وسى ءبىر ەڭسەڭدى تىك ۇستاتاتىن تاۋەلسىزدىك قارلىعاشى – مەملەكەتتىك رامىزدەر كۇنىنە وراي, «نۇر وتان» پارتياسى جانىنداعى «جاس وتان» جاستار قاناتى «بالداۋرەن» رەسپۋبليكالىق وقۋ-ساۋىقتىرۋ ورتالىعىمەن بىرلەسىپ, ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنداعى «جاڭا تۇرپاتتى جاڭعىرۋدىڭ ەڭ باستى شارتى – ۇلتتىق كودىڭدى ساقتاي ءبىلۋ» دەگەن ءسوزىن نەگىزگە العان, «كوك تۋدىڭ جەلبىرەگەنى» اتتى جاڭا جوبا ەلىمىزدىڭ بارلىق قالالارىندا ءۇش ايدان بەرى جالعاسىن تاۋىپ كەلەدى.
وسكەلەڭ ۇرپاقتى وتانشىلدىققا تاربيەلەۋ, جاستاردىڭ بويىندا پاتريوتتىق سەزىمدى نىعايتۋ ماقساتىن كوزدەگەن وسىنداي شارا تاياۋدا ورال قالاسىندا بولعان ەدى. اتالعان كەشكە «دارىن» مەملەكەتتىك جاستار سىيلىعىنىڭ يەگەرى, پاتريوتتىق اندەردى ناقىشىنا كەلتىرىپ ورىنداپ جۇرگەن يبراگيم ەسكەندىر قاتىسىپ, اننەن شاشۋ شاشتى. اسىرەسە, ونىڭ ورىنداۋىنداعى ەرمۇرات زەيىپحاننىڭ «كوك تۋدىڭ جەلبىرەگەنى» ء(سوزى الماس احمەتبەكتىكى) اتتى رۋحتى ءان جۇرتتى سەرگىتكەنى دە, سەرپىلتكەنى دە اقيقات. سول سەكىلدى جوبا اياسىندا ارنايى مەكتەپ-ينتەرناتىنىڭ ونەرپاز جاستارى, وبلىستىق وتباسى ۇلگىسىندەگى بالالار اۋىلىنىڭ تاربيەلەنۋشىلەرى دە ءوز ونەرلەرىن كورسەتتى.
كەش بارىسىندا تانىمال ازامات – قابدول تىلەكوۆ, «بيگاليەۆتەر» وتباسىلىق ءانسامبلىنىڭ مۇشەسى مارينا بيگاليەۆا, سامبودان بىرنەشە دۇركىن قازاقستان چەمپيونى سەرىكباي نىعمەت, «ەستەت» بي ستۋدياسىنىڭ جەتەكشىسى ساۋلە تىلەكقاليەۆا, جاس اقىن, م.وتەمىسوۆ اتىنداعى بقمۋ-دىڭ بيىلعى جىلعى تۇلەگى داۋرەن شامۇراتوۆ «جاس وتان» جاستار قاناتىنىڭ قاتارىنا قابىلدانىپ, جاڭا مۇشەلەرگە ارنايى توسبەلگىلەر تابىستالدى. سونىمەن قاتار, كونتسەرت بارىسىندا مەكتەپ وقۋشىلارى مەن «بالداۋرەن» روسو بازاسىندا قۇرىلعان قازاقستاندىق جاس پاتريوتتار اكادەمياسىنىڭ مۇشەلەرى ەلباسىنا ارناعان تىلەكتەرىن «تىلەك كىتاپشاسىنا» جازدى. جاستار كىتاپتى ەستافەتالىق جولمەن ايماقتان ايماققا جەتكىزە وتىرىپ, استانا قالاسىندا مەملەكەت باسشىسىنا تابىستاماق.
سۇلەيمەن مامەت, «ەگەمەن قازاقستان»