– بۇل ءسىزدىڭ كوپتەن كۇتكەن ءارى ەڭ ماڭىزدى جەكپە-جەگىڭىز عوي؟
– البەتتە سولاي. بۇل كەزدەسۋدى كۇتىپ جۇرگەنىمە ەكى جىلدىڭ كولەمى بولىپ قالدى. ەندى سول كۇندى اسىعا كۇتىپ ءجۇرمىن.
– «كانەلو» سەكىلدى سوققىسى كۇشتى بوكسشىمەن كەزدەسىپ پە ەدىڭىز؟
– جوق, مەن جۇدىرىقتاسقان چەمپيونداردىڭ اراسىندا الۆارەس سەكىلدى مىقتى بوكسشى بولعان ەمەس.
– وعان قارسى قالاي دايىندالماقسىز؟
– باپكەرىم ابەل سانچەستىڭ قۇرعان جوسپارى بار. سوندىقتان جاتتىعۋىمدا «كانەلونىڭ» ستيلىنە بايلانىستى وزگەرىستەر دە بولىپ قالۋى مۇمكىن. ساۋل ەكەۋىمىز ءتورت جىل بۇرىن بىرگە جاتتىققانبىز. ءبىر-ءبىرىمىزدى بىلەمىز.
– ەستۋىمشە, سىزدەر سپاررينگ وتكىزدىڭىزدەر عوي؟ ونى نوكاۋتقا تۇسىرە الدىڭىز با؟
– ءيا, شامامەن ءتورت جىل بۇرىن جاتتىعۋ كەزىندە كۇش سىناسقانىمىز بار. ول مىقتى بوكسشى. سپاررينگ كەزىندە ونى نوكاۋتقا تۇسىرە المادىم, بىراق 16 قىركۇيەكتە نوكاۋتقا جىبەرەم دەپ ويلايمىن.
– دەمەك, بۇل جەكپە-جەك نوكاۋتپەن اياقتالادى دەپ ويلايسىز عوي؟ الدە جەڭىمپاز تورەشىلەردىڭ شەشىمىمەن انىقتالا ما؟
– ول جاعىن بىلمەيمىن. بۇل بوكس. ەكەۋىمىز ءۇشىن ۇلكەن جەكپە-جەك بولماق. الۆارەس تە, مەن دە ناعىز دراما كورسەتۋگە ۇمتىلامىز دەپ ويلايمىن.
– الۆارەس وزىڭىزدەي سوققىسى كۇشتى بوكسشىمەن كەزدەستى مە؟
– جوق, ولاي ويلامايمىن.
– سوققىلارىڭىزدى سەزىنگەندە ول تاڭ قالادى دەپ ويلايسىز با؟
– قاتتى تاڭ قالارىنا سەنىمدىمىن (كۇلدى).
– «كانەلونىڭ» كىشى حۋليو سەزار چاۆەسپەن وتكىزگەن جەكپە-جەگى جايلى قانداي ويداسىز؟ بۇل كەزدەسۋدە ونىڭ وسال تۇستارىن بايقادىڭىز با؟
– بۇل كەشتە مۇلدەم باسقا نارسەنى ويلادىم. «كانەلو» ونى سوققىلارىنىڭ استىنا العانمەن, نوكاۋتقا تۇسىرمەدى. ماعان وسى جايت ازداپ تۇسىنىكسىزدەۋ بولدى. كىشى چاۆەستى قۇلاتۋ كەرەك ەدى دەپ ويلايمىن.
– الۆارەس-چاۆەس كەزدەسۋىندە ءبىر بايقاعانىمىز, راۋند اراسىنداعى ۇزىلىستەردە «كانەلو» ورىندىققا وتىرمادى. بەينە ءبىر جەكپە-جەكتى دەم الماي اياقتاۋعا بولاتىنىن كورسەتكىسى كەلگەندەي بولدى.
– ونىسى كلوۋنادا عوي. بويىنا سىيماي بارا جاتسا, كۇشىن كەلەسى راۋندتا كورسەتۋ كەرەك ەدى. ءبىرىنشى راۋندتا بولماسا, ەكىنشى راۋندتا قارسىلاسىن ەسىنەن تاندىرىپ تاستاسىن. سوندا مويىنداۋعا بولادى.
– ءسىزدى قازاقستاندا ماڭىزدى شارالار كۇتىپ تۇر. بيىل ول جاقتا حالىقارالىق ەكسپو كورمەسى وتەدى. كورمەنىڭ ەلشىسى مىندەتىن اتقاراسىز. بۇل ءسىز ءۇشىن ۇلكەن مارتەبە بولار؟
– ارينە. مۇنداي اۋقىمدى شارانى وتكىزۋدىڭ ماڭىزى زور. كورمەدە سوڭعى ەكولوگيالىق تەحنولوگيالار, جاڭا ەنەرگيانىڭ كوزدەرى تانىستىرىلادى. وسىنىڭ ءبارىن بۇكىل الەمگە تانىستىرۋ مۇمكىندىگى پايدا بولعانىن ماقتان تۇتامىن.
– قازىر جانكۇيەرلەر اراسىندا كىشى فلويد مەيۋەزەر مەن كونور ماكگرەگور ايقاسى قىزۋ تالقىلانىپ جاتىر. ولاردىڭ ايقاسى الۆارەس ەكەۋىڭىزدىڭ جەكپە-جەگىڭىزگە باسەكەلەس بولماي ما؟ مەيۋەزەر-ماكگرەگور كەزدەسۋىنە قاراعاندا گولوۆكين-الۆارەس جەكپە-جەگى نە ءۇشىن ماڭىزدىراق؟
– سەبەبى, بىزدىكى ناعىز جەكپە-جەك. مەنىڭشە, مەيۋەزەر-ماكگرەگور كەشىندە ەشقانداي ينتريگا جوق. بۇل كونور ءۇشىن ءتيىمدى بولارى ءسوزسىز. ءوزىنىڭ وتباسىنا, بولاشاعىنا قاجەت كوبىرەك اقشا تابادى. بىراق سپورت جاعىنان الىپ قاراعاندا ەشقانداي قىزىق جوق.
– شارشى الاڭدا كىشى مەيۋەزەرمەن كەزدەسۋىڭىز مۇمكىن بە؟
– جوق, ولاي ويلامايمىن. سەبەبى, بۇل مۇمكىن ەمەس.
– ال ارى قاراي نە بولماق؟ «كانەلومەن» وتەتىن كەزدەسۋدەن كەيىن قانداي جوسپارىڭىز بار؟
– الدىمىزدا ەكى جول تۇر. ءبىرى – رەۆانش وتكىزۋ, ال ەكىنشىسى مەن ورتا سالماقتاعى بارلىق بەلبەۋگە يەلىك ەتكىم كەلەدى. بۇل مەنىڭ ارمانىم.