ال ۇلتتىق پاتريوتيزم, ازاماتتىق ۇستانىم دەگەن قاسيەتتىڭ ءبارى دە تاڭداعان ماماندىققا دەگەن قۇرمەتتىڭ بەلگىسى. ءبىز ادەتتە ماماندىققا ادالدىق تۋرالى كوپ ايتامىز. ەل الدىنداعى پارىز دەگەندى دە ءجيى اڭگىمە قىلامىز. ال ماماندىققا ادالدىق ءىس اياسىندا كورىنىس تاپسا, تۋعان ەل الدىنداعى پارىز ءومىر ءسۇرۋ بارىسىندا وتەلەدى. وسىدان التى جىل بۇرىن قاراشانىڭ قارا سۋىعىندا تاراز كوشەلەرىندە قيعىلىق سالعان قىلمىسكەردى قۇرىقتاۋ كەزىندە قازا تاپقان پوليتسيا كاپيتانى عازيز بايتاسوۆتىڭ ەرلىگى بۇگىندە اڭىزعا اينالدى. تۋعان حالقىنىڭ ەسىندە ونەگە بولىپ ورنەكتەلدى. ەلباسى جارلىعىمەن «حالىق قاھارمانى» اتاعى بەرىلىپ, حالىق جادىندا ماڭگى ساقتالدى. ال ەرلىك تە ۇرپاقتانۇرپاققا جالعاسىپ, بۋىن سايىن الماسىپ تۇراتىن ەرەكشە قۇبىلىس. ول كىمنىڭ تاعدىرىنا جازىلعان, كىمنىڭ جۇرەگىندە قالىپتاسقان, ەشكىمگە بەلگىسىز. الگى ايتىلعان ءىس اياسىندا, ءومىر ءسۇرۋ بارىسىندا بەلگىلى بولاتىن تاعدىر جازۋى. وتكەن جىلى دا تاراز قالاسىندا اتىس ورىن الىپ, ەل ءۇشىن توبەدەن جاي تۇسكەندەي بولعان ەدى. ارينە, مۇندايدا حالىق تاعى دا ءتارتىپ ساقشىلارىنان كومەك كۇتەدى. سەبەبى, ارقا تۇتار ايبار ەلىمىزدىڭ ىشكى ىستەر سالاسى. تالاي قىلمىستىڭ الدىن الىپ, تالاي قىلمىسكەردى قيا باستىرماعان ءتارتىپ ساقشىلارىنىڭ قىزمەتى شىنىندا دا ەرلىكپەن بىردەي. وقيعا بىلاي بولعان. ءتارتىپ ساقشىلارىنا قارۋلانعان بەلگىسىز بىرەۋلەردىڭ بەيبىت تۇرعىندارعا شابۋىل جاساعانى تۋرالى حابار كەلىپ تۇسەدى. راسىندا دا شاھاردىڭ التىنشى شاعىن اۋدانىندا بەلگىسىز بىرەۋ قارۋ قولدانىپ, ەلدى ۇركىتكەن. سول ماڭدا كەزەكشىلىك قىزمەت اتقارىپ جۇرگەن پوليتسيا سەرجانتى بەكجان تىلەنشيەۆ بىردەن قىراعىلىق تانىتىپ, شۇعىل تۇردە قىلمىسكەردىڭ ىزىنە تۇسەدى. ال تۋرا سول جەردەگى ءبىر ۇيگە شاقىرتۋ بويىنشا كەلگەن پوليتسيا اعا لەيتەنانتى دانيار زاۋىربەك بۇل جاعدايدى بايقاپ قالىپ, ول دا بىردەن قىلمىسكەردى قۇرىقتاۋعا ارەكەتتەنەدى. بىراق سول كەزدە كوپقاباتتى ۇيلەردىڭ كىرەبەرىسىنە جاسىرىنعان قىلمىسكەر بەكجان تىلەنشيەۆتى اۋىر جاراقاتتايدى. وقيعاعا كۋا بولعان دانيار زاۋىربەك بولعان جايدى بىلاي باياندايدى. «بىلتىر 19 ماۋسىم كۇنى التىنشى شاعىن اۋداندا ىشىمدىك ءىشىپ, ماس كۇيىندە جۇرگەن ادام تۋرالى حابارلاما كەلدى. بىراق كۇتپەگەن جاعدايعا كۋا بولدىم. شاقىرتۋ تۇسكەن بويدا سوندا كەلگەنىمدە, پوليتسيا سەرجانتى بەكجان تىلەنشيەۆتى الگى قىلمىسكەر اۋىر جارالاپتى. مەن دە وقيعا ورىن العان №18 كوپقاباتتى ءۇيدىڭ كىرەبەرىسىندە تۇرىپ, وعان قارۋ كەزەنۋ ارقىلى سىرتقا سىتىلىپ شىقتىم. شىقتىم دا تالدىڭ تۇبىندە الگى قىلمىسكەردى كۇتىپ تۇردىم», دەيدى دانيار ماسكەۋبەك ۇلى. سودان ءبىراز ۋاقىتقا سوزىلعان تەكەتىرەستەن سوڭ, دانيار ءوزى قورعانا ءجۇرىپ, ەكى رەت كوزدەپ اتۋ ارقىلى قىلمىسكەردى زالالسىزداندىرادى. پوليتسيا اعا لەيتەنانتىنىڭ قىراعىلىعى جانە جەدەل ارەكەت ەتۋى ناتيجەسىندە بەيبىت تۇرعىندارعا قاۋىپ توندىرگەن قىلمىسكەر وقشاۋلانادى. ومىرىنە قاۋىپ تونگەن قوس ازامات مىندەتىن مۇلتىكسىز اتقارۋ ارقىلى امان قالعان. دانيار زاۋىربەك 2012 جىلدان بەرى ىشكى ىستەر سالاسىندا قىزمەت ەتىپ كەلەدى. بۇگىندە پوليتسيا كاپيتانى اتانعان ول «تۋعان ەلىمە ادال قىزمەت ەتۋ جانە بەيبىت تۇرعىنداردىڭ قاۋىپسىزدىگىن قورعاۋ – ازاماتتىق مىندەتىم», دەيدى. تاراز قالالىق ىشكى ىستەر باسقارماسى جەرگىلىكتى پوليتسيا قىزمەتىنىڭ ۋچاسكەلىك پوليتسيا ينسپەكتورى قىزمەتىن اتقارىپ جۇرگەن جاس جىگىت بۇل ارەكەتىن ەرلىك دەپ ويلامايدى. قايتا مۇنى قىزمەتتىك مىندەتىم دەپ تۇسىنەدى. الايدا, قىلمىسكەرگە قارسى كۇرەس ەرلىككە سانالادى. ايتپەسە بەيبىت تۇرعىنداردىڭ جازاتايىم وققا ۇشۋى مۇمكىن. ءبىر-بىرىمەن جولى قىزمەت ەتۋ بارىسىندا تۇيىسكەن قوس ازاماتقا جۋىردا عانا ەلباسى نۇرسۇلتان نازارباەۆتىڭ جارلىعىمەن «ەرلىگى ءۇشىن» مەدالى بەرىلدى. سونداي-اق, دانيار زاۋىربەك قازاقستان رەسپۋبليكاسىنىڭ ىشكى ىستەر ءمينيسترى, گەنەرال-پولكوۆنيك قالمۇحانبەت قاسىموۆتىڭ العىس حاتىن العان. جامبىل وبلىستىق ىشكى ىستەر دەپارتامەنتىنىڭ باستىعى, گەنەرال-مايور تىلەگەن ماتكەنوۆتىڭ قولىنان دا سىيلىق الىپتى. مۇنىڭ ءبارى دە ەرلىككە كورسەتىلگەن قۇرمەت ەكەنى ءسوزسىز. ەرلىكتىڭ ەشقاشان ۇمىتىلمايتىنىن دالەلدەگەن جاعداي وسى. پوليتسيا سەرجانتى بەكجان تىلەنشيەۆ تە 2012 جىلدان بەرى ىشكى ىستەر سالاسىندا قىزمەت ەتىپ كەلەدى. بەكجان مامىر ۇلى – ماماندىعىن ماقتانىشى كورەتىن ازاماتتاردىڭ ءبىرى. قىلمىسكەردى قولعا ءتۇسىرۋ كەزىندە دەنە جاراقاتىن الىپ, تاعدىرى سىن ساعاتتا سەرگەلدەڭگە تۇسكەن ساتتە دە مويىمادى. قايتا قارۋلانىپ, كۇش-قايراتى ارتا ءتۇستى. ەڭ باستىسى – ەل امان, جۇرت تىنىش. تاپ سول وقيعادان زارداپ شەككەن ادام جوق. بۇل دا ۇلكەن جەتىستىك, ايتا قالارلىق ابىروي. ءاردايىم جاقسى جاعىنان عانا كورىنىپ, ماماندىعىنا ادالدىق تانىتىپ جۇرگەن قوس ازامات تالاي ەلگە قاۋىپ ءتوندىرۋى مۇمكىن قىلمىسكەردىڭ جولىن وسىلاي كەستى. قىلمىسكەردى قۇرىقتاعان قوس قىراننىڭ, حالىق قاۋىپسىزدىگىن قامتاماسىز ەتۋدە ەشقاشان ايانبايتىن ازاماتتاردىڭ ءالى دە ابىروي بيىگىنەن كورىنەتىنىنە سەنىم مول. ومىرىنە قاۋىپ تونسە دە قارا باسىن اراشالاپ قالۋعا ۇمتىلماي, ورىن الۋى مۇمكىن اپاتتىڭ الدىنا شىققان ازاماتتارعا كەيىنگى بۋىن دا قۇرمەتپەن قارايدى.
حاميت ەسامان, «ەگەمەن قازاقستان»
جامبىل وبلىسى