ماسەلەن, «عىلىم كيەسى: عىلىمي ينتەگراتسيا جانە ورتاق قۇندىلىقتار» تاقىرىبى بويىنشا وتكەن پانەلدى وتىرىس اياسىندا ماڭىزدى ماسەلەلەر تالقى تارازىسىنا سالىندى. پروفەسسور, فيلولوگيا عىلىمدارىنىڭ دوكتورى, تۇركى الەمى اقساقالدار كەڭەسىنىڭ مۇشەسى ءادىل احمەتوۆ مودەراتورلىق ەتكەن بۇل جيىندا تۇركىتىلدەس مەملەكەتتەر پارلامەنتتىك اسسامبلەياسىنىڭ (تۇركپا) باس حاتشىسى جاندوس اسانوۆ «عىلىمي ىقپالداستىق جانە ورتاق ماسەلەلەر: تۇركى تىلدەرىن زەرتتەۋ پروبلەمالارى» دەگەن تاقىرىپتا بايانداما جاسادى.
ءوز سوزىندە جاندوس اسانوۆ: «بولاشاققا باعدار: رۋحاني جاڭعىرۋ» اتتى ماقالاسىندا قازاقستان پرەزيدەنتى قازاق ءتىلىنىڭ كەلەشەكتەگى دامۋىنا قاتىستى قۇندى ويىن ايتتى. سونداي-اق, قازاق تىلىنە تۇركى الەمىنەن كوپتەگەن قۇندى, قاجەتتى ەڭبەكتەردى, قۇجاتتاردى اۋدارۋ قاجەتتىگىنە ايرىقشا ءمان بەردى. قازاق ءتىلى تۇركى تىلدەرىنىڭ قۇرامىنا كىرەدى. قازاقستان پرەزيدەنتىنىڭ باستاماسىمەن قۇرىلعان تۇركىتىلدەس مەملەكەتتەر پارلامەنتتىك اسسامبلەياسى وسى ەلدەردىڭ مادەني, رۋحاني جانە گۋمانيتارلىق بايلانىسىنىڭ دامۋىن جانداندىرۋدى باسشىلىققا الىپ كەلەدى. تۇركپا-نىڭ نازارىندا تۇرعان تاعى ءبىر ماڭىزدى ماسەلە – تۇركى تىلدەرىن سالىستىرمالى تۇردە زەرتتەپ, زەردەلەۋ. ارينە, تۇركى تىلدەس ەلدەردىڭ تاريحي تامىرى ءبىر, سوندىقتان, ولاردىڭ تىلدەرى دە, ادەبيەتتەرى دە, مادەنيەتەرى دە ورتاق ءارى ۇقساس. سوندىقتان, تۇركى تىلدەرىن, ونىڭ ىشىندە لەكسيكانى, فونەتيكانى, ستيليستيكانى سالىستىرمالى تۇردە زەرتتەۋدىڭ ماڭىزى زور. بۇل – ءبىزدىڭ تىلدەرىمىزدىڭ نەگىزگى وزەگىن, سيپاتىن, تابيعاتىن تۇسىنۋگە مۇمكىندىك بەرەدى. سول ارقىلى ءبىز ءوزىمىزدىڭ تاريحي سالت-داستۇرلەرىمىزدى دە زەردەلەي الامىز», – دەدى.
ءلايلا ەدىلقىزى,
«ەگەمەن قازاقستان»