شىمكەنت قالاسىنداعى №3 بالالار ۇيىندە وتكەن شارانىڭ ماقساتى - اتا-انا قامقورلىعىنسىز قالعان بالالاردىڭ كوڭىلىن كوتەرىپ, وڭىرىمىزدەگى بارلىق قارجى ۇيىمدارىن قايىرىمدىلىقپەن اينالىسۋعا شاقىرۋ.
مەرەكەلىك شارا بارىسىندا انيماتورلار بالالارعا ارناپ ءتۇرلى مۋلتيپيكاتسيالىق تۋىندىلار قويىپ, كونتسەرتتىك ەستافەتا وتكىزدى. ءوز كەزەگىندە ءسوز العان «وڭتۇستىك» ايماقتىق ينۆەستيتسيالىق ورتالىعىنىڭ باسشىسى قۋانىش بايتورە بۇنداي شارالاردى تۇراقتى تۇردە وتكىزىپ تۇرۋعا ۋادە ەتتى.
ء«بىز بالالارعا كۇلكى سىيلاۋ ماقساتىندا قايىرىمدىلىق اكتسياسىن ۇيىمداستىردىق. ەندى باسقالار دا ۇلگى الىپ, بۇل ءداستۇردى جالعاستىرعانىن قالار ەدىك. سەبەبى بالالاردىڭ كوڭىلىن كوتەرۋ ءۇشىن ارنايى مەرەكە كۇتۋدىڭ قاجەتى جوق», - دەدى ورتالىق باسشىسى.
ۇجىمعا ءوزىنىڭ ريزاشىلىعىن جاۋدىرعان بالالار ءۇيىنىڭ مەڭگەرۋشىسى, بۇلدىرشىندەرگە مىندەتتى تۇردە سىيلىق الىپ كەلۋ مىندەتتى ەمەس, ولارعا سىزدەردىڭ كوڭىل بولۋلەرىڭىز ماڭىزدى, - دەپ, ەسىكتەرىنىڭ ارقاشان دا اشىق ەكەندىگىن ءبىلدىردى.
شارا سوڭىندا بالالارعا ارنايى سىيلىقتار تاراتىلدى. بالالار ءوز تىلەكتەرىن ايتىپ, اۋە شارلارىن اسپانعا ۇشىردى.
مۇنان سوڭ «وڭتۇستىك» ايو ۇجىمى بالالاردى 2 قاباتتى تۋريستىك اۆتوبۋسپەن شىمكەنت قالاسىنا سەرۋەنگە الىپ شىقتى. «قيال الەمىنەن» باستاۋ الىپ, بايدىبەك بي ەسكەرتكىشىندە اياقتالاتىن ەكى ساعاتتىق ساياحات بارىسىندا بالالار شىمكەنت قالاسىنىڭ ەڭ ادەمى, كورىكتى جەرلەرىن تاماشالادى. جول بويى ارنايى اۋديوگيد جۇمىس جاساپ, بالالاردى قالانىڭ تاريحي جانە بۇگىنگى ساۋلەتىمەن كەڭىنەن تانىستىردى.
وقو اكىمىنىڭ ءباسپاسوز قىزمەتى