قاراعاندا, 2018 جىلدىڭ 1 شىلدەسىنەن باستاپ ەلىمىزدە زەينەتاقىنىڭ ورتاشا مولشەرى بازالىق زەينەتاقىنى قوسا ەسەپتەگەندە ايتارلىقتاي وسەدى. بۇل كورسەتكىش 2016 جىلمەن سالىستىرعاندا 45 پايىزعا ارتادى دەگەن جوسپار بار. مەملەكەت انا مەن بالاعا دا ەرەكشە قامقورلىق جاساپ وتىر. وسى شىلدەدەن باستاپ بالا تۋىنا بايلانىستى بىرجولعى جاردەماقى مولشەرى 20 پايىزعا ۇلعايىپ, ءبىرىنشى, ەكىنشى جانە ءۇشىنشى بالاعا تولەنەتىن جاردەماقى 38 ايلىق ەسەپتىك كورسەتكىشكە نەمەسە 86 222 تەڭگەگە جەتتى.ال, ءتورتىنشى جانە ودان كەيىنگى بالالارعا بەرىلەتىن جاردەماقى 63 ايلىق ەسەپتىك كورسەتكىشتى نەمەسە 142 947 تەڭگەنى قۇراپ وتىر. الەۋمەتتىك سالادا حالىقتىڭ يگىلىگى ءۇشىن جاسالىپ جاتقان وسىنداي وڭ وزگەرىستەر الداعى ۋاقىتتا دا جالعاسا بەرمەك. ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا, 2020 جىلعا قاراي زەينەتاقىمەن قامتاماسىز ەتۋدىڭ جاڭا ۇلگىسى تولىق قالىپتاسىپ بىتەدى, ودان ءارى ونى دامىتۋ عانا جۇزەگە اسادى. دەمەك, مەملەكەت زەينەتكەرلەرگە قامقورلىق جاساۋدى ەش ۋاقىتتا نازاردان تىس قالدىرمايدى دەگەن ءسوز. انالار مەن بالالارعا دا مەملەكەتتىڭ شاراپاتى مەن شاپاعاتى جالعاسا بەرەتىن بولادى. قازاقستاندا بالا تۋ سوڭعى جىلدارى 20 پايىزعا وسكەن ەكەن. 1 شىلدەدەن باستاپ كوبەيگەن جاردەماقى الداعى ۋاقىتتا ەلدىڭ دەموگرافياسىنا دا وڭ اسەر ەتەدى دەگەن ءۇمىت بار.
عالىم ومارحان, «ەگەمەن قازاقستان»