«ەگەمەن قازاقستان» گازەتىنىڭ ءفوتوتىلشىسى ەرلان وماروۆ «ۇزدىك فوتوسۋرەت» اتالىمى بويىنشا «ۇركەر-2017» ءبىرىنشى ۇلتتىق سىيلىعىنا يە بولدى. بۇل اتالىم بويىنشا روجين ماكسيم, سارسەنبەك قىزايبەك ۇلى, تۇرار قازانعاپوۆ پەن گەرارد ستاۆريانيدي دە ۇمىتكەرلەر قاتارىندا بولعان ەدى.
سالتاناتتى جيىندا ءسوز العان اقپارات جانە كوممۋنيكاتسيا ءمينيسترى داۋرەن اباەۆ اقپارات سالاسىنىڭ ۇزدىكتەرىن قۇتتىقتادى.
– قادىرمەندى ارىپتەستەر, اقپارات جانە بايلانىس كۇنىمەن شىن جۇرەكتەن قۇتتىقتاۋعا رۇقسات ەتىڭىزدەر. بۇگىن ماڭىزدى كۇن, ماڭىزدى مەرەكە. «بۇقارالىق اقپارات قۇرالدارى تۋرالى» زاڭ جوباسىن تالقىلاۋ كەزىندە جۋرناليستەر مارتەبەسى تۋرالى ۇنەمى ايتىلىپ كەلەدى. بۇگىنگى ءوتىپ جاتقان ۇلتىق سىيلىق وسى باعىتتاعى قادامداردىڭ ءبىرى دەپ بىلەمىن, – دەدى داۋرەن اباەۆ.
جۇلدە 15 اتالىم بويىنشا تابىستالدى. جۇلدەگە ۇمىتكەرلەردى قازىلار القاسى تاڭدادى. قازىلار القاسى قاتارىندا ل.ن گۋميلەۆ اتىنداعى ەۇۋ جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى نامازالى وماشەۆ, مەملەكەتتىك جانە قوعام قايراتكەرى مىرزاتاي جولداسبەك, ەۇۋ جۋرناليستيكا جانە ساياساتتانۋ فاكۋلتەتىنىڭ دەكانى قايرات ساق, «قازاقستان-250» جالپىۇلتتىق قوزعالىسى كەڭەسىنىڭ توراعاسى مۇحتار مانكەەۆ, «نۇر وتان» پارتياسىنىڭ ساياسي تالداۋ جانە ستراتەگيالىق زەرتتەۋلەر ورتالىعىنىڭ ديرەكتورى يۋليا كۋچينسكايا, «قوعامدىق كەلىسىم» رمم ديرەكتورى الەكساندر تاراكوۆ, راسۋل جۇمالى, مۇرات ابەنوۆ, مەيرامحان جاپەك, امانگەلدى مىرزابەكوۆ بار.
ەستەرىڭىزگە سالا كەتسەك, «ۇركەر» تۇڭعىش ۇلتتىق سىيلىعى 15 نوميناتسيادان تۇرادى. ولار: «ۇزدىك ايماقتىق ءباسپاسوز باسىلىمى», «ۇزدىك راديوباعدارلاما», «ۇزدىك سالالىق ءباسپاسوز باسىلىم», «ۇزدىك جىل جۋرنالى», «ۇزدىك رەسپۋبليكالىق ءباسپاسوز باسىلىمى», «ۇزدىك رەپورتاج», «قازنەتتەگى مەدياسەرپىلىس», «ۇزدىك ايماقتىق راديوستانتسيا», «ۇزدىك جۋرناليستىك زەرتتەۋ», «ۇزدىك ينتەرۆيۋ», «قازاقستان تۋرالى ۇزدىك تانىمدىق ماتەريال», «ۇزدىك حالىقارالىق ساراپتامالىق ماتەريال», «جۋرناليستيكاداعى دەبيۋت», «ۇزدىك فوتوسۋرەت», «ۇزدىك ساراپتامالىق ماتەريال». كونكۋرسقا ءوتىنىش قابىلداۋ 2017 جىلدىڭ 7 مامىرىنان 10-ماۋسىم ارالىعىندا جۇرگىزىلگەن بولاتىن. بايقاۋعا 860-قا جۋىق باق وكىلى قاتىسۋعا نيەت تانىتقان.
ايا ءومىرتاي,
"ەگەمەن قازاقستان"