– بۇگىن سىزدەر مەن بىزدەر ءۇشىن ەرەكشە سالتاناتتى كۇن! ۋنيۆەرسيتەت ءوزىنىڭ ءۇشىنشى بۋىنىن ۇلكەن ومىرگە اتتاندىرعالى تۇر. ماڭىزدى شارا حالىقارالىق ەكسپو كورمەسىنىڭ اشىلۋ قارساڭىندا وتكىزىلىپ وتىر. الەمدىك دەڭگەيدەگى وقۋ ورنىندا ءبىلىم الۋ ءاربىر ادام ءۇشىن اسقاق ابىروي, مەرەيلى مارتەبە دەپ سانايمىن. بارشاڭىزدى ديپلوم تاپسىرۋ راسىمىنە وراي, شىن جۇرەگىممەن قۇتتىقتاپ, ۇلكەن باقىت پەن تابىس تىلەيمىن. بۇل ۋنيۆەرسيتەت ءبىزدىڭ اسا ماڭىزدى تاۋەلسىزدىك جىلدارىندا قابىلداعان جوبامىز بولىپ تابىلادى. بۇل ءبىلىم بەرۋ ۇدەرىسىنىڭ سىرتقا نەگىزدەلگەن وقۋ ورنى. وكىنىشكە قاراي, مۇنداي وقۋ ورنى قازاقستاندا بۇرىن بولعان ەمەس. اشىلعانىنا 7-اق جىل بولعان وقۋ ورداسى ءوزىمىزدىڭ ەلدە دە, باسقا ەلدە دە اسا بەدەلدى وقۋ ورنىنا اينالدى, دەدى ەلباسى.
پرەزيدەنت ءوز سوزىندە ءبىلىم بەرۋ ءۇشىن شەت ەلدەردىڭ ىرگەلى وقۋ ورىندارىنىڭ تاڭداۋلى عالىمدارى شاقىرىلىپ, عالامدىق ءبىلىم بەرۋ جۇيەسىمەن ءتيىمدى ينتەگراتسيا جۇرگىزۋ ارقىلى دۇنيە جۇزىنە استانانىڭ عىلىم مەن ءبىلىم ورتالىعى رەتىندە كورسەتىلىپ كەلە جاتقانىن اتاپ ءوتتى.
«قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى مەنىڭ جولداۋىمدى ورىنداۋدا ۋنيۆەرسيتەتتىڭ اتقارار ءرولى وتە زور. ۋنيۆەرسيتەتتى مىڭنان استام تۇلەك تابىستى ءتامامداپ شىقتى. ءبىزدىڭ حالقىمىزدا ء«بىلىمنىڭ باسى – بەينەت, ءتۇبى – زەينەت» دەگەن ۇلاعاتتى ءسوز بار. وقۋ ورنى تۇپكىلىكتى جاڭعىرۋ جولىنا تۇسكەن تاۋەلسىز قازاقستانعا ايانباي قىزمەت ەتەدى دەپ سەنەمىن. سول ءۇشىن وسى ۋنيۆەرسيتەتتى سالدىق. سول ءۇشىن سىزدەردى وقىتتىق, دەدى نۇرسۇلتان نازارباەۆ.
مەملەكەت باسشىسى كوكتەمنىڭ بۇل قۋانىشتى كۇنى جاڭا ديپلوم يەلەرىنە, نازارباەۆ ۋنيۆەرسيتەتىنىڭ تۇلەكتەرىنە مامان رەتىندەگى كاسىبي جولىنىڭ باستاۋى رەتىندە ەستە قالاتىنىن اتاپ ءوتتى. بيىل نازارباەۆ ۋنيۆەرسيتەتىن 737 تۇلەك ءتامامدادى. سونىڭ ىشىندە العاش رەت 9 دوكتورانت دايارلاندى. بۇعان دەيىنگى جىلداردا تۇلەپ ۇشقان مىڭداعان ستۋدەنتتەردىڭ جارتىسى الەمنىڭ ەڭ ۇزدىك جوعارى وقۋ ورىندارىندا وقۋلارىن جالعاستىرعانىن تىلگە تيەك ەتكەن ەلباسى تۇلەكتەردىڭ وسى ۋاقىتتا ەڭبەك نارىعىندا وزدەرىنىڭ باسەكەگە قابىلەتتى جانە سۇرانىسقا يە ماماندار ەكەنىن دالەلدەگەندەرىن ەرەكشە اتاپ ءوتتى. ولار بۇگىندە ەلىمىزدەگى ەڭ ءىرى عىلىمي مەكەمەلەردە, مەديتسينالىق كومانيالاردا جانە مەملەكەتتىك قىزمەتتە ەڭبەك ەتىپ ءجۇر.
دۋمان اناش, «ەگەمەن قازاقستان»