مەملەكەت باسشىسى شەتەلدىك ينۆەستورلار كەڭەسىنىڭ 30-پلەنارلىق وتىرىسىنا قاتىستى, دەپ حابارلايدى akorda.kz.
قازاقستان پرەزيدەنتى الەمدىك قوعامداستىق ەنەرگيانىڭ جاڭا كوزدەرىن بەلسەندى تۇردە ىزدەستىرىپ جاتقانىن ءارى تەحنولوگيالىق ىلگەرىلەۋ قارساڭىندا تۇرعانىن اتاپ ءوتتى.
– بيىل استانادا «ەكسپو-2017» كورمەسىن وتكىزۋدىڭ يدەولوگياسى مەملەكەتتەردىڭ تازا ەنەرگيانى دامىتۋعا باعىتتالعان كۇش-جىگەرىن توعىستىرۋعا نەگىزدەلگەن, – دەدى نۇرسۇلتان نازارباەۆ.
مەملەكەت باسشىسى ەنەرگيا ءوندىرۋدىڭ ارالاس جۇيەسى ەلىمىز ءۇشىن ەڭ قولايلى ەكەنىن ايتتى.
– بۇل جاڭارتىلاتىن ەنەرگەتيكانى قوسا دامىتا وتىرىپ, ءداستۇرلى قۋات كوزدەرىنەن ەنەرگيا ءوندىرۋ دەگەندى بىلدىرەدى. بىزدە جاڭارتىلاتىن ەنەرگيا كوزدەرىنىڭ الەۋەتى زور. جەل ەنەرگەتيكاسى جىلىنا 920 ميلليارد كيلوۆاتت/ساعات وندىرەدى دەپ باعالانادى. ەلىمىزدىڭ سۋ ەنەرگيا الەۋەتى 62 ميلليارد كيلوۆاتت/ساعاتتى قۇرايدى. كۇن ەنەرگياسىنىڭ الەۋەتى جىلىنا 2,5 ميلليارد كيلوۆاتت/ساعاتقا دەيىن جەتەدى, – دەدى قازاقستان پرەزيدەنتى.
سونىمەن قاتار, نۇرسۇلتان نازارباەۆ «استانا ەكسپو-2017» كورمەسىنىڭ بازاسىندا «بولاشاقتىڭ ەنەرگياسى» دەگەن اتاۋمەن «جاسىل» تەحنولوگيالار مەن ينۆەستيتسيالاردى دامىتۋ جونىندەگى حالىقارالىق ورتالىق قۇرىلاتىنىن اتاپ ءوتتى.
سونداي-اق, مەملەكەت باسشىسى بيزنەس احۋالىن جاقسارتۋ, «جاسىل» تەحنولوگيالارعا ارنالعان قاراجات جۇيەسىن, جەر قويناۋىندا سيرەك كەزدەسەتىن مەتالداردى قولدانۋ تەحنولوگياسىن, وزىندىك عىلىمي-تەحنيكالىق الەۋەتتى دامىتۋ جونىندەگى جۇمىستاردى جالعاستىرۋ قاجەتتىگىنە توقتالىپ, جاڭارتىلاتىن ەنەرگيا كوزدەرى سەكتورىن ودان ءارى قالىپتاستىرۋ ماسەلەسىنە نازار اۋداردى.
سوڭىندا قازاقستان پرەزيدەنتى كەڭەستىڭ كوپ جىلعى جۇمىسىن جوعارى باعالاپ, جيىنعا قاتىسۋشىلاردىڭ بارلىعىنا تابىس تىلەدى. سونىمەن قاتار, وتىرىستا ايتىلعان بارلىق ۇسىنىس ۇكىمەتتە قارالىپ, الداعى جۇمىس بارىسىندا ەسكەرىلەتىنىن ايتتى.