مەملەكەت بۇل ماسەلەنىڭ رەتىن تاپتى. «سەرپىن» باعدارلاماسى جۇزەگە اسىرىلا باستاعاننان بەرى وڭتۇستىكتىڭ بەس جارىم مىڭنان اسا تۇلەكتەرى وزگە وبلىستارداعى وقۋ ورىندارىنا تۇسكەن. اتاپ ايتساق, سوڭعى ءۇش جىلدا سولتۇستىك, شىعىس, باتىس قازاقستان وبلىستارى مەن اقتوبە, اقمولا, قوستاناي, پاۆلودار, قاراعاندى جانە اتىراۋ وبلىستارىنا بارعان 5627 تۇلەكتىڭ 4698-ءى جوعارى وقۋ ورنىنا تۇسسە, 929 تالاپكەر كوللەدجدەردە ءبىلىمىن جالعاستىرىپتى. ياعني, 2014 جىلى «سەرپىن-2050» باعدارلاماسى اياسىندا جوعارى وقۋ ورىندارىنا 1050 گرانت ءبولىنىپ, 540 تالاپكەر وقۋعا تۇسسە, 2015 جىلى 5000 گرانت ءبولىنىپ, ونىڭ 2580-ءىن وڭتۇستىكقازاقستاندىق تۇلەكتەر جەڭىپ العان. ال 2016 جىلى 3162 گرانت ءبولىنىپ, 1578 تالاپكەر گرانت يەگەرى بولدى. ورتا ارناۋلى وقۋ ورىندارى تۋرالى ايتار بولساق, 2014 جىلى 1000 گرانت ءبولىنىپ, وڭتۇستىكتىڭ 326 تۇلەگى ءبىلىم وشاعىنا تۇسسە, 2015 جىلى 34 كوللەدجگە 1200 گرانت ءبولىنىپ, 359 تالاپكەر ءبىلىمىن جالعاستىردى. بىلتىر 31 كوللەدجگە 1000 گرانت ءبولىنىپ, وڭىرىمىزدەن 244 جاس وقۋعا ءتۇستى. مامانداردىڭ مالىمەتىنشە, «سەرپىن-2050» باعدارلاماسى اياسىندا 2017 جىلعا 5 مىڭ گرانت بولىنەدى ەكەن. ونىڭ 4 مىڭى جوعارى وقۋ ورىندارىنا ارنالسا, 1 مىڭى كوللەدجدەر ءۇشىن بەرىلەدى. وسىعان وراي, 2017 جىلدىڭ باسىنان بەرى بارلىق اۋدان, قالالاردا اتالعان باعدارلامانى ناسيحاتتاۋ اياسىندا 80 كەزدەسۋ وتكىزىلىپ, وعان 8 مىڭعا جۋىق جاس قاتىسقان. سونىمەن بىرگە, جاقىندا وڭىرلەردەگى جاس تۇلەكتەر اراسىندا ۇگىت-ناسيحات جۇمىستارىن بەلسەندى جۇرگىزۋ, جىبەرۋشى وڭىرلەردە الەۋمەتتىك جوبانى كەڭىنەن اقپاراتتاندىرىپ, تانىستىرۋ ماقساتىندا «سەرپىن» كۇندەرى وتكىزىلدى. وڭتۇستىك ايماقتارداعى مەكتەپ ءبىتىرۋشى تۇلەكتەرگە سولتۇستىك ايماقتارداعى جوعارى جانە كاسىپتىك-تەحنيكالىق ءبىلىم بەرۋ مەكەمەلەرىندە ءبىلىم بەرۋدى ناسيحاتتاۋدى ىسكە اسىرۋ ماقساتىندا 9 وبلىستاعى 22 جوعارى وقۋ ورنىنان جانە 30 ورتا ارناۋلى وقۋ ورنىنان وكىلدەر كەلىپ, وبلىستىڭ بارلىق 14 اۋدان, قالالارىندا حالىقپەن كەزدەسۋ وتكىزدى. بۇل ماسەلەنىڭ تاعى ءبىر وڭتايلى جاعى, وقۋ ورىندارىن بىتىرگەن وڭتۇستىكتىڭ ۇلاندارى تۇگەلدەي تۋعان جەرىنە قايتا بەرمەيدى. قازاقستاننىڭ بارلىق جەرى ءاربىر قازاق ءۇشىن تۋعان جەر, التىن ۇيا. تاعدىرىن توعىز وبلىستىڭ بىرىمەن بايلانىستىرعان ولار سول وڭىردەگى ادام رەسۋرسىن كوبەيتۋمەن قاتار وزىنە جاقسى جۇمىس, جايلى تىرشىلىك تابادى. جاقىندا جاستار ساياساتىنىڭ ىسكە اسىرىلۋ ماسەلەسى وبلىستىق اكىمدىكتىڭ كەزەكتى ماجىلىسىنە ارقاۋ بولدى. وبلىستىق جاستار ساياساتى ماسەلەلەرى جونىندەگى باسقارما باسشىسى بالمارجان ناربەكوۆا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى «تۋعان جەر» باعدارلاماسى اياسىندا استانا قالاسى جانە قاراعاندى, جامبىل, قىزىلوردا وبلىستارىنىڭ جاستار ساياساتى ماسەلەلەرى باسقارمالارىمەن ەكى جاقتى مەموراندۋم تۇزىلگەنىن ايتتى. جاستارعا ارنالعان مەملەكەتتىك باعدارلامالاردىڭ ورىندالۋىندا دا جاقسى جەتىستىكتەر بار. ماسەلەن, «ديپلوممەن – اۋىلعا» باعدارلاماسى بويىنشا بيىل 80 مامان باسپانالى بولىپ, 315 جاس مامان جۇمىسقا ورنالاسقان. ال ورتاشا جالاقىسى 56 725 تەڭگەنى قۇرايتىن «جاستار پراكتيكاسىمەن» 1120 جۇمىس بەرۋشى مەكەمەگە 3005 جاس جىبەرىلگەن. جيىندا وبلىس اكىمى جانسەيىت تۇيمەباەۆ «سەرپىن-2050» باعدارلاماسى اياسىندا ورتا ارناۋلى وقۋ ورىندارىنا اۋىل جاستارىن تارتۋدى, وبلىس بويىنشا قۇرىلىس جۇرگىزىلىپ جاتقان نىسانداردا تۇرعىلىقتى جۇمىسسىز جاستاردى تارتۋ بويىنشا قالا, اۋدان اكىمدەرىمەن بىرلەسكەن شارالار قابىلداۋدى, بارلىق مادەنيەت ۇيلەرى مەن كلۋبتاردا جاستارعا ارنالعان ۇيىرمەلەر اشۋدى مىندەتتەدى. التىن قۇرساق وڭتۇستىكتە 800 مىڭعا جۋىق جاس بار. سونىڭ 65 مىڭنان استامى جوعارى وقۋ ورنىندا وقىسا, 70855 ستۋدەنت كاسىپتىك-تەحنيكالىق كوللەدجدەردە وقىپ جاتىر. ال «سەرپىن» باعدارلاماسى قالعان جاستاردىڭ ىشىندەگى بىلىمگە قۇشتار تۇلەكتەرىنە ۇلكەن مۇمكىندىكتەردىڭ تىزگىنىن ۇستاتۋدا. جاستار – ەلىمىزدىڭ ەرتەڭى. ءبىلىمدى ۇرپاق مەملەكەتىمىزدىڭ كەلەشەگىن كەمەل ەتەدى. «سەرپىن» باعدارلاماسى نۇرلى بولاشاققا وسىلاي ەڭبەگىن ءسىڭىرىپ جاتىر.
باقتيار تايجان, «ەگەمەن قازاقستان»
وڭتۇستىك قازاقستان وبلىسى