جىل سوڭىنا دەيىن وبلىسىمىزداعى بارلىق دەنساۋلىق ساقتاۋ ۇيىمدارىندا مەديتسينالىق اقپاراتتاندىرۋ جۇيەسى 100 پايىز ورناتىلاتىن بولادى. اتالعان جۇيە دەنساۋلىق ساقتاۋ ۇيىمدارىنىڭ جۇمىستارىن اۆتوماتتاندىرۋدى, قاجەتتى ەمحانالىق جانە اكىمشىلىك اقپارات قۇرۋدى جانە قاعازسىز تەحنولوگيالارعا كەزەڭ-كەزەڭمەن كوشۋدى قامتاماسىز ەتەدى. بۇگىن بۇل تۋرالى شىمكەنت قالالىق №6 ەمحانا جۇمىسىمەن تانىسقان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ءمالىم ەتتى.
ايتا كەتەيىك, كەشەندى مەديتسينالىق اقپاراتتىق جۇيەسى وبلىسىمىزدا 2017 جىلدىڭ 1 اقپانىنان باستاپ جۇمىس ىستەپ كەلەدى. قازىرگى تاڭدا اتالعان جاڭا جۇيە وبلىستىڭ امبۋلاتورلىق-ەمحانالىق جانە 38 مەديتسينالىق ۇيىمدارى مەن بولىمشەلەرىندە ورناتىلعان. اتالعان پيلوتتىق جۇيەگە ستاتسيونارلىق قىزمەت كورسەتەتىن ۇيىمدار دا قوسىلىپ, جۇيەنى تيراجداۋ ماسەلەسىن جىل سوڭىنا دەيىن اياقتاۋ جوسپارلانىپ وتىر.
«وبلىسىمىزدىڭ دەنساۋلىق ساقتاۋ سالاسى كۇننەن-كۇنگە ەرەكشە قارقىنمەن دامىپ كەلەدى. قازىرگى تاڭدا مەديتسينالىق كومەكتى جاقسارتۋ ماقساتىندا وبلىسمىزداعى بارلىق دەنساۋلىق ساقتاۋ ۇيىمدارىنا مەديتسينالىق اقپاراتتاندىرۋ جۇيەسىن ورناتۋ ۇستىندەمىز. سونىمەن قاتار, وسى باعىتتا مەديتسينالىق ۇيىمداردى 2017 جىلى تولىق كومپيۋتەرمەن جابدىقتاۋ جوسپارلانىپ وتىر. بۇل جۇيەنىڭ تيىمدىلىگى مول. سوندىقتان جاڭاشىلدىققا ۇمتىلۋدان قورىقپاي, حالىقتىڭ دەنساۋلىعىن جاقسارتۋدا ارقايسىمىز ايانباي ەڭبەك ەتۋىمىز كەرەك», - دەدى جانسەيىت قانسەيىت ۇلى.
«دامۋ» اقپاراتتىق تەحنولوگيالىق ورتالىعى ازىرلەگەن جوبا – «DamuMed» كەشەندى مەديتسينالىق اقپاراتتىق جۇيەسى دەپ اتالادى. اتالعان وڭىرلىك جۇيە مەديتسينالىق ۇيىمداردا ىشكى پروتسەسستى اۆتوماتتاندىرىپ قانا قويماي, مەديتسينالىق كومەك كورسەتۋ دەڭگەيلەرىنىڭ ءبىر-بىرىمەن ينتەگراتسياسىن, ونكولوگيا, تۋبەركۋلەز, كارديولوگيالىق ارنايى قىزمەتتەردىڭ شۇعىل ساباقتاستىعىن قامتاماسىز ەتە الادى.