«رومەو − دجۋلەتتا» − قوس عاشىقتىڭ قوسىلا الماعان, بايانسىز ماحابباتىن سۋرەتتەيتىن تۋىندى. ۋيلليام شەكسپيردىڭ كلاسسيكالىق تۇپنۇسقاسىن نەگىزگە الا وتىرىپ, فرانتسۋز كومپوزيتورى, اقىن جانە ءانشى جەرار پرەسگيۋرۆيك تۋىندىنى كورەرەمەنگە ولەڭمەن جەتكىزەدى.
ۆەروناداعى اۋقاتتى دا بەدەلدى مونتەككي جانە كاپۋلەتتي اۋلەتتەرىنىڭ ەجەلدەن جاۋلاسىپ كەلە جاتقاندىعى تۋرالى ايتىلادى. الايدا ەكى وتباسىنداعى قاپتاعان قاقتىعىستارعا قاراماستان, ماحابباتتىڭ قۇدىرەتىنە باعىنعان جاستاردىڭ ءبىر-بىرىنە دەگەن كىرشىكسىز سەزىمدەرى, اسقاق ارماندارى, بيىك ماقساتاتارى مەنمۇندالاپ تۇرادى. قىز بالاسىنىڭ ومىردەن ءوز ورنىن تاۋىپ, وتباسىن قۇرۋى اتا-انا ءۇشىن ۇلكەن باقىت ەكەنى ايدان انىق. وسى ورايدا اناسى دجۋلەتتانى ۆەرونا اقسۇيەكتەرىنىڭ ءبىرى رەتىندە قۇدا تۇسكەن پاريسكە ۇزاتۋدى ۇيعارادى. الايدا جۇرەككە ءامىر جۇرگەن بە؟ ءبىرىن-ءبىرى سۇيەتىن رومەو مەن دجۋلەتتا ءوز دەگەندەرىنەن باس تارتپاي, كىشكەنتاي شىركەۋدە لورەنتسو اكەيدىڭ رۇقساتىمەن جاسىرىن نەكەگە تۇرادى. ەكەۋىنىڭ كەسكىلەسكەنىن ەستىگەن دوستارى بەنۆوليو مەن مەركۋتسيو ودان اۋلەت ابىرويىن توگىپ, ساتقىندىق جاساعانىن جازعىرىپ, دجۋلەتتادان باس تارتۋىن وتىنەدى. الايدا ەسسىز عاشىق رومەو ەندىگى ءومىرى تەك سۇيگەن سۇلۋىنا ارنالاتىنىن جەتكىزەدى. بۇل قاۋەسەت تەك دوستارىنا عانا ەمەس, دۇشپاندارىنىڭ قۇلاعىنا دا جەتەدى. كوڭىلى دجۋلەتتاعا ىنتىق تيبالت رومەودان كەك الۋعا بەل بۋادى. ال دوسى مەركۋتسيو ونىڭ بۇل ارام پيعىلىن بولدىرماۋعا كومەككە كەلىپ, اجال قۇشادى. اجالمەن ايقاسقان رومەو قانجارعا جارماسىپ, تيبالتتى ءولتىرىپ تىنادى. وسى وقيعالاردىڭ تىزبەگىن ءسۇت اناسىنان ەستىگەن دجۋلەتتانىڭ بولەسى تيبالتتىڭ اجال قۇشقانىنا قاراماستان, تۋىسقانىن ولتىرگەن كۇيەۋىنە دەگەن ماحابباتى سۋىمايدى, قايتا ارتا تۇسەدى. وقيعانىڭ شارىقتاۋ شەگى دە بايانسىز ماحابباتتىڭ قۇربانىنا اينالعان, قوس عاشىقتىڭ قىرشىن تاعدىرى ارقاۋ ەتەدى. سۇيگەنىنە قوسىلا الماعان رومەو ۋ ءىشىپ كوز جۇمسا, ماحاببات پەن سۇيىسپەنشىلىككە ورىن تابا الماعان دجۋلەتتا ءوز-وزىنە قول جۇمسايدى. ء بىر قىزىعى, ءومىر مەن ءولىم ارپالىسقان ساتتەگى قوس عاشىقتىڭ قىر سوڭىنان قالماعان اجال بەينەسى ەكى جاستىڭ وزدەرىنە قول سالۋىنا كومەككە كەلگەندەي.
«جالپى, «رومەو-دجۋلەتتانىڭ» 25-كە تارتا ءتۇرى بار. قويىلىم قاتتى ۇنادى, كوڭىلىمنەن شىقتى دەپ ايتا الامىن. مەن كورگەن سپەكتاكلدەردىڭ ۇزدىگى دەسەم قاتەلەسپەيمىن. ماعان جاستاردىڭ ەنەرگياسى, ساحنادا ويناۋ شەبەرلىكتەرى ۇنادى», − دەيدى فرانتسۋزدىق كومپوزيتور, مۋزىكا مەن ليبرەتتو اۆتورى جەرار پرەسگيۋرۆيك.
سپەكتاكلدە 60 قا جۋىق اكتەرلاردىڭ بەلسەندى ويناۋى مەن ءوز رولدەرىن ءساتتى الىپ شىققاندىعىن, سونداي-اق, ساحنانىڭ بەزەندىرىلۋى, جارىقتىڭ تاڭ ساۋلەسىندەي جارقىراپ شۋاق شاشۋى كورەرمەننىڭ كوڭىلىنەن شىققانى ءسوزسىز.
ايتا كەتەيىك, رومەونى – سالامات مۇقاشەۆ, دجۋلەتتانى – جارقىناي شالقار, ءپاريستى – دانيار تۋرانوۆ, مەركۋتسيونى – امان گۋماروۆ, بەنۆوليونى – ورازالى يگىلىك, تيبالتتى – راسۋل ۋسمانوۆ, ءسۇت انا ءرولىن –اينۇر بەرمۇحامبەتوۆا, لەدي مونتەككيدى – ءلايلا تەمىرحان, لەدي كاپۋللەتتيدى - اينا ابدۋكاريموۆا, گراف كاپۋلەتيدى – دارىن شىنىبەك, لورەنتسو اكەيدى – بەرىك اتاحانوۆ, ۆەرونا حانزاداسىن – التىنبەك امانكۋلوۆ, اقىندى – سۇلتان كەڭشىلىك, تاعدىردى – اليا دجيرەنباەۆا ء ساتتى ورىنداپ شىقتى.
شىعارمانىڭ قويۋشى رەجيسسەرى − قازاقستاننىڭ ەڭبەك سىڭىرگەن قايراتكەرى اسحات ماەميروۆ, مۋزىكا جانە ليبرەتتو اۆتورى − جەرار پرەسگيۋرۆيك, اۋدارما جاساعان − گۇلنارا سالىقباي, قويۋشى سۋرەتشى − قانات ماقسۇتوۆ.
ايمان مۇقىشەۆا