بۇگىندە قىزىلوردا وبلىسىندا «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» جوباسىنىڭ (ساراتس-2) ەكىنشى كەزەڭىن جۇزەگە اسىرۋ جۇمىستارى جۇيەلى تۇردە اتقارىلۋدا. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆ قر پرەمەر-ءمينيسترى باقىتجان ساعىنتاەۆتىڭ جۇمىس ساپارى بارىسىندا ايماق ەكونوميكاسىن جاڭعىرتۋ ماسەلەلەرى بويىنشا وتكەن جيىندا مالىمدەدى.
- سىر ءوڭىرىنىڭ تۇرعىندارى ساراتس-1 جوباسىنىڭ ءبىرىنشى كەزەڭىن جۇزەگە اسىرعانى ءۇشىن مەملەكەت باسشىسىنا شىنايى ريزاشىلىعىن بىلدىرەدى. وسىنىڭ ناتيجەسىندە كىشى ارال ەكولوگياسىنىڭ جاقسارۋىمەن قاتار بالىق ونەركاسىبى قايتا تۇلەدى. بالىق شارۋاشىلىعى وبلىس ەكونوميكاسىنىڭ ماڭىزدى سالالارىنىڭ بىرىنە اينالىپ وتىر. سوڭعى 4 جىلدا ءبىزدىڭ ايماقتا بالىق ءوندىرۋ كولەمى 65 پايىزعى ارتىپ, بالىق ونىمدەرىنىڭ ەكسپورتى 3 ەسە ۇلعايدى. سونىمەن بىرگە ءبىزدىڭ كاسىپكەر ۋليانوۆ وبلىسىنىڭ ديميتروۆگراد قالاسىندا بالىق وڭدەۋ زاۋىتىن سالىپ, ارال بالىعى ەۋروازيالىق وداق نارىعىن يگەرۋدە, - دەدى وبلىس اكىمى ق.كوشەرباەۆ.
ونىڭ ايتۋىنشا, جوبانىڭ ەكىنشى كەزەڭى ارال ءوڭىرىن ودان ءارى قايتا تۇلەتۋدى, سۋدى پايدالانۋ تيىمدىلىگىن جاقسارتۋدى جانە سىرداريا وزەنىنىڭ تومەنگى اعىسىندا سۋ رەسۋرستارىن باسقارۋدىڭ تيىمدىلىگىن ارتتىرۋدى كوزدەيدى.