كونفەرەنتسيا بارىسىندا ولجاس ابىشەۆ «ەلەكتروندىق دەنساۋلىق ساقتاۋدى دامىتۋ» رەسپۋبليكالىق ورتالىعىنىڭ دۇنيەجۇزىلىك بانك, «قازاقتەلەكوم» اق جانە يۋنيسەف-پەن بىرىگىپ ازىرلەنگەن بىرنەشە جوبانى تانىستىردى. ولاردىڭ قاتارىندا بالا كۇتىمىنە جانە پاتروناجعا ارنالعان قوسىمشا دا بار.
«2017 جىلدىڭ سوڭىنا دەيىن پاتروناج مەيىربيكەلەرى مەن جاس اتا-انالاردىڭ كىشكەنتاي بالالارعا كۇتىم جاساۋىنا كومەكتەسۋگە ارنالعان ارنايى ءموبيلدى قوسىمشا ىسكە قوسىلادى. وسىعان ۇقساس قوسىمشالار ۇلىبريتانيا, اۆستريا, شىعىس ەۋروپا ەلدەرىندە پايدالانىلادى», دەدى ولجاس Əبىشەۆ. ونىڭ ايتۋىنشا, بيىل قاراشا ايىندا ىسكە قوسىلاتىن بۇل جوبا بالالار قورىمەن (يۋنيسەف) بىرلەسىپ ازىرلەنگەن.
جيىن بارىسىندا بەلگىلى بولعانداي, "پاتروناج مەيىربيكەسى" ءموبيلدى قوسىمشاسىن پايدالانۋ بالا تۋرالى دەرەكتەردى تولتىرۋ جۇمىستارىن جەڭىلدەتەدى. ياعني, مەيىربيكەلەر ءۇي جاعدايىندا بالاعا كوبىرەك كوڭىل بولەتىن بولادى. «بالا ەكى جاسقا تولعانشا اتا-انا ءۇي جاعدايىندا بالانى قاراتىپ, مەيىربيكە سول جەردە وتىرىپ مالىمەتتەردى قوسىمشاعا ەنگىزە الادى. سونداي-اق ونلاين-رەجىمدە بالانىڭ جاعدايى تۋرالى مونيتورينگ جاساۋ مۇمكىندىگى تۋادى», دەي ءدى باس ديرەكتوردىڭ مىندەتىن اتقارۋشى.
جيىندا تانىستىرىلعان ەكىنشى جوبا – ەلەكتروندىق دەنساۋلىق تولقۇجاتى. ونى دەنساۋلىق ساقتاۋ مينيسترلىگى دۇنيەجۇزىلىك بانكپەن بىرلەسىپ ازىرلەگەن.
«ەمدەلۋشىلەرگە ارنالعان ەلەكتروندىق دەنساۋلىق تولقۇجاتى (ەدت) ءار ادامعا ءوز دەنساۋلىعى تۋرالى اقپاراتتى, دارىگەرلەردىڭ ۇسىنىستارى مەن ەسكەرتۋلەرىن, كلينيكالىق شەشىمدەردى كورۋگە مۇمكىندىك بەرەدى», دەيدى ولجاس ابىشەۆ.
ءبىر ايتا كەتەرلىگى, جوبانىڭ دارىگەرلەرگە جانە ەمدەلۋشىگە ارنالعان ەكى نۇسقاسى بولادى. مىسالى, حالىقارالىق ستاندارتتار مەن دارىگەرلەر ەتيكاسىنا سايكەس ەمدەلۋشىگە دياگنوزدى بەلگىلى ءبىر پسيحولوگيالىق دايىندىقتان كەيىن حابارلايتىن جاعدايلار بولۋى مۇمكىن. ونداي جاعدايدا اقپارات ەمدەلۋشىگە دارىگەرلەر كونسيليۋمىنان كەيىن 20-25 كۇننەن كەيىن قولجەتىمدى بولماق.
دەنساۋلىق ساقتاۋ مينيسترلىگىنىڭ «قازاقتەلەكوم» اق–مەن بىرلەسكەن جوبالارىنىڭ ءبىرى – بىرىڭعاي ەلەكتروندىق پوشتا سەرۆيسى. ۇلتتىق mail.kz ەلەكتروندىق سەرۆيسىنىڭ پورتالىندا @med.mail.kz اتتى دومەن دەنساۋلىق ساقتاۋ سالاسىنىڭ قىزمەتكەرلەرىنە ارنالماق. «اتالعان سەرۆيس بارلىق مەديتسينا قىزمەتكەرلەرىنە بىرىڭعاي اقپارات الماسۋعا مۇمكىندىك بەرەدى», دەدى «ەلەكتروندىق دەنساۋلىق ساقتاۋدى دامىتۋ» رەسپۋبلكالىق ورتالىعىنىڭ باس ديرەكتورىنىڭ مىندەتىن اتقارۋشى. بۇل جوبا بيىلعى جىلدىڭ سوڭىندا ىسكە قوسىلىپ, 2018 جىلى بارلىق مەديتسينا قىزمەتكەرلەرىنە قولجەتىمدى بولادى دەپ جوسپارلانۋدا.
«بۇل قىزمەت ارقىلى مەديتسينا قىزمەتكەلەرى قازاقستان بويىنشا كەز كەلگەن ارىپتەسىنە پوشتامەن حات جىبەرە الادى. قازىر ولاردىڭ سانى رەسپۋبليكا بويىنشا 220 مىڭنان استى. سونىمەن قاتار دەنساۋلىق ساقتاۋ مينيسترلىگى دە وسى قىزمەت ارقىلى قىزمەتكەرلەرگە تىكەلەي حات جولداۋ مۇمكىندىگىن الادى», دەيدى ولجاس ابىشەۆ. ونىڭ ايتۋىنشا, دەنساۋلىق ساقتاۋ ءمينيسترى قازاقستان بويىنشا بارلىق دەنساۋلىق ساقتاۋ ماماندارىنا قۇتتىقتاۋ حاتىن جولداپ كورگەن.
«قازاقتەلەكوم» اق اقپاراتتىق جۇيەلەر ديرەكتسياسىنىڭ باسشىسى جانار مۇرزاحانوۆانىڭ ايتۋىنشا, بۇل جوبا دومەنى قازاقستاندا بولعاندىقتان, اقپارات الماسۋ جىلدامدىعى وتە جوعارى بولادى.
«مەديتسينا سالاسى مالىمەتتەردى ساقتاۋدىڭ جانە الماسۋدىڭ جوعارى قۋاتتىلىعىن تالاپ ەتەدى. اتالعان جوبا قىزمەتكەرلەردىڭ ۇسىنىستارى بويىنشا جاڭارتىلىپ وتىراتىن بولادى», دەي كەلە جانار مۇرزاحانوۆا دەنساۋلىق ساقتاۋ مينيسترلىگىمەن بىرلەسىپ تاعى بىرنەشە جوبا قولعا الىنعانىن اتاپ ءوتتى.
«قازاقتەلەكوم»اق مينيسترلىكپەن بىرلەسىپ دارىگەرلەرگە ەلەكتروندىق تۇردە جازىلۋ, دارىگەرلەر مەن ەمحانالار رەيتينگى سەكىلدى جوبالاردى قاراستىرۋدا. سونىمەن قاتار ەمحانالاردىڭ بۋحگالتەرلىك ەسەپ جوباسىن ەرەكشە اتاپ وتۋگە بولادى. ول بيۋدجەتتىك پروتسەستەردىڭ ايقىندىعىن قامتاماسىز ەتۋ جانە مەديتسينالىق ۇيىمدار قىزمەتىنىڭ قارجىلىق-شارۋاشىلىق قىزمەتىن ەسەپكە الۋدى قامتاماسىز ەتۋ ماقساتىندا مينيسترلىكپەن بىرلەسىپ جۇزەگە اسىرىلۋدا», دەدى جانار مۇرزاحانوۆا.
بۇل جوبانىڭ باستى ەرەكشەلىگى – دەنساۋلىق ساقتاۋ مينيسترلىگى ەمحانالاردىڭ بيۋدجەتتى يگەرۋىن باقىلاپ, ءتىپتى, كاسسالارداعى قىزمەتتەر تۋرالى دا مالىمەت الىپ وتىراتىن بولادى
ەستەرىڭىزگە سالا كەتسەك, «ەلەكتروندىق دەنساۋلىق ساقتاۋدى دامىتۋ» رەسپۋبلكالىق ورتالىعى - قازاقستان بويىنشا دەنساۋلىق ساقتاۋ سالاسىن اقپاراتتاندىرۋعا جانە اقپاراتتىق جۇيەلەردى دامىتۋعا جاۋاپ بەرەتىن دەنساۋلىق ساقتاۋ مينيسترلىگىنىڭ قۇرىلىمدىق ءبولىمى.
گۇلنۇر قۋانىشبەكقىزى,
«ەگەمەن قازاقستان»