ۇيلەستىرۋ كەڭەسى – مەملەكەت پەن ۇەۇ-نىڭ تۇراقتى جۇمىس جاسايتىن ۇنقاتىسۋ الاڭى. ۇەۇ-مەن ءوزارا ءىس-قيمىل بويىنشا ءتيىمدى قىزمەتتىڭ باسىمدىقتارىن جانە جۇيەلى ساياساتتى قالىپتاستىرۋ – كەڭەستىڭ نەگىزگى ماقساتى. جيىندا ءسوز سويلەگەن نۇرلان ەرمەكباەۆتىڭ ايتۋىنشا, ۋاكىلەتتى ورگان رەتىندە مينيسترلىك ۇەۇ سالاسىنداعى زاڭنامانى جەتىلدىرۋ بويىنشا تۇراقتى نەگىزدە جۇمىس جۇرگىزۋدە. ماسەلەن, بۇگىنگى تاڭدا مەملەكەتتىك الەۋمەتتىك تاپسىرىستى قالىپتاستىرۋ مەن باعالاۋدا جاڭا تاسىلدەردى ۇسىناتىن زاڭ جوباسى پارلامەنت ءماجىلىسىنىڭ تالقىلاۋىنا جىبەرىلگەن. بۇل زاڭ جوباسى ۇەۇ-مەن بىرلەسىپ ازىرلەنگەن ەكەن. بۇدان بولەك, مەملەكەتتىك ورگانداردىڭ ۇكىمەتتىك ەمەس سەكتورمەن ءوزارا ءىس-قيمىل تاجىريبەسى دە جەتىلدىرىلۋدە. ماسەلەن, مينيسترلىك ورتالىق جانە جەرگىلىكتى مەملەكەتتىك ورگاندارعا سالالىق ۇەۇ-مەن جۇيەلى كەزدەسۋلەر ۇيىمداستىرۋدى ۇسىنىپ وتىر. «مەملەكەت باسشىسىنىڭ تاپسىرماسىنا سايكەس, ازاماتتىق ينستيتۋتتارمەن سۇحباتتاسۋدى كەڭەيتۋدىڭ جاڭا تاسىلدەرى بەلگىلەندى. مينيسترلىك بۇل باعىتتاعى جۇمىستاردى جۇيەلى تۇردە اتقارۋدا», – دەدى ن. ەرمەكباەۆ. ۆەدومستۆو باسشىسى, سونداي-اق, قوعامدى الاڭداتاتىن كوكەيكەستى ماسەلەلەرگە تۇراقتى مونيتورينگ ۇيىمداستىرىلاتىنىن, مەملەكەت, ۇەۇ جانە كاسىپكەرلىك – ۇشجاقتى ارىپتەستىگىن دامىتۋ بويىنشا شارالار ىسكە اسىرىلاتىنىن جەتكىزدى. ماسەلەن, ۇەۇ-مەن بىرگە العاش رەت «اسار» فورۋمىن وتكىزۋگە دايىندىق جۇرگىزىلىپ جاتىر ەكەن. سونىمەن قاتار, ماڭىزدى قوعامدىق ماسەلەلەر بويىنشا ۇەۇ-مەن ەكىجاقتى كەڭەسۋ فورماتى ەنگىزىلگەن. ءدىن ىستەرى جانە ازاماتتىق قوعام ۆيتسە-ءمينيسترى ابزال نۇكەنوۆ سوڭعى جىلدارى مەملەكەت پەن ۇكىمەتتىك ەمەس ۇيىمدار اراسىنداعى قارىم-قاتىناس بىرقاتار جاڭالىقپەن تولىعىپ, جاڭاشا قارقىن الا تۇسكەنىن جەتكىزدى. «2016 جىلدان باستاپ گرانتتىق جوبالاردى ىسكە اسىرۋ تاجىريبەسى ەنگىزىلدى. 2017 جىلى قارجىلاندىرۋ 3 ەسەگە, ال جوبالار سانى 6 ەسەگە ۇلعايدى. ايتا كەتەرلىك جايت, گرانتتاردىڭ تاقىرىپتارى ءتۇرلى ساناتتاعى تۇرعىندار مەن ۇكىمەتتىك ەمەس ۇيىمدارعا ارنايى ەسەپتەلگەن. بۇگىنگى تاڭدا 41 جوبانى ىسكە اسىرۋعا 8 وڭىردەن 39 ۇكىمەتتىك ەمەس ۇيىم قاتىسۋدا. قوسىمشا 19 جوباعا كونكۋرس جاريالاندى. بۇگىنگى تاڭدا ۇەۇ-مەن بىرلەسىپ, گرانتتاردى بەرۋ ەرەجەسى جەتىلدىرىلۋدە. سونىمەن قاتار, وسى جىلدان باستاپ ەڭ تابىستى جۇمىس اتقارعان ۇەۇ-عا مەملەكەتتىك سىيلىقاقىنى تابىستاۋ تاجىريبەسى ەنگىزىلۋدە. ءتيىستى ەرەجەلەر ءبىزدىڭ ۇەۇ-مەن بىرلەسىپ, جەتىلدىرىلۋدە. ىرىكتەۋ ءراسىمىنىڭ نەعۇرلىم اشىقتىعى مەن ادىلدىگىن قامتاماسىز ەتۋ ماقساتىندا وعان ۇەۇ وكىلدەرى مەن تاۋەلسىز ساراپشىلاردى قاتىستىرۋ كوزدەلىپ وتىر», – دەدى ا.نۇكەنوۆ. ۇيلەستىرۋ كەڭەسىنىڭ وتىرىسى بارىسىندا, سونىمەن قاتار, رەسپۋبليكالىق جانە وڭىرلىك دەڭگەيدەگى ۇەۇ-مەن ءوزارا ءىس-قيمىل ماسەلەلەرى تالقىلاندى. قاراعاندى جانە وڭتۇستىك قازاقستان وبلىستارىنداعى ۇەۇ-مەن ءوزارا ءىس-قيمىل تاجىريبەسى قاراستىرىلدى. كۇن تارتىبىنە سايكەس, دەنساۋلىق ساقتاۋ ۆيتسە-ءمينيسترى ا.تسوي, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى س.جاقىپوۆا, قاراعاندى وبلىسى اكىمىنىڭ ورىنباسارى ج.ابىشەۆ, وڭتۇستىك قازاقستان وبلىسى ىشكى ساياسات باسقارماسىنىڭ باسشىسى ب.تولەگەن, سونداي-اق, ۇيلەستىرۋ كەڭەسىنىڭ مۇشەسى, «ازاماتتىق قوعامدى دامىتۋ قاۋىمداستىعى» قوعامدىق بىرلەستىگىنىڭ اتقارۋشى ديرەكتورى ج.اسانوۆا بايانداما جاسادى. وتىرىس ناتيجەسىندە اتالعان باعىتتاعى جۇمىستاردى ءارى قاراي جەتىلدىرۋ بويىنشا ۇسىنىمدار ازىرلەندى.
ءلايلا ەدىلقىزى, «ەگەمەن قازاقستان»