حالىقارالىق ادەبي بيەننالي اياسىندا وتكەن كەشكە 20-دان اسا مەملەكەتتەن قوناقتار كەلىپ, ءوز ەلىمىزدەگى اقىننىڭ وقىرماندارىمەن تەاتر زالىن لىق تولتىردى. ەلىنە ەڭبەگى سىڭگەن, ادەبيەتكە ۇلەس قوسقان اقىندى مەرەيلى جاسىمەن قۇتتىقتاعان ەلباسى نۇرسۇلتان نازارباەۆتىڭ سالەمىن الماتى قالاسىنىڭ اكىمى باۋىرجان بايبەك جەتكىزدى. سونىمەن قاتار, قازاقستان رەسپۋبليكاسىنىڭ ۇكىمەتىنەن, پارلامەنتتىڭ قوس پالاتاسىنان, وبلىس اكىمدەرىنەن, حالىقارالىق «تۇركسوي» ۇيىمىنان, تۇركيا مەملەكەتىنەن, وزبەكستان مەن قىرعىزستاننان, رەسەيدەن, تاتارستاننان كەلگەن قۇتتىقتاۋلاردى اقىننىڭ قالامداس دوستارى مەن ۇيىم وكىلدەرى جەتكىزدى. سالتاناتتى جيىندا اقىن ولەڭدەرى وقىلىپ, ولەڭىنە جازىلعان اندەر ورىندالدى. پوەزياداعى ازاماتتىق ءۇندى ولەڭسوزدىڭ ءبىر قاسيەتى رەتىندە ايتىپ كەلەمىز. وسى جاعىنان كەلگەندە نۇرلان ءورازاليننىڭ پوەزياسىندا ازاماتتىق كوزقاراستارى مەن ومىرلىك ۇستانىمدارى باسىمدىققا يە. بۇل ەڭ الدىمەن اقىننىڭ جەكە قاسيەتى بولسا كەرەك. زامانمەن زاماندى, عاسىر مەن عاسىردى, ءداۋىر مەن ءداۋىردى جىرلاپ, ۋاقىت دەپ اتالاتىن قاسيەتتى ۇعىمدى ءوز پوەزياسىنىڭ ءبىر كاتەگورياسى ەتە بىلگەن اقىننىڭ ءمولدىر ولەڭدەرى ەكى كۇن بويى الاتاۋ باۋرايىن شۋاقتى سوزگە تولتىردى. سونىمەن قوسا, ادەبي بيەننالە اياسىندا قازاقستان جازۋشىلار وداعىنىڭ ادەبيەتشىلەر ۇيىندە نۇرلان ءورازاليننىڭ ء«سوزتۇمار», «كوكجال ءداۋىر» – «ۆرەميا ۆولچيتسا», «تاڭىرمەن تىلدەسۋ», «تاۋبە», «اسپانتاۋدان اۋعان كۇز», «قۇنداعىم» كىتاپتارىنىڭ تۇساۋكەسەرى وتكەن بولاتىن.
باعاشار تۇرسىنباي ۇلى, «ەگەمەن قازاقستان»
الماتى