ساراي الدىنا جينالعانداردىڭ سانى 2 جارىم مىڭ ادامنان اسىپ جىعىلدى. اباي ەسكەرتكىشىن اينالا قورشاعان الماتىلىقتار, الاتاۋ باۋرايىنان ەسكەن سالقىن سامالمەن تىنىستاپ, سالتاناتتى شاقتى ءسات ساناپ كۇتىپ تۇردى. ەكسپو دەگەن ءبىر اۋىز ءسوز سوڭعى جىلداردىڭ كولەمىندە بۇقارا حالىقتىڭ ساناسىنا ساقتالىپ, جادىندا جاتتالىپ قالعان ەرەكشە ۇعىمعا اينالعان ەدى. مىڭ رەت اتىن ەستىگەن مەرەيلى شارانىڭ زاتى قانداي بولادى ەكەن دەگەن ساۋال كوپشىلىك جۇرتتىڭ كوكەيىندە تۇردى. اشىق اسپان استىنداعى الاڭقايعا جينالعان جاس پەن كارى LED ەكرانداعى «قازاقستان» ۇلتتىق تەلەارناسى ارقىلى تاراتىلىپ جاتقان تىكەلەي تولقىننان كورمەنىڭ سالتاناتتى اشىلۋىنىڭ ەڭ ءبىر تاماشا ساتتەرىنە كۋا بولدى. «وسىناۋ كوپتەن كۇتكەن تاريحي ءساتتى ۇيدە وتىرىپ كىشكەنتاي كوكجاشىكتەن كورگەنشە, جۇرتپەن بىرگە تاماشالاعان الدەقايدا تارتىمدى ءارى اسەرلى» دەيدى, الاڭعا جينالعان قالا جۇرتشىلىعى. اشىلۋ ءراسىمى باستالعانعا دەيىن جينالعاندارعا الەم وركەنيەتىندەگى ايتۋلى كورمەنىڭ تاريحىنا قاتىستى تانىمدىق سۇراقتار قويىلىپ, جەڭىمپازدارعا ەكسپو بيلەتتەرى تابىس ەتىلدى. جينالعانداردىڭ ىشىنەن ەلىمىزگە تانىمال مادەنيەت قايراتكەرلەرىن, سپورت ساڭلاقتارىن, ءبىر توپ زيالى قاۋىم وكىلدەرىن دە كەزدەستىردىك.
– بۇگىن ەلىمىز ءۇشىن ۇلكەن مەرەكە. وسىناۋ مەرەيلى ءساتتىڭ اشىلۋ سالتاناتىن استاناعا بارىپ قىزىقتاۋعا جول تۇسپەگەننەن كەيىن وسى الاڭعا كەلىپ كوپشىلىكپەن بىرگە تاماشالاۋدى ۇيعاردىم. ۇيدە وتىرعانعا شىدامىم جەتپەي, نەمەرەمدى ەرتىپ وسىندا كەلدىم. اشىلۋ سالتاناتىندا, ەلباسىمىزدىڭ ايداي الەمنىڭ الدىندا, « ۇلى دالاعا قوش كەلدىڭىزدەر» دەگەن ءبىر اۋىز ءسوزىن ەستىگەندە بويىمدى وزگەشە قۋانىش بيلەپ, توبەم كوككە جەتكەندەي بولدى. ءدال وسى ساتتە عاسىرلار قويناۋىندا اتا-بابالارىمىز كورگەن قيىندىقتىڭ بارلىعى ارتتا قالعانداي كورىندى. كوزىمە قۋانىشتىڭ جاسى كەلدى. ۇلى ەلدىڭ ۇرپاعى ەكەنىمىزدى الەمگە پاش ەتتىك. جاسىم 80-گە كەلسە دە شىلدە ايىندا استاناعا بارىپ كورمەنى ءوز كوزىممەن تاماشالاسام دەگەن نيەتىم بار دەيدى, – ءبىلىم بەرۋ ءىسىنىڭ ۇزدىگى, ارداگەر ۇستاز سەكەر ايتبايقىزى.
مەرەكەلىك كوڭىل-كۇيمەن قالا جاستارى ەكسپو-2017 كورمەسىنىڭ قۇرمەتىنە فلەشموب ۇيىمداستىردى. ۇزدىك ونەر كورسەتكەندەرگە تاعى دا كورمە بيلەتتەرى ۇلەستىرىلدى.
– كوپتەن كۇتكەن تاريحي ءساتتىڭ اشىلۋ سالتاناتىنا دا كۋا بولدىق. ەكسپو كورمەسى ەلىمىزدىڭ ەكونوميكالىق, مادەني-رۋحاني الەۋەتىن كوتەرەتىن تەڭدەسسىز جوبا. ەكسپو-2017 ارقىلى تاۋار اينالىمى جولعا قويىلىپ, تۋريستەر ەسەبىنەن الماتىنىڭ دا بيۋدجەت قورى مولايىپ, قالانىڭ ينۆەستيتسيالىق پوتەنتسيالى ارتا تۇسپەك. شەتەلدىك سەرىكتەستەرمەن ساۋدا-ەكونوميكالىق بايلانىسىمىز دا نىعايادى. كورمە بارىسىندا الماتىدان استاناعا تاۋلىگىنە شامامەن 5830 ادام بارادى. ونىڭ ىشىندە, تاۋلىگىنە 13 اۋە رەيسىمەن 1100 ادام قاتىنايتىن بولادى. كۇنىنە ءبىر رەت 2924 ادامدى تاسىمالدايتىن 5 تەمىر جول پويىزى, كۇنارا 1276 ادامدى تاسىمالدايتىن 1 پويىز, 420 جولاۋشىعا ارنالعان 1 جۇيرىك پويىز اپتاسىنا ءبىر رەت الماتىلىقتاردى «استانا ەكسپو-2017» كورمەسىمەن قاۋىشتىرادى. سونىمەن بىرگە, ارنايى اۆتوبۋستار كۇنىنە ەكى رەت 110 جولاۋشىدان تاسىمالدايدى. شارانى تاماشالاۋ ءۇشىن شەت ەلدەردەن كەلگەن تۋريستەر مەن ترانزيتتىك جولاۋشىلار سانىنىڭ ارتۋىن ەسكەرىپ, ولارعا قوسىمشا بىرنەشە تاسىمالداۋ قۇرالدارىن جۇمىلدىردىق. وسىلايشا, اۋە رەيستەرى, تەمىر جول پويىزدارى, ارنايى قوعامدىق كولىكتەر ارقىلى ورتا ەسەپپەن كۇنىنە 1570 جولاۋشىعا قوسىمشا قىزمەت كورسەتىلمەك, – دەيدى ەكسپو-2017 كورمەسىنىڭ الماتى قالاسى بويىنشا جەدەل شتابىنىڭ جەتەكشىسى سامعات ەرمەكباەۆ.
بىزگە بەرىلگەن مالىمەتتەر بويىنشا, الماتى قالاسى مەن الماتى وبلىسى جانە قالا قوناقتارىنان بارلىعى, 500 مىڭعا جۋىق ادام «استانا ەكسپو-2017» حالىقارالىق مامانداندىرىلعان كورمەسى كەزىندە ەلورداعا بارادى دەگەن بولجام بار. وسىلايشا, الماتى تۇرعىندارى كورمەنىڭ اشىلۋ سالتاناتىن بىرگە تاماشالاپ, ۇيىمشىلدىق تانىتتى. جينالعانداردىڭ كوپشىلىگى وسىندا كەلگەننەن كەيىن ەرەكشە اسەرگە بولەنىپ, كورمەنىڭ كوركىن ءوز كوزدەرىمەن قىزىقتاۋعا استاناعا اتتاناتىنىنا ءشۇبامىز جوق.
ارمان وكتيابر, «ەگەمەن قازاقستان»