استاناداعى اقتوبە وبلىسى كۇنىنە ورايلاستىرىلعان بۇل شاراعا ايماق باسشىسى بەردىبەك ساپارباەۆ, سىرتقى ىستەر ءمينيسترى قايرات ءابدىراحمانوۆ, ينۆەستيتسيالار جانە دامۋ, مادەنيەت جانە سپورت مينيسترلىكتەرىنىڭ, ۇلتتىق كومپانيالار مەن شەتەلدىك ۇيىمداردىڭ وكىلدەرى, سونداي-اق ديپلوماتيالىق ميسسيالاردىڭ باسشىلارى قاتىستى. اقتوبە وبلىسىنىڭ اكىمى ب.ساپارباەۆ قاتىسۋشىلاردى وڭىردەگى بولاشاعىنان زور ءۇمىت كۇتتىرەتىن ينۆەستيتسيالىق جوبالارمەن تانىستىردى. ولاردىڭ ىشىندە شالقار اۋدانىندا تەمىر كەندەرىن قايتا وڭدەۋ بويىنشا تاۋ-كەن مەتاللۋرگيالىق كەشەنى, تەمىر اۋدانىندا «اششىساي» تيتان-تسيركوني كەن ورنىن يگەرۋ جوباسى, اقتوبە قالاسىندا قۋاتتىلىعى 45-55 مۆت فەرروقورىتپا گازىمەن قالدىقتاردى قايتا وڭدەيتىن ەلەكتر ستانساسىن سالۋ, قارعالى اۋدانىندا بولات پەن شويىن تۇرىندەگى ونىمدەر شىعاراتىن تاۋ-كەن مەتاللۋرگيالىق كەشەنىنىڭ قۇرىلىسى, مارتوك اۋدانىندا اۋىل شارۋاشىلىعى تاۋارلارىنىڭ كولىك-لوگيستيكالىق ورتالىعى, العا اۋدانىندا جوعارى تەحنولوگيالىق جىلىجاي كەشەنىن سالۋ, قارعالى اۋدانىندا برويلەر وسىرۋمەن اينالىساتىن قۇس فابريكاسىنىڭ قۇرىلىسى, مارتوك اۋدانىندا 3000 باس ءمۇيىزدى ءىرى قاراعا ارنالعان جوعارى تەحنولوگيالىق بورداقىلاۋ كەشەنىن قۇرۋ, «Sheraton» قوناقۇي كەشەنى سەكىلدى ءىرى جوبالار بار. ايماق باسشىسى ب.ساپارباەۆ سىرتقى ىستەر ءمينيسترى ق.ابدىراحمانوۆقا, ەلشىلەرگە, ۇلتتىق كومپانيالار مەن شەتەلدىك ۇيىمداردىڭ وكىلدەرىنە وبلىستىڭ ينۆەستيتسيالىق جوبالارى ۇسىنىلعان كورمەگە ۋاقىت ءبولىپ كەلگەندەرى ءۇشىن العىسىن ايتتى. «قازاقستاننىڭ ۇستانعان ينۆەستيتسيالىق ساياساتىن بارلىعىڭىز جاقسى بىلەسىزدەر. جالپى, اقتوبەدەگى ينۆەستيتسيالىق احۋال دا سونداي. وسىندا وبلىسىمىزداعى ينۆەستيتسيالىق جوبالارمەن تانىستىڭىزدار. وڭىردە ينۆەستورلار ءۇشىن قانداي جاعداي جاسالاتىنىن بىلدىڭىزدەر. باستى ماقساتىمىز – وڭىردە ينۆەستورلاردىڭ قاۋىپسىز ءارى سەنىمدى جۇمىس ىستەۋىنە مۇمكىندىك جاساۋ. ءبىز ەلىمىزدىڭ نورماتيۆتىك-قۇقىقتىق اكتىلەرىن ەسكەرە وتىرىپ, وڭىردە ينۆەستورلار ءۇشىن بارلىق جاعدايدى جاسايمىز», دەدى وبلىس اكىمى. كورمە بارىسىندا اقتوبە وبلىسىنىڭ اكىمدىگى مەن «United Energies Aktobe» جشس اراسىندا «اقتوبە» يندۋستريالىق ايماعىندا جەل گەنەراتورلارىن وندىرەتىن زاۋىت سالۋ جونىندەگى مەموراندۋمعا قول قويۋ ءراسىمى بولىپ ءوتتى. قۇجاتقا ايماق باسشىسى بەردىبەك ساپارباەۆ پەن «United Energies Aktobe» جشس-ءنىڭ باس ديرەكتورى ميحاەل پاۋلس قول قويدى. جالپى قۇنى 84 ملن ەۋروعا باعالانعان جوبانىڭ جۇزەگە اسىرىلۋى وڭىردە 500 مىڭ جاڭا جۇمىس ورنىن اشۋعا مۇمكىندىك بەرەدى.
ايدار ورىسباەۆ, «ەگەمەن قازاقستان»