كەيىپكەر نەمىس قاريادان سىيعا كينواپپارات الادى. قارتايعان شاعىندا ول اۋىلداردى ارالاپ سۇيىكتى فيلمدەرىن كورسەتەدى. تۋىندى ونەردىڭ ارقاسىندا ول الەمدى وزگەرتەدى دەگەن يدەياعا كەپ تىرەلەدى, دەپ حابارلايدى قازاقپارات ءتىلشىسى. «كينومەحانيك» كينوكارتيناسى قر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەلى وتىر. ء«فيلمنىڭ يدەياسى مارقۇم مەڭتاي وتەپبەرگەنوۆتىكى. ءبىر كۇنى كينوستۋديادا كەزدەسكەنىمىزدە كينومەحانيكتەر تۋرالى ويىن ايتتى. كەيىننەن ونىڭ ويىن تارقاتىپ, ستسەناري جازىپ شىقتىم. ستسەناريدى كورگەن ساتتەن باستاپ, اۋىرىپ جۇرگەنىنە قاراماستان, باستى ءرولدى سومداۋعا دايىندالىپ, قۋانىپ ءجۇردى. ويتكەنى ول كوبىندە ەپيزودتىق رولدەردە ويناپ, باستى رولدەر بۇيىرماعان اكتەر بولاتىن. ءبىز ونىڭ ۇيىندە تالاي كەزدەسىپ, رەپەتيتسيا جاساپ, كەيبىر ساحنالار تۋرالى ايتىپ جۇردىك. امال نەشىك, ءفيلمنىڭ شىققانىن كورە الماي كەتتى... الايدا, ونىڭ ەسىمى تيتردا بولادى», - دەدى رەجيسسەر ەرمەك تۇرسىنوۆ. كارتينانىڭ پروديۋسەرى قانات تورەبايدىڭ ايتۋىنشا, ەكىنشى دۇنيەجۇزىلىك سوعىس سۋرەتتەلەتىن كادرلار وتكەن جىلدىڭ جەلتوقسان ايىندا ۆەنگريانىڭ استاناسى بۋداپەشتتە تۇسىرىلگەن. 8 مينۋتتىق بەينەماتەريال ەكسپەرتتىك كەڭەس مۇشەلەرىنە تانىستىرىلدى. «سوعىستان كەيىنگى جىلداردى ساحنالاۋعا قاجەتتى وبەكتىلەردى تابۋ ءۇشىن قازاقستاننىڭ بارلىق ايماعىن ارالاپ شىقتىق. كورگەن وبەكتىلەردى شاكەن ايمانوۆ اتىنداعى «قازاقفيلم» اكتسيونەرلىك قوعامى قورىتا كەلە, تۇسىرىلىمدەردى الماتى وبلىسى, جاركەنت قالاسى ماڭىندا جۇرگىزۋگە ۇسىنىس ايتتى. ءفيلمنىڭ نەگىزگى ايتار ويى - ۇلى كينو ونەرىنىڭ كۇشى مەن يگىلىك ەستافەتاسى. ءبىزدىڭ كارتينامىز حح عاسىردا كينو ونەرىن تاراتۋشىلارعا باعىشتالادى», - دەدى پروديۋسەر. كينوتۋىندىدا باستى رولدەردى مۇرات ماقاجانوۆ جانە كارتينانىڭ قويۋشى سۋرەتشىسى قۋات تىلەۋباي سومدايدى. سونداي-اق, رەسەيلىك ءارتىس نينا ۋساتوۆامەن كەلىسسوزدەر ءجۇرىپ جاتىر. 31 مامىر كۇنى ءتۇسىرىلىم توبى الماتى وبلىسىنا اتتانادى. سوڭعى تۇسىرىلىمدەر الماتىداعى «قازاقفيلم» كينوستۋدياسىنىڭ تەرريتورياسىندا جانە تالعار قالاسىنىڭ مادەنيەت سارايىندا وتەدى دەپ جوسپارلانۋدا. قازىر سۋرەتشىلەر عيماراتتىڭ تاريحي كەيپىن قايتا كەلتىرۋ جۇمىستارىن جاساپ جاتىر. اتاپ ايتساق, ءتۇسىرىلىم كەزىندە لەنيننىڭ ەسكەرتكىشى جانە سول داۋىردەن حابار بەرەتىن اتريبۋتيكالار قويىلادى.
دەرەكوز: inform.kz