جيىنعا قاتىسقان قازاق كۇرەسى فەدەراتسياسىنىڭ پرەزيدەنتى ارمان شوراەۆ, قر پارلامەنتى سەناتىنىڭ دەپۋتاتى دارحان قالەتاەۆ, «قازاقستان» رترك» اق باسقارما توراعاسى ەرلان قارين ءتۋرنيردىڭ جاڭالىقتارىمەن ءبولىسىپ, اتقارىلعان جۇمىستار تۋرالى بايانداپ بەردى.
وسى جىلدىڭ باستى وزگەرىسى رەتىندە جارىستىڭ وتكىزىلەتىن ورنىن ايتا كەتكەن ءجون. «قازاقستان بارىسى» ءتۋرنيرىنىڭ فينالدىق كەزەڭى بيىلدان باستاپ «سارىارقا» ۆەلوترەگىندە ەمەس, 2015 جىلى سالىنعان «بارىس ارەنا» مۇز سارايىندا وتەدى. ارمان شوراەۆتىڭ ايتۋىنشا, جانكۇيەرلەر «بارىس ارەنادان» بوز كىلەمدەگى باسەكەنى جاقىننان تاماشالاي الادى ەكەن.
«سارىارقا» ۆەلوترەگىنە ەشقانداي وكپەمىز جوق. قاي كەزدى الىپ قاراساق تا تۋرنير جوعارى دەڭگەيدە ءوتتى. ال, «بارىس ارەناعا» بيىلدان باستاپ اۋىسۋىمىزدىڭ باستى سەبەبى – بۇل سپورت سارايى كۇرەس سپورتى ءۇشىن وتە ءتيىمدى. ناقتىراق ايتقاندا, جانكۇيەرلەر ءۇشىن وتە ىڭعايلى», دەيدى ارمان تولەگەن ۇلى.
2017 جىلدىڭ تاعى ءبىر وزگەرىسى – فينالدىق باسەكەدە قىزمەت ەتەتىن تورەشىلەر. ولار جاڭا ەرەجەگە ساي, الدىن الا 200 000 تەڭگە جارنا تولەۋ كەرەك.
«بيىلعى تۋرنيرگە ەلىمىزدىڭ ءار ايماعىنان 12 تورەشىنى شاقىردىق. وداردىڭ تەك التاۋى عانا «قازاقستان بارىسىنىڭ» فينالىندا تورەلىك ەتەتىن بولادى. ەگەر تورەشىلەرىمىز ادىلدىك تانىتىپ, مىندەتىن دۇرىس ورىنداي السا, تۋرنير سوڭىندا وزدەرى تولەگەن جارنا ۇستىنەن تاعى دا قوسىمشا 350 000 تەڭگە سىياقى الاتىن بولادى. كەرىسىنشە جاعدايدا, تولەنگەن جارنا قايتارىلمايدى جانە قوسىمشا شارا دا قولداناتىن بولامىز», دەپ مالىمدەدى فەدەراتسيانىڭ باس حاتشى سارسەن قۇرانبەك.
سونىمەن قاتار, بولاشاقتا «قازاقستان بارىسى» ءتۋرنيرىنىڭ ىرىكتەۋ كەزەڭى رەيتينگ ارقىلى وتكىزىلۋى مۇمكىن. «سەبەبى, ەلىمىزدىڭ كەي وبلىستارىندا قازاق كۇرەسى دامىپ كەلە جاتسا, كەي وڭىرلەردىڭ دەڭگەيى تومەندەپ كەتكەن. ال دامىماعان ايماقتاردان جىل سايىن «قازاقستان بارىسىنا» قاتىسقانىمەن, ەشقانداي ناتيجە كورسەتىپ جاتقان جوق. سول ءۇشىن جاقسى ناتيجە كورسەتىپ جاتقان وبلىستىڭ بالۋاندار سانىن كوبەيتۋ ءۇشىن وڭىرلەردىڭ رەيتينگىنە قارايتىن بولامىز», دەپ اتاپ ءوتتى ا.شوراەۆ.
«قازاقستان» رترك» اق باسقارما توراعاسى ەرلان قارين «قازاقستان بارىسى» ءتۋرنيرىنىڭ تەلەترانسلياتسياسى گەننادي گولوۆكيننىڭ كورىلىمىنەن كوپ بولماسا, ودان كەم ەمەس دەيدى. «قازاقستان بارىسى» ءتۋرنيرىن قازاقستان اۋماعىنداعى ترانسلياتسيا رەيتينگىن گەننادي گولوۆكيننىڭ جەكپە-جەگىمەن سالىستىرۋعا بولادى. ءتىپتى, قارالىم سانى بويىنشا اسىپ ءتۇسۋى دە مۇمكىن», دەدى.
«قازاقستان بارىسى» ءتۋرنيرىنىڭ ءۇش دۇركىن چەمپيونى بەيبىت ىستىباەۆ بيىل جارىسقا قاتىسپايدى. ول كۇز مەزگىلىندە وتەتىن «الەم بارىسىنا» دايىندالۋدا. سوندىقتان, ۇيىمداستىرۋشىلار بيىلعى تۋرنيردە جاڭا ەسىمنىڭ شىعاتىنىنا سەنىمدى.
الداعى ءتۋرنيردىڭ جۇلدە قورى دا قوماقتى. جەڭىمپاز اتانعان بالۋانعا التىن بەلبەۋ جانە التىننان قۇيىلعان «تايتۇياق» تابىستالادى. ەكىنشى جانە ءۇشىنشى ورىنعا كۇمىس جانە قولا بەلبەۋ بەرىلەدى. سونىمەن قاتار, ءار بەلدەسۋدەگى جەڭىسكە 100 مىڭ تەڭگە قارجىلاي سىياقى تاعايىندالعان. ال, ءۇشىنشى ورىن يەلەنگەن بالۋانعا ءبىر ميلليون 800 مىڭ, باپكەرىنە 900 مىڭ تەڭگە. ەكىنشى ورىنعا بەس ميلليون 500 مىڭ, باپكەرىنە ءبىر ميلليون 800 مىڭ. ءبىرىنشى ورىن يەلەنگەن بالۋانعا 25 ميلليون, باپكەرىنە ءۇش ميلليون 500 مىڭ تەڭگە تابىستالادى.
ەسكە سالا كەتەيىك, بيىل جەتىنشى مارتە وتكەلى وتىرعان «قازاقستان بارىسى» رەسپۋبليكالىق ءتۋرنيرى 2 شىلدە كۇنى «بارىس ارەنا» سپورت سارايىندا استانا ۋاقىتىمەن ساعات 12:00-دە باستالادى. ونى «قازاقستان» جانە «قازسپورت» تەلەارنالارىنان بولەك, رەسەيلىك «ماتچ! پلانەتا», «بوەتس», «بوكس تۆ» جانە تۇركيانىڭ «ترت اۆاز» تەلەارنالارى تىكەلەي ەفيردە كورسەتەدى.
ءالي بيتورە,
«ەگەمەن قازاقستان»