اتالعان كىتاپ ەلىمىزدىڭ باس كارديوحيرۋرگى, ەلورداداعى «ۇلتتىق عىلىمي كارديوحيرۋرگيا ورتالىعى» اكتسيونەرلىك قوعامىنىڭ باسشىسى يۋري پيانىڭ جەتەكشىلىگىمەن جاسالعان جۇرەك الماستىرۋ وتاسىنىڭ 5 جىلدىعى قارساڭىندا «وگەي جۇرەك» دەگەن اتپەن باسىلىپ شىققان بولاتىن. ال, بۇل جولى عۇسمان تولەعۇلدىڭ اۋدارۋىمەن ورىس تىلىندە «فوليانت» باسپاسىنان جارىق كورىپ وتىر. كىتاپتىڭ دەمەۋشىلەرى – قازاقستانداعى كورەيلەر اسسوتساتسياسى مەن پارلامەنت ءماجىلىسىنىڭ ءبىر توپ دەپۋتاتتارى. بۇل تۋرالى كىتاپتىڭ تۇساۋكەسەرىن جۇرگىزگەن قازاقستان حالقى اسسامبلەياسىنىڭ جاۋاپتى قىزمەتكەرى ءنازيپا شاناي باياندادى. ال, ورىس تىلىندە جۇرتشىلىققا جول العان تۋىندىنىڭ تۇساۋىن پارلامەنت ءماجىلىسىنىڭ دەپۋتاتى باقىتجان ەرتاەۆ پەن «ۇلتتىق عىلىمي كارديوحيرۋرگيا ورتالىعى» اق باسقارما توراعاسى يۋري پيا كەستى.
جازۋشى ساۋلە دوسجانوۆانىڭ بۇل جيناعىنا ءۇش حيكايات پەن اڭگىمەلەرى ەنگىزىلگەن. كىتاپ اتىن يەلەنگەن «وگەي جۇرەك» حيكاياتى تۋرالى بىرەر ءسوز. 2012 جىلى ەلىمىزدە العاش رەت جۇرەك ترانسپلانتاتسياسى, ياعني, جۇرەك اۋىستىرىپ سالۋ وتاسى جاسالعانى بەلگىلى. 46 جاستاعى ۆوروتنيكوۆا گالينا ەسىمدى ايەل ينسۋلت الىپ, مي ولىمىمەن استانا اۋرۋحاناسىنا جەتكىزىلگەندە, دارىگەرلەر ونى ڭجۇرەگى مەن بۇيرەكتەرىنىڭ قالىپتى جۇمىس ىستەپ تۇرعانىن انىقتايدى. ول ورگانداردى سول كەزدە جۇرەك دەرتىنەن زارداپ شەگىپ جۇرگەن جانىبەك وسپانوۆ پەن بۇيرەك اۋرۋىنا شالدىققان ەۆگەني كۋرتسقا بەرۋ تۋرالى ۇسىنىس ايتىلىپ, وسى كۇردەلى ۇسىنىسقا مارقۇمنىڭ ۇلى 21 جاستاعى يگور كوپ ويلانعان سوڭ كەلىسىمىن بەرەدى. بۇل تۇڭعىش وتانى ايگىلى كارديوحۋرۋرگ يۋري پيا مەن ونىڭ ءبىرىنشى ورىنباسارى ماحاببات بەكبوسىناۆا جاسايدى. مىنە ايگىلى كارديوحيرۋرگكە ارنالىپ جازىلعان «وگەي جۇرەك» حيكاياتىنا وسى وقيعا ارقاۋ بولعان. حيكاياتتا نەگىزىنەن وزگەنىڭ جۇرەگىن يەلەنگەن جانىبەكتىڭ جان تولعانىسى مەن جاڭا ءومىرى حاقىندا سىر شەرتىلەدى.
«موە چۋجوە سەردتسە» كىتابىنىڭ تۇساۋكەسەرىنە جيىلعان كوپشىلىك وسىدان بەس جىل بۇرىن وتكەن وقيعاعا قايتا ءبىر اسەرلەندى. كىتابى ورىس تىلىندە جارىققا شىققان جازۋشىنى قۇتتىقتاپ, جىلى لەبىزدەرىن ءبىلدىردى.
ايگۇل سەيىلوۆا,
«ەگەمەن قازاقستان»