ەلباسىنا بيىلعى ءساۋىر ايىندا استانا قالاسىن دامىتۋعا ارنالعان كەڭەستە بەرىلگەن تاپسىرمالاردىڭ ورىندالۋى تۋرالى ەسەپ بەرىلىپ, قالاداعى قۇقىقتىق ءتارتىپتى قامتاماسىز ەتۋگە جانە ينفراقۇرىلىمدى جاقسارتۋعا قاتىستى اتقارىلىپ جاتقان جۇمىستار جونىندە مالىمەت ۇسىنىلدى.ى
نۇرسۇلتان نازارباەۆ ەلوردا تۇرعىندارى سانىنىڭ ارتىپ كەلە جاتقانىنا نازار اۋدارىپ, بالاباقشالارمەن جانە مەكتەپتەرمەن قامتاماسىز ەتۋ بويىنشا شارالار قابىلداۋ قاجەتتىگىن اتاپ ءوتتى.
- تۇرعىندار سانى ارتىپ كەلەدى. بۇل رەتتە, كوشى-قون ۇدەرىسىن ەرەكشە باقىلاۋعا الۋ قاجەت. ەلوردادا مەملەكەتتىك باعدارلامامەن تۇرعىن ءۇي بەرۋ جۇيەسىن جونگە كەلتىرۋ دە ماڭىزدى, - دەدى مەملەكەت باسشىسى.
استانا قالاسىنىڭ اكىمى قازاقستان پرەزيدەنتىنە ەلوردانى دامىتۋدىڭ بىرقاتار ەكونوميكالىق ينديكاتورلارى وسكەنىن ايتتى, سونداي-اق قالا تۇرعىندارىنىڭ ءومىر ءسۇرۋىنىڭ ورتاشا ۇزاقتىعى 75 جاسقا جەتكەنىن اتاپ ءوتىپ, الەۋمەتتىك سالا وڭ قارقىنمەن دامىپ كەلە جاتقانىنا توقتالدى.
ءا.يسەكەشەۆ ەلباسىعا انالار ءولىمى جانە وكپە اۋرۋى دەڭگەيىنىڭ تومەندەگەنىن ايتتى. سونىمەن بىرگە استانا قالاسىنىڭ اكىمى «تالدىكول» اعىن سۋ جيناقتاۋشىسى ورنالاسقان جەردىڭ قۇنارلىعىن قالپىنا كەلتىرۋ, جاۋىن سۋ اعاتىن كارىز جۇيەسىن جانە جول-كولىك ينفراقۇرىلىمدى جەتىلدىرۋ باعىتىندا قابىلدانعان شارالار جونىندە ەسەپ بەردى.
نۇرسۇلتان نازارباەۆ اتقارىلعان شارالاردىڭ ناتيجەلەرىن وڭ باعالاپ, ەلوردانى دامىتۋ جونىندەگى جۇمىستاردى جالعاستىرۋدى تاپسىردى.