كەزدەسۋدە سۋ رەسۋرستارىن دامىتۋ جانە اۋىلدىق جەرلەردىڭ تۇرعىندارىن اۋىز سۋمەن قامتاماسىز ەتۋ ماسەلەلەرى تالقىلاندى. مەملەكەت باسشىسى استانانى جانە وزگە دە وڭىرلەردى سۋ دەڭگەيىنىڭ كوتەرىلۋى مەن سۋ تاسقىنىنان قاۋىپسىز ەتۋگە مۇمكىندىك بەرەتىن جوبالاردى ىسكە اسىرۋدىڭ ماڭىزدىلىعىن ەرەكشە اتاپ ءوتتى. – سۋدىڭ كوپتىگى سۋ دەڭگەيىنىڭ كوتەرىلۋ قاۋپىن تۋدىرادى. ءبىر جاعىنان, ونى ۇتىمدى, اسىرەسە اۋىل شارۋاشىلىعىندا پايدالانۋعا بولادى. وسىعان وراي ءار ەلدى مەكەندە شاعىن سۋ قويمالارىن سالۋدى قامتاماسىز ەتۋ قاجەت, – دەدى نۇرسۇلتان نازارباەۆ. قازاقستان پرەزيدەنتىنە بوگەتتەردىڭ قازىرگى جاعدايى جانە سۋ دەڭگەيىنىڭ كوتەرىلۋى مەن سۋ تاسقىنى بولۋى مۇمكىن وڭىرلەردە جاڭا سۋ قويمالارىن سالۋ پەرسپەكتيۆالارى جونىندە مالىمەت بەرىلدى. سونداي-اق, ەلباسى استانا ماڭىنداعى سۋ قويمالارى مەن كولدەردىڭ تۋريستىك الەۋەتىن ارتتىرۋ قاجەتتىگىن ايتتى. – كەڭبيدايىق سۋ قويماسى قالاعا جاقىن ورنالاسقان. بۇل جەر ەلوردا تۇرعىندارى دەمالاتىن ورىنداردىڭ بىرىنە اينالۋى ءتيىس. وندا جاعاجاي جاساپ, دەمالىس ورىندارىن سالۋ كەرەك, – دەدى مەملەكەت باسشىسى. كەزدەسۋ سوڭىندا نۇرسۇلتان نازارباەۆ بىرقاتار ناقتى تاپسىرما بەردى.
ەلباسى نۇرسۇلتان نازارباەۆ اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ توراعاسى يسلام ابىشەۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.