استانا قالاسىندا ادام قۇقىقتارى جونىندەگى ۋاكىل اسقار شاكىروۆ قازاقستانداعى نيدەرلاندى كورولدىگىنىڭ توتەنشە جانە وكىلەتتى ەلشىسى ديرك يان كوپپەن كەزدەستى.
كەزدەسۋ بارىسىندا ومبۋدسمەن سەرىكتەسىنە ەلدەگى كونستيتۋتسيالىق وزگەرىستەر اياسىندا جۇزەگە اسىرىلعان ۇلتتىق قۇقىق قورعاۋ مەكەمەسىنىڭ ءرولى جانە قىزمەتىنىڭ نەگىزگى باعىتتارى تۋرالى اقپاراتتاندىردى. سونداي-اق قازاقستاندا مەملەكەت باسشىسىنىڭ باستاماسىمەن وتكىزىلىپ جاتقان اۋقىمدى رەفورمالار تۋرالى قۇقىق قورعاۋ كوزقاراسى تۇرعىسىنان باياندالدى. ديپلومات قازاقستاندا وتكىزىلىپ جاتقان رەفورمالاردى جوعارى دارەجەدە باعالادى. ول وسى سالاداعى ۇلتتىق قۇقىق قورعاۋ تەتىكتەرىن جانە زاڭنامانى نىعايتۋدىڭ ماڭىزدىلىعىنا كوڭىل اۋدارىپ, ىنتىماقتاستىق كورسەتۋگە جانە قاجەتتى جاردەم بەرۋگە دايىندىعىن ءبىلدىردى.
تاراپتار قۇقىق قورعاۋ سالاسىنداعى پەرسپەكتيۆالىق ىنتىماقتاستىقتى كەڭەيتۋگە باعىتتالعان ديالوگتى ودان ءارى نىعايتۋعا مۇددەلى ەكەنىن راستادى.