اۋدان تىنىسى اكىم باقىلاۋىندا
سارىارقا اۋدانىنىڭ اكىمى س.مۇستافينانىڭ تۇرعىندار الدىنداعى ەسەبىن تىڭداۋعا حالىق كوپ جينالدى.
اۋدان بويىنشا مەكتەپتەر مەن بالاباقشالار سالىنىپ, ولاردىڭ سانى ارتا تۇسكەنىن كولدەنەڭ تارتا كەلە, ەلباسى تاپسىرعان بالاباقشا ماسەلەسىنىڭ شەشىمىن تابۋ ءۇشىن بۇرىنعى ەسكى 8 بالاباقشا عيماراتتارىنا جوندەۋ جۇمىستارىن جۇرگىزۋ جوپارلانعانىن جەتكىزدى.
سارىارقا اۋدانىنىڭ اكىمى س.مۇستافينانىڭ تۇرعىندار الدىنداعى ەسەبىن تىڭداۋعا حالىق كوپ جينالدى. “تۇران-استانا” ۋنيۆەرسيتەتىنىڭ اكت زالىندا ءبىر بوس ورىن جوق. ۋنيۆەرسيتەت قالاداعى تەحنوپاركتىڭ اۋماعىندا ورنالاسقاندىقتان بولار, نەگىزىنەن وسىنداعى مەكەمەلەردىڭ قىزمەتكەرلەرى مەن جوو-لاردىڭ ۇستازدارى جينالعانعا ۇقسايدى.
قالا اكىمىنىڭ ورىنباسارى ە.قوجاعاپانوۆ اۋدان اكىمىنە ءسوز بەرگەن سوڭ مىنبەرگە كوتەرىلگەن ءسابيلا ساپارقىزى اۋدان بويىنشا وتكەن جىلى اتقارىلعان جۇمىستاردى جۇرتشىلىق نازارىنا جايىپ سالدى.
سارىارقا اۋدانى – استانا قالاسىنىڭ ەسكى بولىگى, قالا تۇرعىندارىنىڭ جارتىسىنا جۋىعى شوعىرلانعان (321 مىڭ ادام تۇرادى), قاي سالا بويىنشا دا ءوندىرىستىڭ ءوندىرۋ ايماقتارى مەن دامىعان تەمىر جول جانە قاتىناس جۇيەسى بار, ورتا جانە شاعىن كاسىپكەرلىكتى دامىتۋعا قولايلى اۋدان. مىسالى, مۇندە 80 ءىرى جانە ورتاشا ءوندىرىس پەن قۇرىلىس كاسىپورىندارى بولسا, ءىرى سالىق تولەۋشىلەردىڭ ءوزى 12,7 مىڭ ەكەن. “الەمدى شارپىعان ەكونوميكالىق-قارجىلىق داعدارىسقا قاراماستان, استانا قالاسى الەمدەگى سەرپىندى دامۋشى قالالاردىڭ ءبىرى بولىپ تابىلادى. بۇل مويىندالعان دەرەك”,– دەپ ءسوزىن باستاعان اۋدان اكىمى جىلدىق ەسەبىن سالا-سالاعا ءبولىپ تۇرىپ ايتتى.
الدىمەن ينۆەستيتسيالىق جانە قۇرىلىستىق دامۋ بويىنشا اكىم كەلتىرگەن دەرەكتەرگە ءبىراز توقتالا كەتەيىك. سارىارقا اۋدانىندا قازىرگى ۋاقىتتا سالىنىپ جاتقان 12 ازاماتتىق قۇرىلىس نىساندارى بولسا, 13 نىسان استانا اكىمدىگىنىڭ پاتەرلەردى وتەپ الۋى بويىنشا سالىنۋدا, 4 نىسان پايدالانۋعا بەرىلگەن. ال ۇلەسكەرلەردى ەلەڭدەتەتىن “اققب جاڭا قۇرىلىس” جسش-ءنىڭ كۇشىمەن سالىنىپ جاتقان 4 پروبلەمالى ءۇيدىڭ 2-ءۋى: “ەۆروپەيسكيدىڭ” 2-كەزەگى جانە “وقجەتپەس” پايدالانۋعا بەرىلگەن, ال “ەۆروپەيسكيدىڭ” 1-كەزەگى مەن “ۆوزروجدەنيە” تۇرعىن ۇيلەرىن جىلدىڭ اياعىنا قاراي پايدالانۋعا بەرۋ جوسپارلانىپتى.
بۇلاردان تىس 20 تۇرعىن ءۇي كەشەنىنىڭ قۇرىلىسى جۇرۋدە. ولاردى قۇرىلىس كومپانيالارى وزدەرىنىڭ كۇشىمەن اياقتاماق. مەملەكەتتىك باعدارلاما بويىنشا دا سارىارقا اۋدانىندا كوپتەگەن تۇرعىن ۇيلەر سالىنىپ جاتىر ەكەن. ولار نەگىزىنەن تىلەنديەۆ كوشەسىنەن ورىن تەپكەن. 13 توعىز قاباتتى, 38 بەس قاباتتى ۇيدەن تۇراتىن, ۇزىن سانى 51 ءۇيدىڭ قۇرىلىسى جۇرۋدە كورىنەدى. ۇلەستىك قۇرىلىس نىساندارىنا بايلانىستى ارنايى ۆەدومستۆوارالىق كوميسسيا جۇمىس جاسايتىنىن نازارعا سالعان اكىم “NSK”, “شاھار-استانا” جشس مەكەمەلەرى باسشىلارىنىڭ ۇستىنەن قىلمىستىق ءىس قوزعالعانىن ايتتى. سونىمەن بىرگە, اۋدان بويىنشا مەكتەپتەر مەن بالاباقشالار سالىنىپ, ولاردىڭ سانى ارتا تۇسكەنىن كولدەنەڭ تارتا كەلە, ەلباسى تاپسىرعان بالاباقشا ماسەلەسىنىڭ شەشىمىن تابۋ ءۇشىن بۇرىنعى ەسكى 8 بالاباقشا عيماراتتارىنا جوندەۋ جۇمىستارىن جۇرگىزۋ جوپارلانعانىن جەتكىزدى. راسىندا, بالاباقشا ماسەلەسى استانا ءۇشىن شەشۋى ۇلكەن كۇشتى قاجەت ەتەتىن اسا قيىن تۇيىنگە اينالعانىنا ءبىراز ۋاقىت بولدى. اكىم وسى سالماقتى جەڭىلدەتەتىن جاڭا ەكى بالاباقشا قۇرىلىسىنىڭ كۋبرين جانە ماسكەۋ كوشەلەرىندە ءجۇرىپ جاتقانىنان دا حاباردار ەتتى.
اكىم ەسەبى جان-جاقتى شىعىپ, اۋدان ءومىرىنىڭ بار سالاسىن قامتىدى. جول جوندەۋ مەن قالا ىشىندەگى جولاۋشىلار تاسىمالى, اۋلالاردى اباتتاندىرۋ, پاتەر يەلەرى كووپەراتيۆتەرىنىڭ جۇمىسى, اۋدان قۇرامىنا ەنىپ, جاپسارلاس جاتقان “كوكتال”, ء“وندىرىس” كەنتتەرىنىڭ ماسەلەلەرى, سانيتارلىق تازالىق, الەۋمەتتىك سالا دەيسىز بە, قاي-قايسى بويىنشا دا اتقارىلعان ىستەر مەن بولاشاقتاعى جوسپارلار جايلى وي بولىسكەن اۋدان اكىمى مۇنان سوڭ جۇرتشىلىق تاراپىنان قويىلعان ساۋالدارعا جاۋاپ بەردى.
العاشقى بولىپ №14 اۆتوبۋس مارشرۋتى ءجۇرىسىنىڭ الشاقتىعىنا سىن ايتقان تۇرعىنعا جاۋاپ بەرگەن اكىم: “وسى ەسەپ بەرۋ جينالىسىندا سىزدەردىڭ تاراپتارىڭىزدان قويىلعان بىردە-ءبىر ساۋال نازاردان تىس قالمايدى, كوڭىلدەرىڭىزدەگىدەي جاۋاپ ءدال قازىر ايتىلماسا دا, ولاردىڭ بارلىعى قالا اكىمىنىڭ باقىلاۋىنا قويىلادى, ءار ماسەلە بويىنشا جاۋاپتى ادامدار ونىڭ قالاي شەشىلگەنى تۋراسىندا ءمالىم ەتەدى”,– دەدى. اۋداننىڭ كەلەسى ءبىر تۇرعىنى “كازاحستانسكايا پراۆدا” گازەتىندە جازىلعان قىزىلوردا وبلىسىنداعى قولعا الىنعان ۋچاسكەلىك پوليتسيالارعا سايلاۋ وتكىزۋ جايىن ۇلگى ەتىپ, تۇرعىنداردىڭ ۋچاسكەلىك پوليتسيا قىزمەتكەرلەرىن كورمەيتىنىن سىنعا الدى. وعان استانا قالالىق ىشكى ىستەر باسقارماسىنىڭ باستىعى ە.باۋەر جاۋاپ بەردى: “بۇل – رەسپۋبليكا كولەمىندە ءار وبلىستىڭ بىرەر اۋدانىندا بايقاپ كورۋ ءۇشىن جاسالعان جوبا. ءبىزدىڭ قالامىزدا ول الماتى اۋدانىندا جۇرگىزىلۋدە. مەن بۇيرىقتى ورىندايتىن اداممىن, ەگەر سارىارقا اۋدانىندا دا وسى جۇمىس جاسالۋ قاجەت دەگەن تاپسىرما بەرىلسە, ورىندايمىز”, — دەدى ول.
ەسەپتى كەزدەسۋدە ەڭ ءبىر ءجيى كوتەرىلگەن ماسەلە تەحنوپارككە قاتىستى بولدى. كوپتەگەن ءىرىلى-ۇساقتى كاسىپورىندار مەن بىرنەشە جوو ورنالاسقان وسى اۋماق ءۇشىن اۆتوبۋس قاتىناسى, ونىڭ ىشىندەگى تازالىق ءجايى مەن جولدىڭ ناشارلىعى ايتىلدى. اكىم تەحنوپارك ىشىندە عانا جۇرەتىن ارنايى اۆتوبۋس مارشرۋتى اشىلاتىنىن, ال جول جوندەۋ ءۇشىن جەر استىنداعى ينجەنەرلىك كوممۋنيكاتسيا جەلىلەرىنىڭ ساراپتاماسى جوقتىعىنا بايلانىستى بۇل ءىستىڭ كەشەۋىلدەيتىنىن جەتكىزدى. بارلىق قۇجات قولعا تيمەي, جول جوندەۋدى باستامايمىز, ال جولدىڭ ويىلعان جەرلەرىن جاماۋ اقشانى جەلگە ۇشىرعانمەن پاراپار. سوندىقتان مەنىڭ سىزدەرگە وتىرىك ۋادە بەرگىم كەلمەيدى, وسى سەبەپتى كۇتە تۇرۋعا ءماجبۇر بولاسىزدار, دەپ ءسوزىن سيىرقۇيىمشاقتاتتى.
ءسابيلا مۇستافينا جازباشا جانە اۋىزشا بەرىلگەن ساۋالداردىڭ بارلىعىنا جاۋاپ بەرە كەلىپ, ولاردىڭ كەيبىرەۋلەرىن شەشۋگە بايلانىستى جەكەلەگەن ازاماتتاردى ءوزىنىڭ قابىلدايتىنىن ايتتى جانە كومەكشىسىنە ولاردىڭ اتى- جوندەرىن جازدىرىپ العىزدى.
جالپى, اۋدان بويىنشا جۇمىس جاسايتىن 28 اقپاراتتىق-ناسيحاتتىق توپتار بار ەكەن. ولار جۇرتشىلىقپەن 90 رەت كەزدەسۋ وتكىزىپ, ولارعا 24 375 ادام قاتىسىپتى. ءار كەزدەسۋدە الەۋمەتتىك ماسەلەلەر, دەنساۋلىق ساقتاۋ, ءبىلىم بەرۋ جۇمىستارىنىڭ ساپاسىن ارتتىرۋ, تۇرعىن ءۇي ماسەلەسى كوتەرىلىپ وتىرىپتى. سول كەزدەسۋلەردەن سوڭ جۇرگىزىلگەن الەۋمەتتىك ساۋالدامالارعا ءجيى سۇيەنە وتىرىپ ەسەپ بەرگەن اكىممەن جۇزدەسۋ اۋدان تىنىسىنىڭ باقىلاۋدا ۇستالاتىنىن تانىتقانداي.
انار تولەۋحانقىزى.