بۇگىن كورمەدەگى قىتاي پاۆيلونىندا بەيجىڭ قالاسىنىڭ اپتالىعى سالتاناتتى تۇردە اشىلدى. وعان بەيجىڭ قالاسى ۇكىمەتىنىڭ وكىلدەرى, ارنايى شاقىرىلعان قۇرمەتتى قوناقتار قاتىستى. استانا ەكسپو-2017 كورمەسىندەگى بەيجىڭ اپتالىعى بۇدان بۇرىنعى بۇكىلالەمدىك كورمەلەر, ياعني جاپونياداعى ايتي-2005, شانحاي ەكسپو-2010 جانە ميلان ەكسپو-2015 كورمەلەرىندەگى وتكىزىلگەن بەيجىڭ اپتالىعىنىڭ ءداستۇرلى جالعاسى ىسپەتتەس. ءسويتىپ, بەيجىڭ قالاسى ەكسپو كورمەسىنىڭ الاڭىن وزدەرىنىڭ وزىق باستامالارىن تانىستىراتىن ءتيىمدى ورتالىق رەتىندە پايدالانادى. بۇل جولى قالا اپتالىعىنىڭ تاقىرىپ ارقاۋى ء«بىر بەلدەۋ – ءبىر جول» عاسىرلىق جوباسىنىڭ اۋقىمىندا وتكىزىلمەك. ەكسپو-2017 كورمەسىندەگى اسپان استى ەلى استاناسىنىڭ اپتالىعى بەيجىڭ قالاسىنىڭ ونەر شەبەرلەرىنىڭ ايتۋلى كونتسەرتتەرىمەن ورنەكتەلىپ, كورمەگە كەلۋشى كورەرمەندەردى قىتاي ەلىنىڭ باي مادەنيەتىمەن قاۋىشتىرادى. قىتاي پاۆيلونىنداعى بەيجىڭ اپتالىعى كەزىندە بۇل ەلدەگى ءتۋريزمنىڭ دامۋ دەڭگەيىن ايقىندايتىن فوتو كورمە, حالىق مۋزىكاسىنىڭ بايقاۋى, ازىق-ت ۇلىك ونىمدەرى مەن بەيجىڭ اسحاناسىنىڭ ءتىل ۇيىرەر تاماقتارى كورسەتىلەتىن بولادى. ەكسپو كورمەسى اياسىندا بەيجىڭ اسحاناسىنىڭ مازىرىمەن تانىستىرۋ الەمنىڭ تۇكپىر-تۇكپىرىنەن وسىندا كەلەتىن تۋريستەرگە قىتاي اسحاناسىن كەڭىنەن ناسيحاتتاۋ بولىپ تابىلادى. ءۇش كۇن بويى قىتاي پاۆيلونىندا بەيجىڭ قالاسىنىڭ تاريحي جانە ساۋلەت ونەرىمەن تانىستىراتىن فيلمدەر كورسەتىلەتىن بولادى. سونىمەن بىرگە, قالا اپتالىعى بارىسىندا 2019 جىلى بەيجىڭ قالاسىندا وتەتىن باعبانداردىڭ بۇكىلالەمدىك جارمەڭكەسىنىڭ باعدارلاماسى كەڭىنەن تانىستىرىلادى. باعبانداردىڭ بۇكىلالەمدىك جارمەڭكەسىنىڭ تاقىرىبىن ايشىقتايتىن فوتو سۋرەتتەر قىتاي پاۆيلونىنىڭ ەكىنشى قاباتىنىڭ دالىزىندە كەڭىنەن كورىنىس تاپقان. اسپان استى ەلى استاناسىنىڭ ەكسپو-2017 كورمەسىندەگى اپتالىعى كەزىندە بەيجىڭ مۋنيتسيپالدىق ۇكىمەتى رەسەي, يتاليا جانە باسقا ەلدەردىڭ پاۆيلوندارىمەن بيزنەس وكىلدەرى كوپتەپ قاتىساتىن كەزدەسۋلەر وتكىزبەك.
جاھاندىق جاڭالىققا ىنتىققان الەم تۋريستەرىنىڭ ات باسىن تىرەيتىن ورتالىعىنا اينالعان ارۋ استانانىڭ اجارى ارايلانا ءتۇسىپتى. اسەم استانانىڭ ورتاسىنداعى بولاشاق قالاسى – ەكسپو-2017 حالىقارالىق مامانداندىرىلعان كورمەسىنىڭ قالاشىعى ارقا توسىنە اسىققان تورتكۇل دۇنيە تۋريستەرىن كىدىرىسسىز قابىلداپ, قايتالانباس قىزىقتارعا كەنەلتۋدە. ماۋسىمنىڭ 16 جۇلدىزىنداعى استانانىڭ ارايلى تاڭى داۋىلپاز ءۇنىن دۇبىرلەتكەن اسقاق اۋەنمەن ۇندەسە اتتى. ەكسپو قالاشىعىنداعى قىتاي پاۆيلونىنىڭ الدىندا شىمقاي قىزىل ۇلتتىق كيىمدەرىن كيگەن قىتايلىق ءبيشىلەر مەن بارابانشىلار كەلگەن قوناقتاردى رياسىز كوڭىلمەن قارسى الىپ جاتتى.